Չորեքշաբթի, 1 Նոյեմբերի 2017 19:33

Արմինֆո. ՀՀ տնտեսական զարգացման և ներդրումների նախարար Սուրեն Կարայանն այսօր ընդունել է Իրաքի Ներկայացուցիչների խորհրդի արտաքին հարաբերությունների հանձնաժողովի նախագահ Աբդելբարի Ալ-Զիբարիի գլխավորած պատվիրակությանը, որի կազմում էին վերոնշյալ հանձնաժողովի, ինչպես նաև Իրաք-Հայաստան պատգամավորական բարեկամական խմբի անդամները:

Ինչպես ԱրմԻնֆո գործակալությանը տեղեկացվել է Նախարարության մամուլի ծառայությունից, նախարար Կարայանն իր խոսքում նշել է, որ չնայած երկու երկրների տնտեսական հարաբերությունները աճի միտումներ ունեն, սակայն դեռ կա առևտրատնտեսական հարաբերությունների զարգացման մեծ ներուժ։

Աբդելբարի Ալ-Զիբարին, համաձայնելով նախարարի հետ, նշել է, որ իրենց նույնպես չեն բավարարում տնտեսական համագործակցության առկա ցուցանիշները և առաջարկել է մեկտեղել ջանքերը դրանց աճն ապահովելու հարցում, այդ թվում՝ զբոսաշրջության ոլորտում։ Իրաքցի պաշտոնյան հավելել է, որ անհրաժեշտ է քայլեր ձեռնարկել, որպեսզի Երևանի փողոցներում ավելի շատ իրաքցի զբոսաշրջիկներ լինեն, քանի որ Իրաքի ժողովուրդը շատ լավ է վերաբերվում հայերին և բարձր է գնահատում հայկական հյուրասիրությունը։ «Իրաքի հայկական համայնքը ևս մշտապես առանձնացել է գործարար, մշակութային և այլ բարձր ունակություններով», - նշել է նա։

Իրաքցի խորհրդարանականները նախարար Կարայանին հրավիրել են Իրաք՝ տեղում քննարկելու երկու երկրների տնտեսական համագործակցության հեռանկարները։

ՀՀ ազգային վիճակագրական ծառայության տվյալներով, 2017 թվականի հունվար-սեպտեմբեր ամիսներին Հայաստանի և Իրաքի միջև առևտրի շրջանառությունը կազմել է 88.2 մլն դոլար, տարեկան անկումը`13%: Միևնույն ժամանակ, արտահանման ծավալները նվազել են 13.1%, կազմելով 88 մլն դոլար, իսկ ներմուծումը`2.8 անգամ, մինչև 201.9 հազար դոլար: