Կարեն Կարապետյանը նշել է Հայաստանում փոքր ավիացիայի զարգացման կարևորությունը

Արմինֆո. Կառավարությունում տեղի ունեցած խորհրդակցության ընթացքում վարչապետ Կարեն Կարապետյանին ներկայացվել են ՀՀ կառավարությանն առընթեր քաղաքացիական ավիացիայի գլխավոր վարչության 2017 թ. գերակա խնդիրների կատարման և միջոցառումների իրականացման արդյունքները և 2018 թ. անելիքները:

Վարչության պետ Սերգեյ Ավետիսյանը զեկուցել է, որ նախորդ տարվա համար նախատեսված բոլոր գերակա ծրագրերն ու միջոցառումները իրականացվել են: 2017թ. դեկտեմբերի 7-ից ներդրվել է Հայաստանի Հանրապետության օդային տարածքում 9 հազար 5 հարյուր մետրից բարձր ժամը 00:00-ից մինչև 06:00-ն «Օդային մայրուղիներից ազատ օդային տարածքե (Free Route Airspace) հայեցակարգը: «ԵՎՐԱԿՈՆՏՐՈԼե կազմակերպության ցանցային կառավարչի հետ քննարկվել են հայեցակարգի ներդրման խնդիրները և տրվել են համապատասխան լուծումներ: Համաձայն փաստաղթղթի՝ ավիաընկերությունները հնարավորություն կունենան ՀՀ օդային տարածք մուտք գործել յուրաքանչյուր սահմանված կետից և չվերթն իրականացնել ազատորեն ընտրված երթուղով, ինչն, ըստ Ավետիսյանի, կարող է կրճատել չվերթների իրականացման ծախսերը՝ էապես նվազեցնելով վառելիքի ծախսը: Պարզեցվել և արդիականացվել է տեղական և օտարերկրյա ավիաընկերություններին օդային հաղորդակցությունների իրականացման համար թույլտվությունների տրամադրման գործընթացը․ կրճատվել են նախկինում պահանջվող փաստաթղթերի ցանկը և թույլտվությունների տրամադրման ժամկետները, ինչպես նաև ներդրվել է մեկ պատուհանի սկզբունքը: Վարչությունն ավիաընկերությունների համար բիզնես միջավայրի բարելավման և ընթացակարգերի պարզեցման նպատակով նախաձեռնել է հայտերի ներկայացման առցանց համակարգի ներդրում: Համակարգի ներդրման նպատակով հայտարարված մրցույթում հաղթող ճանաչված ընկերության հետ արդեն իսկ մեկնարկել են հայտերի ներկայացման առցանց համակարգի ծրագրային ապահովման մշակման աշխատանքերը: «Զվարթնոցե օդանավակայանում նոր մուտք գործող ավիաընկերությունների համար իրականացվում է սակագնային ճկուն զեղչային քաղաքականություն:

«Մենք պետք է հասկանանք, թե որոնք են մեր թույլ տեղերը և ինչ պետք է շտկենք, որպեսզի կարողանանք ուղևորահոսքն էլ ավելի մեծացնել: Թիվ մեկ խնդիրը, որին մեր ջանքերը պետք է ուղղենք՝ թռիչքների աշխարհագրությունը մեծացնելն է: Երկրորդ, մենք պետք է գնահատենք քայլերը, որպեսզի կարողանանք բյուջետային ավիաընկերություններ ներգրավել: Երբ մակրո առումով հասկանանք մեր խնդրահարույց տեղերը և դրանց վրա աշխատենք՝ բերելու ենք նրան, որ մեծանալու է աշխահագրությունը, ավիաչվերթերն ավելի հաջողակ են լինելու և այլնե,- ընդգծել է Կարեն Կարապետյանը:

Կառավարության ղեկավարն անհրաժեշտ համարել փոքր ավիացիայի զարգացումը և հատկապես կարևորել դեպի Մեղրի ավիաչվերթերի գործարկումը՝ հաշվի առնելով ազատ տնտեսական գոտու առկայությունը: «Մենք մի քանի կետերով և ուղղություններով պետք է ունենանք փոքր ավիացիայի զարգացման ծրագիրե,- ասել է վարչապետը:

Սերգեյ Ավետիսյանը զեկուցել է, որ փոքր ավիացիայի հետ կապված արդեն իսկ ուսումնասիրություններ են իրականացվել թիրախավորված օդանավակայանների պայմանները գնահատելու և կոնկրետ հաշվարկներ կատարելու համար: Բացի այդ, վարչությունն աշխատում է մասնավոր գործընկերների հետ՝ հնարավոր համագործակցություն ծավալելու նպատակով:

Վարչապետ Կարապետյանը կարևորել է նաև տարբեր միջազգային ավիաընկերությունների կողմից Երևանը որպես տրանզիտային ուղղություն զարգացնելուն միտված քայլերը և տվել հստակ հանձնարարկաններ: Կառավարության ղեկավարը հանձնարարել է նաև հստակ ձևակերպել ավիաչվերթերի ընդլայնման, ուղևորահոսքերի ավելացման, բյուջետային ավիաընկեությունների ներգրավման, փոքր ավիացիայի զարգացման ուղղություններով 2018 թվականի ծրագիրն ու թիրախները

Հիշեցնենք, որ դեռ 2017 թ. սեպտեմբերին ՀՀ ՔԱԳՎ ղեկավար Սերգեյ Ավետիսյանը, պատասխանելով ԱրմԻնֆո-ի թղթակցի հարցին, նշել էր, որ

Հայաստանի Քաղաքացիական ավիացիայի գլխավոր վարչությունը (ՔԱԳՎ) մշակում է երկրում փոքր ավիացիայի վերականգնման հայեցակարգը: Նա նշել էր, որ ներկայումս վարչությունը գույքագրում է իրականացնում խորհրդային տարիներին գործող որոշ տարածքային օդանավակայաններում՝ նպատակ ունենալով բացահայտել դրանց իրական վիճակը, գնահատել հնարավոր ներդրումները և արդյունավետության մակարդակը դրանց գործարկման դեպքում:

«Մենք գտնում ենք, որ Հայաստանի փոքր ավիացիան ունի ապագա, բայց դրա զարգացման աստիճանը կախված կլինի այդ ծառայությունների շուկայական պահանջարկից: Մեր գործն այսօր ոլորտին իրական գնահատական տալն է, կատարել նախնական ներդրումային հաշվարկներ և ցույց տալ դրա հետագա զարգացման հնարավոր սցենարները: Մի խոսքով, առայժմ մենք մտադիր ենք ստեղծել հիմքերը, նախադրյալները, իսկ հետագա քայլերն ամբողջությամբ կախված կլինեն պահանջարկից, քանի որ տարածաշրջանային օդանավակայանների վերականգնումը պետք է արդյունավետ լինի այն ընկերություններին, որոնք ապագայում պետք է դրանք շահագործեն և կազմակերպեն չվերթներե, - ընդգծել էր ՔԱԳՎ ղեկավարը:Նա նշել էր, որ հայեցակարգի պատրաստման բարդությունը կայանում է նրանում, որ փոքր ավիացիայի վերականգնման գործընթացը պետք է սկսվի գրեթե զրոյից: Հետևաբար, նախևառաջ անհրաժեշտ է դրան մոտենալ աշխարհագրական դիրքի տեսանկյունից: «Օդանավակայանը Գյումրիում արդեն գործում է, որտեղ արդեն ներդրվել է 2 մլն.դոլար, երկրի հարավ-արևելքում, Կապանում, գտնվող օդանավակայանում արդեն սկսվել են շինարարական աշխատանքները: Հյուրանոցային պահանջարկ կա Ջերմուկի և Ստեփանավանի օդանավակայանների վերականգնման համար», - ընդգծել էր Ավետիսյանը: Նրա խոսքերով, դեռ վաղ է խոսել այն մասին, թե ինչ սխեմաները կօգտագործվեն փոքր օդանավակայաններում, և ով կլինի այդ շուկայի մասնակիցը, բայց աշխատանքների մեկնարկով արդեն զգացվում է որոշակի ներդրումային հետաքրքրությունը: