Վ.Ավետիսյան. Հայաստանի ֆինանսական հաշտարարի գրասենյակի կողմից ԱՊՊԱ գծով ստացվող բողոքներն աստիճանաբար կնվազեն

Արմինֆո. Հայաստանի ֆինանսական հաշտարարի գրասենյակի կողմից ԱՊՊԱ գծով ստացվող բողոքներն աստիճանաբար կնվազեն, գտնում է Հայաստանի Ավտոապահովագրողների բյուրոյի գործադիր տնօրեն Վահան Ավետիսյանը: Այս մասին նա նշել է մարտի 30-ին կայացած մամուլի ասուլիսում:

«Վերջերս ֆինանսական հաշտատարի հետ մենք պարզեցինք ԱՊՊԱ գծով բողոքների վիճակագրությունը: Եթե նախկինում տարեկան արձանագրվում էր 20-30% աճ, ապա վերջին տարիների համար առաջին անգամ տեմպերն սկսեցին դանդաղել: Կարծում եմ, որ այդ միտումը կշարունակվի նաև ապագայում», - ասել է նա:

Նրա կարծիքով, պատճառը, որ ֆինհաշտարարի գրասենյակի կողմից ստացվող բողոքների ճնշող մեծամասնությունը կազմում են հատկապես ԱՊՊԱ գծով բողոքները, պայմանավորված է զսպող մեխանիզմների բացակայությամբ: «Օրինակ, Բյուրոյում կրկնակի փորձաքննության արժեքը նախկինում կազմում էր 25 հազար դրամ, որը մենք իջեցրել ենք մինչև 5-15 հազար դրամ: Բայց ենթադրում ենք, որ այդ ծառայության դիմաց պետք է վճարվի որևէ փոքր գումար, որպեսզի մարդիկ գիտակցորեն մոտենան հարցին. «արդյոք անհրաժեշտ է կրկնակի փորձաքննությունը»: Եթե չկան որևէ զսպող լծակներ, մարդիկ տեղին թե անտեղի կդիմեն ֆինանսական հաշտարարին, քանի որ ոչինչ չեն կորրցնում, ամկախ արդյունքից», - ասել է Ավետիսյանը:

Ըստ ՀՀ ֆինհաշտարարի գրասենյակի տվյալների, 2017 թվականին ֆինանսական կազմակերպությունների դեմ ստացվել է 4368 բողոք, որից 1358-ը`ապահովագրական ընկերությունների դեմ (80%-ը`ԱՊՊԱ գծով), 270 –ը`բանկերի դեմ, 15-ը` Ավտոպահովագրողների բյուրոյի դեմ, 22-ը`վարկային ընկերությունների, 7-ը`այլ կազմակերպությունների դեմ: