Երրորդ անգամ «Global Finance»-ը ԱՐԱՐԱՏԲԱՆԿԻՆ ճանաչել է առևտրի ֆինանսավորող լավագույն բանկը Հայաստանում

Արմինֆո. ԱՐԱՐԱՏԲԱՆԿԸ  երրորդ անգամ  «Global Finance» միջազգային հեղինակավոր ամսագրի մասնագիտական թիմի կողմից ճանաչվել է «Առևտրի լավագույն ֆինանսավորող» բանկը Հայաստանում:

Ինչպես տեղեկացնում է ԱՐԱՐԱՏԲԱՆԿԻ լրատվական ծառայությունը, 2018թ.-ի «Առևտրի լավագույն ֆինանսավորող» բանկ պատվավոր մրցանակը ԱՐԱՐԱՏԲԱՆԿԻՆ շնորհվել է, հաշվի առնելով բանկում նորարարական թվային տեխնոլոգիաների  ներդրումը, իրականացված գործարքների ծավալը, ճշգրտությունն ու արագությունը, աշխարհագրական ընդգրկման շրջանակը, հաճախորդների սպասարկման բարձր մակարդակը:

Նշենք, որ հունվարի 17-ին  Լոնդոնում  կայացած “Ֆինանսների և առևտրի բանկային միության” /BAFT/ տասնմեկերորդ տարեկան ժողովի ժամանակ «Global Finance»-ը հայտարարել է տարբեր անվանակարգերում համաշխարհային մասշտաբով լավագույնը ճանաչված  94 երկրների  բանկերի անունները:  Ամենամյա մրցանակաբաշխության հաղթողների ընտրությունն իրականացրել են «Global Finance» ամսագրի խմբագիրներ, տնտեսական վերլուծաբաններ, բիզնեսի ղեկավարներ և անկախ փորձագետներ:

Ի դեպ, առևտրի ֆինանսավորման ոլորտում վերջին յոթ տարիների ընթացքում ԱՐԱՐԱՏԲԱՆԿԸ լավագույնն է ճանաչվում ևս երկու միջազգային հեղինակավոր կազմակերպությունների`  գերմանական Commerzbank AG-ի  և Վերակառուցման  և Զարգացման եվրոպական բանկի  /ՎԶԵԲ-ի/  կողմից:

Տեղեկանք.  «Global Finance Magazine»   ամսագիրը տպագրվում է 1987թ.-ից  և աշխարհի 180 երկրում ունի  ավելի քան  50 000  բաժանորդ: Ամսագրի թիրախային լսարանը  աշխարհի  խոշորագույն մասնավոր և պետական ֆինանսական կառույցների ղեկավարներն ու ներկայացուցիչներն են: Ամսագիրը վերլուծում է 192-ից ավել երկրների կարևորագույն ֆինանսական ցուցանիշները:  

Ըստ ԱրմԻնֆո գործակալության` Հայաստանի Բանկերի Էքսպրես-Ռենկինգի, ԱՐԱՐԱՏԲԱՆԿԻ վարկային պորտֆելը 2017-ին ավելացել է 13,6%, մինչեւ 119.2 մլրդ դրամ, կամ $ 246,2 մլն (բանկի ակտիվների 56.1% -ը): Արդյունքում ԱՐԱՐԱՏԲԱՆԿԻ ակտիվները հասել են 212.6 մլրդ դրամի կամ $ 439,2 մլն-ի, ընդհանուր պարտավորությունները կազմել են 177,3 մլրդ դրամ կամ $ 366,3 մլն, որոնց կառուցվածքում 49,2% կազմել են հաճախորդների ժամկետային և ցպահանջ ավանդները, իսկ 44.8%-ը`միջազգային ֆինանսական հաստատություններից ներգրաված միջոցները (տարեկան աճը`44,4%): Բանկի ընդհանուր կապիտալն աճել է 6,5%, մինչև 35.3 մլրդ դրամ ($ 72.9 մլն), կուտակված շահույթի 13.8% աճի հաշվին, մինչև 14.5 մլրդ դրամ: 2017 թվականը ԱՐԱՐԱՏԲԱՆԿԸ եզրափակել է 2.1 մլրդ դրամ ($ 4,3 մլն) զուտ շահույթով, ապահովելով այս ցուցանիշի 89.1% աճ:

Հիշեցնենք, որ ԱՐԱՐԱՏԲԱՆԿԸ գործում է 2005 թվականի նոյեմբերից: 2016 թվականի ավարտին կատարված էմիասիայի շնորհիվ Բանկի խոշորագույն բաժնետերն է «Ֆլեշ» ընկերությունը - 72.73%, այնուհետև հաջորդում են`ՎԶԵԲ - 18.14%, Rural Impulse Fund II - 8,58%, իսկ մնացած 0.55% -ը բաշխված է 82 մինորիտար բաժնետերերի միջև: ԱՐԱՐԱՏԲԱՆԿՆ ունի  54 մասնաճյուղ (4 տեղ), որից 27-ը`Երևանում, իսկ  26 - ը` մարզերում և 1-ը`ԼՂՀ-ում, իսկ Հայկական Զարգացման Բանկի հետ միավորման արդյունքում մասնաճյուղերի ընդհանուր թիվը հասավ 61-ի:-