ՏԶՆՆ. 2017 թվականին տնտեսական աճը կարող է գերազանցել 7 տոկոսը

Արմինֆո. Տնտեսական զարգացման և ներդրումների նախարարությունը (ՏԶՆՆ) վերանայել է 2017 թվականի ՀՆԱ աճի կանխատեսումը` ընթացիկ տարվա բյուջեով արձանագրված  3,2%-ից մինչև 7% և ավելի: Դեկտեմբերի 21-ին կառավարության նիստից հետո այդ մասին հայտարարել է տնտեսական զարգացման և ներդրումների փոխնախարար Տիգրան Խաչատրյանը` պատասխանելով ԱրմԻնֆո-ի հարցին:

Փոխնախարարի ասելով, 2017 թվականի հունվար-նոյեմբեր ամիսների օպերատիվ վիճակագրական տվյալների համաձայն, 2016 թվականի նույն ժամանակահատվածի համեմատ արձանագրվ ել է աննախադեպ աճ. Հայաստանի տնտեսական ակտիվության ցուցանիշն ավելացել է 7,3%-ով: Որպես աճի առաջատարներ հանդես են եկել առևտրի, ծառայությունների ոլորտները և արդյունաբերության հատվածը, համապատասխանաբար` 14,4%, 14,2% և 12,3% աճ: Արտահանման ծավալը տարեկան աճել է 23,5%-ով` մինչև 971.4  մլրդ դրամ (2013.8 մլն դոլար), իսկ ներմուծմանը` տարեկան 28%-ով , մինչև 1819 մլրդ դրամ (3770.4 մլն դոլար):

Միևնույն ժամանակ, ինչպես նշել է Տիգրան Խաչատրյանը, ուրախալի է այն հանգամանքը, որ շինարարության ոլորտը, վերջ ի վերջո, արձանագրել է աճ, թեև` աննշան 0,3%-ով, մինչև 324,5 մլրդ դրամ:  Այսօրվա դրությամբ գյուղատնտեսության ոլորտը մնում է տնտեսության միակ ուղղությունը, որտեղ պահպանվում է բացասական միտումը. գյուղատնտեսական համախառն արտադրանքի ծավալը նվազել է 3,9%-ով` կազմելով 811,7 մլրդ դրամ: Դա, տնտեսական զարգացման և ներդրումների նախարարության ներկայացուցչի ասելով, պայմանավորված է միանգամայն օբյեկտիվ պատճառներով, այդ թվում` նաև Հայաստանի կլիմայական պայմաններով:

Այդուհանդերձ, ինչպես կարծում է փոխնախարարը, տարվա արդյունքներով տնտեսական ակտիվության ցուցանիշը կպահպանվի ներկա մակարդակում, ինչը պարտադիր կազդի երկրի բնակչության կյանքի որակի վրա: «Հայաստանի քաղաքացիների կենսամակարդակն այն զարագցումների ածանցյալն է, որոնք արձանագրել է Ազգային վիճակագրական ծառայությունը՚, - նշել է նա, ընդգծելով, որ հայերը դրական փոփոխություններ կզգան տևական ժամանակահատվածում ներկայի միտումների պահպանման դեպքում: Այսօրվա դրությամբ Տիգրան Խաչատրյանը կանխատեսում է, որ 2017 թվականը Հայաստանը կփակի տնտեսական ակտիվության ավելի քան 7% ցուցանիշով: «Կարծում եմ, որ բյուջեում ամրագրված ՀՆԱ աճի 3,2% ցուցանիշը մինչև տարեվերջ մի քիչ կգերազանցենք` մինչև 7% և ավելի՚, - եզրափակել է Տիգրան Խաչատրյանը:

Նշենք, որ 2017 թվականի բյուջեն ՀՆԱ աճը կանխատեսում է 3,2%-ի մակարդակում: Այդուհնադերձ, մինչև երրորդ եռամսյակ ՀՀ ֆինանսների նախարարությունը ԿԲ վերլուծության հիման վրա իր ակնկալիքներն ավելացրել է մինչև 4,5% և ավելի: Մինչդեռ 2016 թվականը Հայաստանը փակել է 0,5% տնտեսական ակտիվությամբ, ՀՆԱ աճը կազմել է 0,2%: Հաջորդ տարի ՀՆԱ աճն սպասվում է 4,5%-ի մակարդակում: