ՀՀ մարդու իրավունքների պաշտպանն առաջարկներ է ներկայացրել «Մատչելի բնակարան զինծառայողներին՚ ծրագրի վարկավորման կարգի և պայմանների վերաբերյալ

Արմինֆո. Մարդու իրավունքների պաշտպանի աշխատակազմը ներկայացրել է կարծիք՝ «Մատչելի բնակարան զինծառայողներին» պետական աջակցության նպատակային ծրագիրը հաստատելու և սպայական կազմի զինծառայողների կողմից բնակարան կամ բնակելի տուն ձեռք բերելու նպատակով մատչելի և արտոնյալ պայմաններով երկարաժամկետ հիփոթեքային վարկավորման կարգը և պայմանները սահմանելու մասին» ՀՀ կառավարության որոշման նախագծի վերաբերյալ:

Ինչպես ԱրմԻնֆո-ին հաղորդեցին ՄԻՊ գրասենյակից, նախագծով սահմանվում են սպայական կազմի զինծառա­յողների կողմից բնակարան կամ բնակելի տուն ձեռք բերելու նպատակով մատչելի և արտոնյալ պայմաններով երկարաժամկետ հիփոթեքային վարկա­վոր­ման կարգը և պայմանները:

Մարդու իրավունքների պաշտպանն առաջարկել է նախատեսել, որ անօրինական կերպով ծառայությունից արձակված զինծառայողը ծառայության վերականգնման դեպքում շարունակի օգտվել պետության կողմից վարկի տոկոսի սուբսիդավորման և եկամտահարկի վերադարձման պայմաններից: Առաջարկվել է նաև հստակեցնել պետության կողմից վարկի սուբսիդավորման չափը, ինչպես նաև դիմում-հայտի համար ներկայացվող պահանջները:

Ավելի վաղ Հայաստանի պաշտպանության նախարարությունը քննարկման էր ներկայացրել «Մատչելի բնակարան զինծառայողներին» պետական աջակցության նպատակային ծրագիրը, որի համաձայն, Հայաստանի ԶՈՒ գործող սպաները հնարավորություն կունենան ձեռք բերելու կամ կառուցելու բնակարաններ`արտոնյալ պայմաններով երկարաժամկետ հիփոթեքի միջոցով։ Համաձայն ներկայացված ծրագրի, զինծառայողները կկարողանան կառուցապատողներից բնակարաններ կամ բնակելի տներ ձեռք բերել կամ կառուցել 20 տարի ժամկետով հիպոտեկային արտոնյալ վարկավորման ծրագրից առավելագույնը 9% տարեկան տոկոսադրույքով։

Միաժամանակ պետությունը կսուբսիդավորի տոկոսադրույքի 4 տոկոսը, իսկ մյուս 5 տոկոսը կվճարեն վարկառուները եկամտահարկից։ Բացի այդ, ծրագրով նախատեսվում է բնակարանի արժեքի նախավճարի 10 տոկոսի սուբսիդավորում։ Ծրագրի շրջանակում բնակարանի ձեռքբերման կամ կառուցման համար առավելագույն գումարը կազմում է 28 500 000 դրամ։ Ծրագրի շահառուներ տարեկան կարող են դառնալ Հայաստանի պաշտպանության նախարարության 400 զինծառայող, ոստիկանության 37 ծառայող, Ազգային անվտանգության ծառայության 25 և Քրեակատարողական ծառայության 5 ծառայող։