ՀՀ կառավարությունը մտադիր է չինական ընկերության կողմից վարկային միջոցների օգտագործման արդյունավետության ստուգումներ անցկացնել

Արմինֆո. ՀՀ կառավարությունը մտադիր է «Հյուսիս-Հարավ» տրանսպորտային միջանցքի մաս հանդիսացող Թալին-Լանջիկ ճանապարհահատվածի շինարարության ընթացքում վարկային միջոցների օգտագործման արդյունավետության ստուգումներ անցկացնել: Այդ մասի հունիսի 1-ին կառավարության նիստի ընթացքում հայտարարել է փոխվարչապետ Տիգրան Ավինյանը:

Նրա խոսքով, խնդիրները կապված են «Սինոհիդրո Քորփորեյշն» չինական ընկերության կողմից աշխատանքների անորակ կատարման հետ: «Լավագույն ելքը կլիներ այդ ընկերության հետ պայմանագրի խզումը, բայց այդ քայլը խնդիրը չի լուծի»,-նշել է փոխվարչապետը՝ ավելացնելով, որ «Սինոհիդրո Քորփորեյշնի» գործողություններում առկա են նաև կոռուպցիոն ռիսկեր, ինչին անհրաժեշտ է հատուկ ուշադրություն դարձնել ուսումնասիրման ընթացքում:

ՀՀ վարչապետ Նիկոլ Փաշինյանն իր հերթին կոչ է արել մեծ ուշադրություն դարձնել ավտոմոբիլային ճանապարհների կառուցման որակին: Նրա խոսքով, այդ հարցի լուծումն անմիջականորեն կապված է նաև զբոսաշրջության զարգացման հետ, այդ թվում՝ իրանցի զբոսաշրջիների Հայաստանի ներհոսքի: «Անհրաժեշտ է առավելագույնս արագ և արդյունավետ լուծել այդ ոլորտում ծագած բոլոր խնդիրները»,- նշել է վարչապետը:

Նշենք, որ Թալին-Լանջիկ հատվածում շինարարական աշխատանքներ իրականացնող «Սինոհիդրո Քորփորեյշն» չինական ընկերությունն իր պատասխանատվությամբ, առանց կատարված աշխատանքների որակի թեստավորման, իրականացրել է ճանապարհի 1200մ բետոնապատում, այն դեպքում, երբ որպես թեստային փորձանմուշ անհրաժեշտ էր բետոնապատել 300մ ճանապարհահատված։ Այս առնչությամբ ՀՀ տրանսպորտի, կապի և տեղեկատվական տեխնոլոգիաների նախարարությունը պահանջել է չշարունակել բետոնապատման աշխատանքները մինչև որակի լաբորատոր փորձաքննության արդյունքները: Եթե որակի լաբորատոր փորձաքննության արդյունքները չհամապատասխանեն սահմանված չափորոշիչներին, չինական ընկերությունը պետք է քանդի և նոր, որակով բետոնապատում իրականացնի։

Ինչպես ավելի վաղ հայտնել էր ԱրմԻնֆո-ն, 2018 թվականին «Հյուսիս-Հարավ՚ փոխադրամիջանցքի կառուցման ծրագրի շարունակմանը 47 մլն դոլար կուղղորդվի: Այդ միջոցները կներգրավվեն Ասիական զարգացման բանկից, Երոպական ներդրումային բանկից և Եվրասիական զարգացման բանկից` վարկային ռեսուրսների տեսքով, ևս 2,8 մլն դրամ նախատեսվում է ստանալ դրամաշնորհի տեսքով` Եվրոպական ներդրումային բանկից: Աշխատանքների հիմնական ճակատը հաջորդ տարի կծավալվի 84 կմ ավտոճանապարհին, որտեղ նախատեսվում է փռել 40-45 կմ բետոն: Աշխատանքները, մասնավորապես, կանցկացվեն Աշտարակից մինչև Գյումրի ատվոճանապարհին:

Հավելենք, որ շինարարության ընդհանուր արժեքը նախկինում գնահատվում էր 960 մլն դոլար, որն այնուհետև աճեց մինչև 1,5 մլրդ դոլար, այժմ` ավելի քան 2 մլրդ դոլար:  556 կիլոմետր ընդհանուր երկարություն ունեցող ՙՀյուսիս–Հարավ՚ միջանցքը ելք կապահովի դեպի Սև ծով և եվրոպական երկրներ Հայաստանի (Մեղրի–Կապան–Գորիս–Երևան–Աշտարակ–Գյումրի–Բավրա) և Վրաստանի տարածքներով։ Ներդրումային ծրագիրը նպատակաուղղված է Հայաստանի հյուսիսի (Վրաստանի հետ սահմանում) և հարավի (Իրանի հետ սահմանում) կապի ապահովմանը տրանսպորտային այնպիսի հաղորդակցությունների միջոցով, որոնք բավարարում են միջազգային բարձր չափանիշներն ու ելք են ապահովում դեպի համաշխարհային շուկաներ։ Ավտոճանապարհը կունենա բետոնե ծածկույթ: Նախագծի իրագործման համար Հայաստանը 500 մլն դոլարի վարկ է ներգրավել Ասիական զարգացման բանկից: Եվս 150 մլն դոլար կտրամադրի Եվրասիական զարգացման բանկը: Հայկական կողմը նախագծի իրացման համար նաև 60 մլն դոլար է ներգրավել Եվրոպական ներրդումային բանկից: Միջանցքի շինարարությունը նախատեսվում է լիովին ավարտել 2019 թվականին: ՙՀյուսիս-Հարավ՚ ծագրի առնչությամբ Հայաստանի կառավարությունը հաշվարկել է 2,5 դոլարի խնայողություն յուրաքանչյուր ուղևորի մեկ ժամվա երթևեկության և 1-ական դոլարի խնայողություն 1 տոննա բեռի փոխադրման 1 ժամվա համար: Ինչպես ակնկալում են Հայաստանի իշխանությունները, ծրագիրը թույլ կտա  ապագայում մեղմել Ադրբեջանի և Թուրքիայի կողմից շրջափակման հետևանքները, ստանձնել տարանցիկ  պետության դեր տարածաշրջանի երկրների բեռանփոխադրումներում, ինչպես նաև միանալ Սևծովյան օղակաձև ավտոմայրուղուն: