Հայաստանի նախագահը ռացիոնալ չի համարում երկրի դուրս գալը ԵԱՏՄ-ից

Արմինֆո.  Հայաստանի նախագահ Սերժ Սարգսյանը ռացիոնալ չի համարում ԵԱՏՄ-ից երկրի դուրս գալու վերաբերյալ ընդդիմության առաջարկը: Այդ մասին նախագահը հայտարարել է «Արմենիա՚ հեռուստաալիքով հեռարձակված հարցազրույցում:

«Այդ առաջարկներում բացարձակապես ռացիոնալություն չեմ տեսնում։ Տեսնում եմ որոշակի շահերին ծառայելու ցանկություն։ Կամ որոշակի համոզվածություն, որը գալիս է նյութին մինչեւ վերջ չտիրապետելուց։ Ես որեւէ լուրջ լուրջ փաստարկ չեմ տեսել»,- նշել է նա։

Անդրադառնալով այն դիտարկմանը, թե հունվարի 1-ից 900 ապրանքատեսակներ կարող են թանկանալ, Սերժ Սարգսյանը պատասխանել է. «Դրանք էական ազդեցություն չեն կարող ունենալ` ոչ թռիչքային գնաճի, ոչ  տնտեսությանը խոչընդոտելու առումով»։ Նախագահի ասելով, 2015-ին ԵԱՏՄ-ին Հայաստանի լիարժեք անդամակցումից ի վեր մի քանի հազար ապրանքատեսակների դրույքաչափերը փոխվել են։ «Եղա՞վ ազդեցություն, իհարկե՝ չեղավ։ Եւ հիմա էլ ազդեցությունը նաեւ փոխհատուցվում է այլ ապրանքատեսակների մասով, ավելի էժան գներով։ Կարծում եմ՝ այստեղ հավասարակշռված մոտեցում ունենք։ Եւ դա բերում է նրան, որ 2016 թվականին մեր երկրում, ընդհակառակը, գնանկում եղավ»,- ասել է Սարգսյանը, հավելելով, թե որոշ ապրանքատեսակների գներ բարձրացել են՝ կապված միջազգային շուկայի հետ, «բայց ընդհանուր գնաճը կառավարելի է՚։

Հիշեցնենք, որ ավելի վաղ «Ելք՚ խորհրդարանական խմբակցությունը հանդես էր եկել Հայաստանի մասով ԵԱՏՄ մասին պայմանագրի գործողությունը դադարեցնելու գործընթաց սկսելու  օրենսդրական նախաձեռնությամբ, պատճառաբանելով, որ ԵԱՏՄ-ին անդամակցելուց արդյունքում Հայաստանի մի շարք սոցիալ-տնտեսական ոլորտներում տեղի է ունեցել էական հետընթաց, նաև` չի ամրապնդվել երկրի անվտանգությունը: Հայ խորհրդարանականները մերժեցին վերը նշված օրենսդրական նախաձեռնութկունը: