Արմինֆո. Հայաստանի համայնքներում խոշոր ներդրումային ծրագրեր իրականացնելու համար համապատասխան ենթակառուցվածքներ չկան։ Այդ մասին մարտի 20-ին կայացած մամուլի ասուլիսի ժամանակ հայտարարել է ՀՀ տարածքային կառավարման եւ զարգացման նախարար Սուրեն Պապիկյանը։
Այս համատեքստում նա տեղեկացրել է, որ Լոռու մարզում տեղի ունեցած գործարար համաժողովի արդյունքներով նախատեսվում է իրականացնել խոշոր ներդրումային ծրագիր, որի գործարկումը ձգձգվում է խնդիրների առկայության պատճառով: «Տեղը դեռ որոշված չէ, քանի որ նախագծի իրականացումը նախատեսում է 30-40 հա մակերեսով տարածք, որը պետք է տեղակայված լինի մայրուղու մոտակայքում, չպետք է ունենա ջրամատակարարմանը, էլեկտրականությանն ու գազիֆիկացմանն առնչվող խնդիրներ։ Բայց, ցավոք, Հայաստանում դեռեւս կան լուրջ խնդիրներ՝ կապված ենթակառուցվածքների թերզարգացման հետ՚, - ասել է նախարարը։ Շարունակելով ասվածը՝ նա նշել է, թե կառավարությունն այն կարծիքին է, որ նման ծրագրերի իրականացման համար հայկական կողմը պետք է պատրաստ լինի անհրաժեշտ պայմաններ ապահովել ներդրողի համար՝ չնայած ծախսատարության մակարդակին, քանի որ խոշոր նախագծերի գործարկումը կապահովի հարյուրավոր, հազարավոր աշխատատեղեր։
Այնուամենայնիվ, Պապիկյանը տեղեկացրել է, որ Լոռու մարզում կայացած գործարար համաժողովում ներկայացվել են ավելի քան 50 ներդրումային նախագծեր տնտեսության տարբեր ճյուղերում, մասնավորապես, զբոսաշրջության, գյուղատնտեսության, արդյունաբերության, արտադրության և այլ ոլորտներում: Ըստ նախարարի, համաժողովին մասնակցել են ներդրողներ աշխարհի տարբեր երկրներից, այդ թվում՝ Սփյուռքի ներկայացուցիչներ: Այս համատեքստում Պապիկյանը տեղեկացրել է, որ միջոցառման արդյունքներով չինական ընկերությունը նախատեսում է 5 մլն դոլար ներդնել Ստեփանավան խոշորացված համայնքի Կաթնաղբյուր գյուղում ջրի արտադրության գործարանի ստեղծման համար։
Նախարարի ասելով, նման գործարար համաժողովների անցկացումը Հայաստանում շարունակական բնույթ է կրելու. «Ես առավել քան հուսով եմ, որ Լոռու մարզում արձանագրված նման արդյունքներ մեզ կհաջողվի արձանագրել նաեւ Հայաստանի այլ մարզերում գործարար համաժողովների անցկացման արդյունքում՚: Այս համատեքստում նա նկատել է, որ հաջորդ համաժողովը պետք է տեղի ունենար Սյունիքում, սակայն կլիմայական պայմանները ՝ կանխատեսվող ցուրտը, խոչընդոտեցին դրան, քանի որ համաժողովն ընթանում է վրանային ձեւաչափով: Այսպիսով, Սյունիքում միջոցառումը տեղափոխվել է մայիսին, իսկ առաջիկայում համաժողով տեղի կունենա Արարատի և Արմավիրի մարզերում: Վերջում Պապիկյանն ընդգծել է. «Այն ֆոնը, որն այսօր առկա է Հայաստանում ներդրումային հետաքրքրության տեսանկյունից, մասնավորապես, երկրի տնտեսության մեջ ներդրումներ կատարել ցանկացողների քանակի առումով, խոսում է այն մասին, որ 2019 թվականը կդառնա տնտեսական հեղափոխության առանցքային եւ կարեւորագույն փուլը, որը մենք հայտարարել ենք՚: