Արմեն Փամբուխչյան. Վերին Լարսին այլընտրանք կարող է դառնալ ծովով բեռների փոխադրումը

Արմինֆո.ԱԺ տարածաշրջանային եւ եվրոպական ինտեգրման հարցերի մշտական հանձնաժողովի նախագահ, "Իմ քայլը" իշխող դաշինքի խմբակցության պատգամավոր Արմեն Փամբուխչյանը հայտարարել է, որ "Վերին Լարս" անցակետը երկրի բեռնափոխադրողների համար գլխավոր խնդիրներից մեկն է: 

Պատգամավորն այսօր մամուլի ասուլիսի ժամանակ նշել է, որ չնայած այն հանգամանքին, որ երբեմն անցակետի աշխատանքին տրվում է քաղաքական երանգ, այնուամենայնիվ, խնդիրները ծագում են միայն տեխնիկական պատճառներով ՝ անցանելիության մակարդակ, եղանակային պայմաններ, աշխարհագրական դիրք: Պատգամավորն ընդգծել է, որ այդ խնդիրը Հայաստանին թույլ չի տալիս լիարժեք օգտագործել իր տնտեսական ներուժը ԵԱՏՄ-ին անդամակցելուց հետո: Փամբուխչյանն ընդգծել է, որ "Վերին Լարսը" ծանրաբեռնված է եւ ի վիճակի չէ ամբողջությամբ լուծել իր խնդիրը:

"Իմ կարծիքով, "Վերին Լարսին" ամենահարմար այլընտրանքը կարող է դառնալ ծովով բեռների փոխադրումը։  Ավելին, այդպիսով, մենք կկարողանանք ապահովել ապրանքների առաքման ժամկետների կանխատեսելիությունը: Միջազգային ծովային օրենսդրությունը թույլ է տալիս դեպի ծով ելք չունեցող երկրներին նավահանգիստ ունենալ հարեւան երկրում", - նշել է պատգամավորը։  Փամբուխչյանն ընդգծել է, որ Հայաստանում համապատասխան օրենսդրության իրականացման անհրաժեշտություն կա: Նա նաև նշել է, որ նման փորձ ունեն Մոլդովան և Մոնղոլիան։  "Այդ երկրները դեպի ծով ելք չունեն, սակայն այլ երկրների գործարարներին գրավում են իրենց դրոշի ներքո փոխադրումներ կատարել։  Հայկական ընկերությունների հետ պատրաստ են համագործակցել Ուկրաինայի գործարարները, ավելին, առաջարկներ կան լիբանանահայ գործարարներից, որոնք մեզ առաջարկել են այնտեղ նավահանգիստ հիմնել, այնտեղից հայկական լաստանավը կարող է ապրանքներ փոխադրել Փոթի, իսկ հետո՝ Նովոռոսիյսկ", - պարզաբանել է պատգամավորը, նկատելով, որ երկրի գլխավոր առավելություններից մեկը նրա անդամակցությունն է ԵԱՏՄ-ին։

Փամբուխչյանը նշել է, որ բեռնափոխադրումների արդյունավետության խնդրի լուծման եւս մեկ միջոց կարող է լինել այն դրույթը, որով ԵԱՏՄ երկրների բեռնափոխադրողները կարող էին առանց լիցենզիայի ազատ աշխատել միության շրջանակներում: