Հայաստանը նախատեսում է մասնավոր տաքսիների վարորդներին ազատել բոլոր տեսակի հարկերից

Արմինֆո.Հայաստանի կառավարությունը մտադիր է մասնավոր տաքսիների վարորդներին ազատել բոլոր տեսակի հարկերից: Այդ մասին վարչապետ Նիկոլ Փաշինյանը հայտաարել է նախօրեին «Ֆեյսբուքի՚ իր էջում ուղիղ եթերից:

Վարչապետի ասելով, հարցը քննարկվում է Հարկային օրենսգրքի բարեփոխումների շրջանակում: «Դա շատ կարևոր որոշում է և ունի սոցիալական նշանակություն: Ըստ մեր դիտարկումների, բազմաթիվ մարդիկ, ովքեր աշխատանք ունեն, այդ թվում` պետական հաստատություններում և մասնավոր կազմակերպություններում, իրենց ընտանիքների սոցիալական խնդիրները լուծում են` զբաղվելով մասնավոր փոխադրումներով՚, - նշել է կառավարության ղեկավարը: Դա, վարչապետի համոզմամբ, յուրօրինակ աջակցություն կլինի այդ մարդկանց:

Ընդ որում, Փաշինյանը կարևորել է փոխադրումների անվտանգությունը: Կառավարությունը կփորձի հարցը լուծել մեքենաների տեխսպասարկման որակի բարձրացման ճանապարհով: «Տվյալ փուլում, ինչպես հայտնի է, ավտոմեքենաների տեխսպասարկումը պատշաճ մակարդակով չի իրականցվում և, ավելի շուտ, ձևական բնույթ է կրում, և մենք հնարավորինը կանենք, որպեսզի այդ գործընթացը նպատակաուղղվի տրանսպորտային փոխադրումների անվտանգության մակարդակի բարձրացմանը՚, - հայտարարել է նա:

Միևնույն ժամանակ, վարչապետն ակնկալում է, որ ազատվելով հարկերից, մասնավոր տաքսիների վարորդները կարող են նվազեցնել սակագները: Այդ որոշումը նաև թույլ կտա լուծել քաղաքային տրանսպորտի ծանրաբեռնվածությանն առնչվող շատ խնդիներ: