«Տաշիր՚ ընկերությունների խումբը, «Հայաստանի էլեկտրացանցերը՚ և Եվրասիական զարգացման բանկը 100 մլն դոլարի վարկային համաձայնագիր են ստորագրել

Արմինֆո. Եվրասիական զարգացման բանկը պատրաստ է 100 մլն դոլար տրամադրել «Հայաստանի էլեկտական ցանցեր՚ ՓԲԸ-ին` երկրի էներգետիկ ենթակառուցվածքների զարգացման և արդիականացման համար: Մտադրությունների շուրջ համաձայնագիրն ստորագրվել է հոկտեմբերի 31-ին Մոսկվայում Եվրասիական զարգացման բանկի հովանու ներքո ընթացող «Եվրասիական ինտեգրում» ХII միջազգային խորհրդաժողովի շրջանակում` ԵԱԶԲ, «Հայաստանի էլեկտրական ցանցեր՚ ՓԲԸ և նրա բաժնետեր «Տաշիր՚ ընկերությունների ռուսական խմբի միջև, հաղորդում է ԱրմԻնֆո-ի հատուկ թղթակիցը:

Ինչպես հաղորդվել է համաձայնագրի ստորագրման արարողության ժամանակ, ՀԷՑ արդիականացման և զարգացման ծրագրի ընդհանուր արժեքը կկազմի շուրջ 700 մլն դոլար: Ծրագրի առաջին փուլի իրագործման նախագիծն արդեն հաստատվել է և նախատեսում է մինչև 2021 թիվը 200 մլն դոլարի ներդրումներ: Նոյեմբերի 15-ին պաշտոնապես կներկաայցվի ՀԷՑ զարգացման ծրագրի երկրորդ փուլը, որի արժեքը կկազմի 500 մլն դոլար: Ծրագրի իրագործման նախագծում ներգրավված են ոչ միայն ԵԱԶԲ վարկային միջոցներ, այլև Վերակառուցման և զարգացման եվրոպական բանկի (ՎԶԵԲ) և Ասիական զարգացման բանկի (ԱԶԲ) ռեսուրսներ: ՀԷՑ զարգացման նախագծում ռեսուրսների շուրջ կեսը  ներդնում է դրա հիմնական բաժնետերը` «Տաշիր՚ ընկերությունների խումբը:

2017 թվականի հուլիսի 27-ին  Հայաստանի կառավարությունը «Տաշիր կապիտալ՚ ՓԲԸ-ին թույլ է տվել գրավ դնել ՀԷՑ ՓԲԸ բաժնետոմսերը` Ասիական զարգացման բանկից (ԱԶԲ) և Վերակառուցման և զարգացման եվրոպական բանկից (ՎԶԵԲ) խոշոր վարկ ստանալու համար: Գործադիր մարմնի որոշման նախագծի համաձայն, կգրավադրվի ՀԷՑ բաժնետոմսերի 69,9999594% (172496):

Ավելի վաղ Երևանում մամուլի ասուլիսի ժամանակ, պատասխանելով ԱրմԻնֆո-ի հարցին, ընկերության գլխավոր տնօրեն Կարեն Հարությունյանը հաղորդել էր, որ ՀԷՑ առաջիկա հինգ տարվա ներդրումային ծրագրի ընդհանուր արժեքը կկազմի 200 մլն դոլար, որից 80 մլն դոլար կտրամադրի ԱԶԲ, նույնքան էլ` ՎԶԵԲ-ը: Ծրագրի այդ փուլի իրագործումից հետո ընկերությունը ձեռնամուխ կլինի 500 մլն արժողությամբ 10-ամյա նախագծի իրագործմանը: Ընթացիկ տարվա հուլիսի սկզբից ԱԶԲ տնօրենների խորհուրդը հաստատել է վարկային ծրագիրը, որը նախատեսում է 80 մլն դոլարի վարկի տրամադրում ՀԷՑ-ին: Միջոցները կուղղորդվեն բաշխիչ ցանցերի բարելավմանն ու էներգետիկ անվտանգության մակարդակի բարձրացմանը: Ներդրումները կնպաստեն մասնավոր հատվածում էլեկտարէներգիայի բաշխման բարելավմանը, էներգահամակարգում կորուստները ներկայիս 10%-ից 2021 թվին մինչև 8%  նվազեցմանը: Ընթացիկ տարվա հուլիսի 3-ից ՀԷՑ-ը  ստացել է որակի և ISO 9001:2015 համաշխարհային պահանջներին համապատասխանության միջազգային անկախ սերտիֆիկատ: Սերտիֆիկացված աուդիտն անցկացրել է անկախ փորձագիտության բնագավառի համաշխարհային առաջատար, մենեջմենթի համակարգերի սերտիֆիկացման խոշորագույն միջազգային մարմիններից մեկը` TUV Rheinland ընկերությունը: «Տաշիր՚ ընկերությունների խումբը, որը գլխավորում է ռուսաստանցի խոշոր գործարար Սամվել Կարապետյանը, և «Ինտեր ՌԱՕ՚ ընկերությունը 2015 թվականի սեպտեմբերի 30-ին ստորագրել են Հայաստանի Հանրապետությունում ռուսական էներգահոլդինգի էլեկտրաէներգետիկ ակտիվների` ՀԷՑ և Հրազդանի ՋԷԿ առքուվաճառքի շուրջ պայմանագիր: Ընկերության վաճառքի պատճառ դարձավ էլեկտրաէներգիայի սակագների, սպառողների կարծիքով, չհիմնավորված 16,7% (6,93 դրամ 1 կՎտ.ժ դիմաց) բարձրացման հետևանքով հասարակական ընդվզումը, որը զսպելու նպատակով Հայաստանի իշխանությունները համաձայնեցին անցկացնել սակագների բարձրացման վերաբերյալ ՀԾԿՀ որոշման և ՀԷՑ գործունեության աուդիտ: Բացի այդ, երկրի իշխանությունները որոշեցին սուբսիդավորել բարձրացված սակագինը բնակչության և փոքր ու միջին ձեռներեցության համար` մինչև աուդիտի ավարտը: ՀԷՑ-ն ստեղծվել է 2002 թվի մայիսին` էլեկտրաէներգիայի բաշխման և իրացման չորս պետական տարածաշրջանային ընկերությունների միաձուլման արդյունքում: Ցանցերի ընդհանուր երկարությունը  կազմում է 36 հազար կմ: Ընկերությունն սպասարկում է շուրջ 985 000 սպառողի: ՀԷՑ ՓԲԸ-ն ունի ՀՀ տարածքում էլեկտրաէներգիայի հաղորդման և բաշխման բացառիկ լիցենզիա, երաշխավորված սակագները հաշվարկվում են` ելնելով ընկերության ծախսերից և կարգավորում են ներդրված կապիտալի վերադարձման տոոկսադրույքները: