Հայբիզնեսբանկի դոլարային պարտատոմսերը ցուցակվել են ՆԱՍԴԱՔ ՕԷՄԷՔՍ Արմենիա բորսայում

Արմինֆո. 2018թ.-ի փետրվարի 27-ին «Հայբիզնեսբանկ» ՓԲԸ-ի ԱՄՆ դոլարով արտահայտված արժեկտրոնային պարտատոմսերը ցուցակվել են ՆԱՍԴԱՔ ՕԷՄԷՔՍ Արմենիայի պարտատոմսերի երկրորդային (Bbond) ցուցակում, ինչպես նաև ցուցակման պահից թույլատրվել են նշված պարտատոմսերով հասցեական առևտուրը և ռեպո գործարքների կնքումը: 

Ինչպես ԱրմԻնֆո-ին հաղորդեցին բորսայի մամուլի ծառայությունից, ընկերության պարտատոմսերի այս թողարկումը ներառում է 51,000 հատ անվանական, արժեկտրոնային պարտատոմս` 100 ԱՄՆ դոլար անվանական արժեքով, արժեկտրոնի 8% տոկոսադրույքով և 48 ամիս շրջանառության ժամկետով: Պարտատոմսերը (ISIN - AMARBBB25ER7) բորսայում կշրջանառվեն ARBBB5 բորսայական հապավմամբ:

Նշենք, որ փետրվարի 27-ի դրությամբ բորսայում գնանշվում են Հայբիզնեսբանկի կորպորատիվ պարտատոմսերի 4 տրանշ, որոնցից երեքը դոլարային` 23.3 մլն դոլար ծավալի, և մեկը դրամային` 100 մլն դրամ ծավալի: Մասնավորապես, 2017 հունվարի 23-ին բանկը թողարկել է դոլարային և դրամային պարտատոմսերի մեկական տրանշ, այնուհետև դեկտեմբերի 5-ին հերթական դոլարային տրանշը, իսկ 2018 թվականի փետրվարաի 6-ին կայացել է ևս մեկ դոլարային տրանշի թողարկում: Հայբիզնեսբանկի պարտատոմսերի դոլարային թողարկումները ներառվել են բորսայի Bbond ցուցակում, իսկ դրամայինները` Cbond ցուցակում: Դոլարային պարտատոմսերի կտրոնային առաջին թողարկման եկամտաբերությունը կազմել է 8,5%, երկրորդ դոլարային տրանշի դեպքում այն նվազել է  մինչև 7,5%, իսկ արդեն երրորդ դոլարային թողարկման դեպքում բարձրացել է մինչև 8%, իսկ դրամային տրանշի դեպքում  կտրոնի  եկամտաբերությունը կազմել է 14%. Առաջինից մինչև երրորդ թողարկման դոլարային պարտատոմսերի  շրջանառության ժամկետը ավելացել է 2 տարուց մինչև 4 տարի, իսկ դրամայիններինը սահմանվել է 2 տարի: Այդ թողարկումների պարտատոմսերի մարումը նախատեսվում է 2019-2022թթ:

Հավելենք, 2018 թվականի փետրվարի 27-ի դրությամբ ՆԱՍԴԱՔ ՕԷՄԷՔՍ Արմենիա բորսայում, ընդհանուր առմամբ,  (տվյալ թողարկման հետ միասին) շրջանառվում են 14 թողարկողների 52 թողարկումներ, որից 41-ը թողարկել են 10 բանկեր. Ամերիաբանկը և Արարատբանկը (8-ական թողարկում), Արմսվիսբանկը (6), Անելիք Բանկը (5), Հայբիզնեսբանկը (4), Յունիբանկը  և Կոնվերս բանկը (3-ական), ԱԿԲԱ-Կրեդիտ Ագրիկոլ Բանկ և Սևծովյան բանկ` մեկական թողարկում: Շրջանառվող պարտատոմսերի ընդհանուր ծավալներում դոլարային թողարկումները կազմել են 32, որից 28-ը` 10 բանկերի կողմից` Արարատբանկ (6), Ամերիաբանկ (5), Արմսվիսբանկ (4), Անելիք Բանկ (4), Հայբիզնեսբանկ (3) և Յունիբանկ (2),  Կոնվերս Բանկ (2) և ԱԿԲԱ-Կրեդիտ Ագրիկոլ Բանկ և Հայէկոնոմբանկ` մեկական թողարկում: Բացի այդ, բորսայում շրջանառվում են եվրոյով 2 տրանշները` Ամերիաբանկից և Արմսվիսբանկից: Բորսայում շրջանառվում են նաև Ազգային հիփոթեքային ընկերության 3 դրամային թողարկումները, ինչպես նաև «Գլոբալ Կրեդիտ» ՈՒՎԿ-ն 4 թողարկումներ (2 դոլարային և 2 դրամային), «Ֆինքա» և Առաջին հիփոթեքային ընկերություն ՈՒՎԿ-ների 2-ական թողարկումները (1-ական դոլարային և 1-ական դրամային):

Հիշեցնենք, որ  «Հայբիզնեսբանկ» ՓԲԸ -ն հիմնադրվել է 1991 թ., որպես «Արմինվեստբանկ» փայատիրական բանկ: 2006 թ. վերանվանվել է «Հայբիզնեսբանկ» ՓԲԸ -ի: Հայբիզնեսբանկը 2009թ.-ի փետրվարի 27-ից հանդիսանում է ՆԱՍԴԱՔ ՕԷՄԷՔՍ Արմենիայի անդամ: Բանկը նաև դեպոզիտար համակարգի և կենսաթոշակային համակարգի հաշվի օպերատոր է, ինչպես նաև կարգավորվող շուկայի հաշվարկային համակարգի անդամ: Որպես բանկի միանձնյա սեփականատեր հանդես է գալիս Վիտալի Գրիգորյանցը: Հայբիզնեսբանկը առաջատար եռյակում է ըստ ակտիվների, վարկային ներդրումների (այդ թվում` ըստ տնտեսության վարկավորման), պարտավորությունների (այդ թվում` ցպահանջ և ժամկետային ավանդների): Մասնաճյուղերի ցանցի ընդգրկմամբ բանկը առաջատար հնգյակում է, ունի 53 ստորաբաժանում, որոնցից 24-ը Երևանում է, 22-ը` մարզերում, և 7-ը` ԼՂՀ-ում: