ՀՀ տնտեսական զարգացման և ներդրումների նախարարն ընդունել է Bitfury տեխնոլոգիական ընկերության ներկայացուցիչներին

Արմինֆո. ՀՀ տնտեսական զարգացման և ներդրումների նախարար Արծվիկ Մինասյանը հանդիպում է ունեցել Bitfury տեխնոլոգիական ընկերության ներկայացուցիչների հետ։

Ինչպես տեղեկացրել է նախարարության մամուլի ծառայությունը, հանդիպումը նախաձեռնել էր «Հայաստանի իրավազորություն» հիմնադրամը՝ ներկայացնելու «Ներածություն ապակենտրոնացված ռեգիստրի /բլոկչեյն/ տեխնոլոգիայի մասին» խորհրդատվական-կրթական ծրագիրը, որը նախատեսված է համապատասխան քաղաքացիական ծառայողների համար և իրականացվելու է այդ ոլորտում լուծումների մշակման և կիրառման գործնական փորձ ունեցող միջազգային փորձագետների մասնակցությամբ։

Հանդիպման մասնակիցներին ներկայացվել են պետական կառավարման և բիզնեսի ոլորտում բլոկչեյն տեխնոլոգիաների ներդրման առավելությունները և մի շարք երկրներում Bitfury ընկերության իրականացրած գործնական նախագծերը։ Անդրադարձ է եղել թափանցիկության հասնելու բլոկչեյն տեխնոլոգիաների հիմնական առավելություններին, տվյալների անվտանգությանը, տեխնոլոգիական առանձնահատկություններին, տարբեր ոլորտներում նոր տեխնոլոգիաների ներդրման հնարավորություններին։ 

Նշենք, որ Bitfury- ն բազմակողմանի բլոկչեյն-ընկերություն է, որը հիմնադրվել է 2011 թվականին: Սա Չինաստանից դուրս գտնվող խոշորագույն արդյունաբերական մայներն է «Բիթքոին» բլոկչեյնի ծրագրային ապահովման ոլորտում: Ընկերության գրասենյակները տեղակայված են Սան Ֆրանցիսկոյում, Վաշինգտոնում, Հոնկոնգում, Լոնդոնում և Ամստերդամում, իսկ տվյալների կենտրոնները` իսլանդական Ռեյկյանեսբայրում և Վրաստանում` Թբիլիսի և Գորի քաղաքներում: