Իրանը Հայաստանի հետ ակտիվ համագործակցություն է ծավալել էներգետիկայի ոլորտում

Արմինֆո. Իրանը Հայաստանի հետ ակտիվ համագործակցություն է ծավալել էներգտիկայի ոլորտում: Փետրվարի 12-ին լրագրողների հետ զրույցում այդ մասին հայտարարել է Հայաստանում Իրանի դեսպան Սեյեդ Քյազեմ Սաջադին:

Նրա ասելով, ոչ այնքան վաղուց երկարաձգվել է միջկառավարական համաձայնագիրը, որով կշարունակվի «Գազ էլեկտրաէներգիայի դիմաց՚ ծրագիրը, և որի շրջանակում, աշխատանք է ընթանում Իրան-Հայաստան երրորդ ԷՀԳ կառուցման նախագծի իրագործման ուղղությամբ: «Մոտ ապագայում մենք կդառնանք այդ իրադարձության ականատես՚, - ասել է դիվանագետը, հիշեցնելով, որ եղած պայմանավորվածության համաձայն, Իրանը մատակարարվող գազի դիմաց կստնա էլեկտրաէներգիա: Բացի այդ, շարունակել է դեսպանը, Իրանը մտադիր է Հայաստանի հետ համագործակցություն ծավալել գազի սվոփ-մատակարարումների գծով; «Եթե Հայաստանին հաջողվի գազ ձեռք բերել հարևան պետություններից, մենք պատրաստ ենք տրամադրել մեր ծառայությունները՚, - ասել է դիվանագետը: Նա հաղորդել է, որ իրանական կողմը միշտ հայտարարում է Հայաստան իր գազի արտահանման ծավալներն ավելացնելու պատրաստակամության մասին: «Այդ հարցը քննարկվում է, և ես ակնկալում եմ, որ առաջիկայում զգալի առաջընթաց ձեռք կբերվի այդ նախագծի առնչությամբ: Եթե Հայաստանը էներգետիկ ոլորտում փոքր-ինչ ակտիվանա, ապա, կարծում եմ, զգալի քայլեր կձեռնարկվեն, և դա թույլ կտա Հայաստանում ստեղծել նոր աշխատատեղեր՚, - նշել է Սեյեդ Քյազեմ Սաջադին:

Հիշեցնենք, որ 2015 թվականի օգոստոսի 9-ին Թեհրանում Իրանն ու Հայաստանը նոր համաձայնագիր էին ստորագրել երրորդ բարձրավոլտ ԷՀԳ կառուցման շուրջ: Ըստ համաձայնագրի, իրանական կողմը` ի դեմս EDBI, 90,5 մլն դոլար կտրամադրի նախագծի ֆինանսավորման 117,6 մլն դոլար  ընդհանուր գումարից: Պայմանավորվածություն էր ձեռք բերվել 2019 թվականին շինարարական աշխատանքների ավարտի շուրջ: ԷՀԳ շահագործումից հետո Հայաստանի և Իրանի միջև էլեկտրաէներգիայի փոխանակումը  ներկայիս 300 ՄՎտ-ից կավելանա մինչև 1000 ՄՎտ: Նոր ԷՀԳ նաև կբարձրացնի Կովկասի տարածաշրջանի երկրների էլեկտրաէներգիայի փոխանակման հնարավորությունները: Հայ-իրանական երրորդ ԷՀԳ շահագործումից կշահեն Վրաստանը, Ռուսաստանն ու Թուրքիան: Իրանական էլեկտրաբաշխիչ ցանցը հնարավորություն կստանա Հայաստանի և Վրաստանի համապատասխան ենթակառուցվածքների  միջոցով ամրակցվել Ռուսաստանի և Թուրքիայի էներգահամակարգերի հետ:

Հիշեցնենք, որ ավելի վաղ նախագծի ընդհանուր արժեքը կազմում էր 107,9 մլն եվրո, որը վարկի տեսքով  պետք է տրամադրեր Իրանը: Պայմանագրի համաձայն, ԷՀԳ շինարարությունը պետք է ավարտվեր 18 ամսում` ֆինանսավորումն սկսելու պահից սկսած: Սակայն Իրանի նկատմամբ սահմանված պատժամիջոցների պատճառով   նախագծի իրագործման ժամկետները մշտապես հետաձգվում էին: