Արմինֆո.«Նաիրի ինշուրանս՚ ապահովագրական ընկերությունը ԶԼՄ-ներին հորդորել է իր և իր բաժնետիրոջ անունների հետ չկապել Բագրատաշենի մաքսատանն ստեղծված իրավիճակը և իրեն չվերագրել իրականությանը չհամապատասխանող գործողություններ: Այդպիսին է ԱրմԻնֆո-ի հարցմանը «Նաիրի ինշուրանս՚ ապահովագրական ՍՊԸ պաշտոնական պատասխանի համատեքստը՝ Բագրատաշենի մաքսակետում «Թոփ-Սփին՚ ՍՊԸ միջոցով ավտոապահովագրության մենաշնորհային իրականացման վերաբերյալ շրջանառվող լուրերի հավաստիության առնչությամբ:
«Նաիրի ինշուրանս՚ ԱԸ պաշտոնական պատասխանի բովանդակությունը հետևյալն է. «Թոփ-Սփին՚ ՍՊԸ -ն, հանդիսանալով ՀՀ ԿԲ կողմից համապատասխան գրանցում ունեցող ապահովագրական գործակալ, հանդիսանում է Ընկերության հետ համագործակցող թվով 479 գործակալներից մեկը և իր գործակալական գործունեության շրջանակներում զրկված չէ այլ ապահովագրական ընկերությունների հետ համագործակցելու ո՛չ իրավական և ո՛չ էլ իրական հնարավորություններից: Ավելին, ՀՀ կենտրոնական բանկի պաշտոնական կայքէջում https://www.cba.am/am/SitePages/fscfoinsuranceagents.aspx. կարող եք տեղեկանալ թե քանի ապահովագրական ընկերությունների գործակալ է հանդիսանում «Թոփ-Սփին՚ ՍՊԸ-ն: Այսպիսով, այն որ «Նաիրի ինշուրանս՚-ն ի դեմս «Թոփ-Սփին՚ ՍՊԸ-ի մենաշնորհ ունի Բագրատաշենի մաքսատանը իրականությանը չեն համապատասխանում՚:
Հիշեցնենք, որ Բագրատաշենի մաքսկետում ստացիոնար աշխատում է միայն «Թոփ-Սփին՚ ՍՊԸ, իսկ մյուս ապահովագրական գործակալները գործունեություն են իրականացրել մաքսակետի մատույցներում տեղակայված ժամանակավոր կրպակներում, որոնք կառավարության որոշմամբ տարեսկզբին ապամոնտաժվել են: Այդ պահից բողոքի հանրհավաքներ են սկսվել Բագրատաշենի մաքսակետում, որոնց էությունը մյուս գործակալներին այդ տեղամասում ավտոապահովագրություն անցկացնելու հնարավորությունից զրկելն է և ստացիոնար աշխատանքի համար «Թոփ-Սփին՚ ՍՊԸ օրինակով նրանց մաքսակետում տարածքի տրամադրումը մերժելը: Հունվարի 9-ին հանրահավաքի մասնակիցները, մինչ այդ չստանալով ներկայացված բողոքների պատասխանները, արդեն ստիպված էին փակել այդ տեղամասն ու ճանապարհները, և միայն օրվա վերջին ոստիկանությանը հաջողվել է նրանց համոզել դադարեցնել «շրջափակումը՚ և ազատել երթևեկելի մասը:
ԱրմԻնֆո-ի ճշտված տվյալների համաձայն, Հայաստանի ավտոապահովագրողների բյուրոյում արդեն քննարկումներ են ընթանում որոշակի մարմինների հետ` ստեղծված իրավիճակը կարգավորելու ուղիների որոնման շուրջ: Տեղեկատվություն կա նաև այն մաիսն, որ «Թոփ-Սփին՚ ՍՊԸ-ը մյուս ապահովագրական ընկերություններին առաջարկվել է համագործակցություն:
Հավելենք, որ հայկական շուկայում գործում են 6 ապահովագրական ընկերություններ և շուրջ 6400 ապահովագրական գործակալներ, որոնցից 1630-ը իրավաբանական անձ են: «Նաիրի Ինշուրանս՚ ապահովագրական ընկերությունը գործում է 1996 թվականի դեկտեմբերից. որպես ԱԸ բաժնետեր հանդես են գալիս Լևոն Քոչարյանը (Հայաստանի երկրորդ նախագահ Ռոբերտ Քոչարյանի որդին)` 60 տոկոս, և Վահագն Խաչատրյանը` 40 տոկոս: