Արմինֆո. Պետք չէ ակնկալել, որ վարչապետ Նիկոլ Փաշինյանի Իրան կատարած մեկ այցը խթան կհանդիսանա պարապուրդի մատնված հայ-իրանական նախագծերի համար. անհրաժեշտ է երկարաժամկետ և հետևողական ռազմավարություն: ԱրմԻնֆո-ին այդպիսի կարծիք է հայտնել էներգետիկ անվտանգության ոլորտի փորձագետ Վահե Դավթյանը:
Երկօրյա այցով Իրանում գտնվող վարչապետ Նիկոլ Փաշինյանն արդեն հանդիպել է ԻԻՀ նախագահ Հասան Ռոհանիի, Իսլամական հեղափոխության գերագույն առաջնորդ Այաթոլլա Սեյեդ Ալի Խամենեի, Իրանի Մեջլիսի նախագահ Ալի Լարիջանիի հետ:
<Առաջին հերթին խոսքը վերաբերում է Մեղրիի ՀԷԿ-ի նախագծին, մեր երկրների միջև սահմանին նավաթվերամշակման գործարանին, Թավրիզը Մեղրիի հետ կապող նավթամուղին և, իհարկե, Իրան-Հայաստան երկաթուղուն: Բոլոր այդ բավական մասշտաբային նախագծերը, որոնք կարող են իրական տնտեսական լիցք հաղորդել Հայաստանի և Իրանի հարաբերություններին, կանգ են առել՝ քաղաքական կամքի բացակայության հետևանքով, ներքաղաքական պատճառներով>,- ընդգծել է նա:
Դավթյանը հիշեցրել է նաև, որ Հայաստան-Իրան բարձրավոլտ էլեկտրահաղորդման գծի կառուցումը պետք է ավարտվեր արդեն 2019 թվականին, սակայն այսօրվա դրությամբ կատարվել է աշխատանքների ընդամենը 20%-ը: Մինչդեռ, իրանա-ադրբեջանական էներգետիկ և տրանսպորտային-լոգիստիկ նախագծերը լրջագույն մարտահրավեր են Հայաստանի համար: Նրա խոսքով, Թեհրանը պատրաստ է Հայաստանից էլեկտրաէներգիա գնել՝ ընդունելի գնի և, գլխավորը, երկարաժամկետ կտրվածքով այդ մատակարարումները կայուն իրականացնելու Երևանի պատրաստակամության դեպքում: ԷՀԳ կառուցման ավարտը, ըստ նրա, լրացուցիչ հեռանկարներ կհաղորդի այդ պատրաստակամությանը:
Առևտրատնտեսական համագործակցության երկարաժամկետությունը և կայունությունը՝ հիմնված էներգետիկ և ենթակառուցվածքային փոխշահավետ նախագծերի վրա, ըստ փորձագետը, կարող է հստակ բովանդակություն և կանխատեսելիություն հաղորդել հայ-իրանական հարաբերություններին:
Դավթյանի կարծիքով, չնայած Իրանի մասնակցությամբ համատեղ նախագծերում օտարերկրյա ներդրողների ներգրավման ողջ բարդությանը՝ այդ նախագծերի իրականացումը, անշուշտ, պետք է հայ դիվանագետների հիմնական թիրախը դառնա: Եվ այդ նախագծերի իրականացման նախաձեռնությունը պետք է բխի Երևանից, քանի որ հիմնական շահագրգիռ կողմը Հայաստանն է: