«Նոյյան Տապան» թղթադրամն արժանացել է «Տարվա լավագույն տարածաշրջանային թղթադրամը» մրցանակին

Արմինֆո. Հայաստանի Հանրապետության առաջին հավաքորդական «Նոյյան Տապան» թղթադրամը, որը շրջանառության մեջ է դրվել 2017 թ. նոյեմբերի 22-ին, ՀՀ ազգային դրամի 24-րդ տարեդարձի կապակցությամբ, 2018 թ. փետրվարին Վարշավայում (Լեհաստան) անցկացված «High Security Printing EMEA (Europe, Middle East, Africa)» կոնֆերանսին արժանացել է «Տարվա լավագույն տարածաշրջանային թղթադրամը» (“The Best Regional Banknote of the Year”) մրցանակին:

Ինչպես տեղեկացրել է ՀՀ ԿԲ մամուլի ծառայությունը, մրցանակը շնորհվել է կոնֆերանսի կազմակերպիչ «Reconnaissance International» կազմակերպության կողմից: Վերջինիս գործունեությունը ներառում է պաշտպանված տպագրության ոլորտը լուսաբանող 5 տեսակի ամսագրերի՝ ներառյալ «Currency News» ամսագրի հրատարակումը, միջազգային սեմինարների և կոնֆերանսների կազմակերպումը, հատուկ տեղեկատուների և հաշվետվությունների կազմումը, ինչպես նաև ռազմավարական խորհրդատվության տրամադրումը կառավարություններին և գործարարներին:

«Տարվա լավագույն տարածաշրջանային թղթադրամը» ամենամյա մրցույթին մասնակցելու համար ոլորտի կազմակերպություններն ընտրում և առաջարկում են տվյալ տարվա ընթացքում թողարկված թղթադրամներ, որոնցից կազմվում է մրցույթի մասնակից թղթադրամների վերջնական ցանկը: Մրցույթի ժյուրին կազմված է «Reconnaissance International» կազմակերպության տնօրենների խորհրդի անդամներից, կոնֆերանսի կազմակերպիչներից և “ID & Secure Document News” և “Currency News” պարբերականների հրատարակիչներից:   

Բացի «Նոյյան տապան» 500 դրամ անվանական արժեքով ՀՀ հավաքորդական թղթադրամից, մրցույթին մասնակցել են Իսրայելի, Վրաստանի, Շվեյցարիայի, Ղրղզստանի, Ռուսաստանի, Շոտլանդիայի, Շոտլանդիայի, Անգլիայի, Հունգարիայի, Լեհաստանի, Նորվեգիայի թղթադրամները:

«Տարվա լավագույն տարածաշրջանային թղթադրամը» մրցանակը շնորհվում է այն թղթադրամին կամ թղթադրամների շարքին, որոնցում համատեղված են գեղեցիկ դիզայնը, տեխնիկական հագեցվածությունն ու պաշտպանվածությունը: Թղթադրամների գնահատման հիմնական չափորոշիչներ են հանդիսանում գեղարվեստական մոտեցումը, ժամանակակից տեխնոլոգիաների կիրառումը և բարձրաստիճան պաշտպանվածությունը՝ միաժամանակ մեծ կարևորություն տալով թողարկող երկրի մշակութային ժառանգության ներկայացմանը, ինչպես նաև ընդհանուր դիզայնի ու դրանում օգտագործված խորհրդանշական տարրերի անմիջական կապվածությանը թողարկող երկրի հետ:

Հիշեցնենք, որ Հայաստանի ազգային արժույթի`դրամի 24-րդ տարելիցի կապակցությամբ ՀՀ Կենտրոնական բանկը ներկայացրեց «Նոյյան տապան» 500 դրամ անվանական արժեքով ՀՀ հավաքորդական թղթադրամը և երրորդ սերնդի Էսքիզների նախագիծը, որոնք շրջանառույան  մեջ կմտնեն 2018 թվականի նոյեմբերի 22-ից: 500 դրամանոց թղթադրամները թողարկվել են 300 հազար տպաքանակով, HybridT բարձրորակն հումքի վրա և կազմված է երեք շերտից, իսկ չափերը կազմում են` 140 մմ և 76 մմ: Թղթադրամը հագեցած է պաշտպանական առաջադեմ աստիճաններով, որոնք կօգտագործվեն երրորդ սերնդի համար: Երրորդ սերնդի փողերն են`1,000 դրամ, 2000 դրամ, 5000 դրամ, 10000 դրամ, 20000 դրամ և 50000 դրամ անվանական արժեքով թղթադրամները: