Արմինֆո. Բանկերի հաճախորդների հոսքը դեպի առցանց տիրույթ թելադրում է բիզնեսի թվային վերափոխումը: Հայաստանի բանկային շուկայի խաղացողները յուրացրել են նոր կանոնները՝ սկսելով ակտիվորեն թվային դաշտ տեղափոխել առաջին հերթին առավել պահանջված կորպորատիվ և մանրածախ ծառայությունները:
Բիզնեսի համընդհանուր թվայնացման դեռեւս կարող են ձեռնամուխ լինել խոշոր բանկերը և արտասահմանյան ֆինանսական ինստիտուտների դուստրերը, որոնց թվին է պատկանում Էյչ-Էս-Բի-Սի Բանկ Հայաստանը (HSBC Հայաստան), որն արդեն սկսել է մանրածախ ծառայությունների փուլային թվայնացումը ՝ շեշտը դնելով առաջին հերթին բարձր պահանջարկ ունեցող բանկային պրոդուկտների վրա: Ժամանակի ընթացքում թվային տիրույթում կհայտնվեն բոլոր բանկային գործառնությունները, ինչը ենթադրում է պաշտպանության աստիճանների անընդհատ թարմացում ՝ հաճախորդների անվտանգ հեռահար սպասարկման ամենաժամանակակից չափանիշները պահպանելու համար: «Էյչ-Էս-Բի-Սի Բանկ Հայաստան»-ում ծառայությունների թվայնացման մասշտաբի մասին Արմինֆո գործակալության թղթակցի հետ հարցազրույցում պատմել է բանկային մանրածախ բիզնեսի գծով տնօրեն Միհրան Մուրադյանը:
Ինչպիսի՞ն է թվային բանկինգի հետ կապված իրավիճակը: Որքանո՞վ է այն հայտնի «Էյչ-Էս-Բի-Սի Բանկ Հայաստան»-ի հայաստանյան հաճախորդների շրջանում:
Մեր հաճախորդների կեսից ավելին օգտվում են թվային ծառայություններից, ընդ որում օգտվողների 79 տոկոսն իրականացնում են առօրյա բանկային գործառնությունները թվային եղանակով, մասնավորապես` ինտերնետ և մոբայլ բանկինգի միջոցով: Ներկայումս շատ արագ աճում է մոբայլ բանկինգ օգտատերերի քանակը:
Նշեք «Էյչ-Էս-Բի-Սի Բանկ Հայաստան»-ի մանրածախ ծառայությունները, որոնք տրամադրվում են հեռահար ուղիներով: Եվ ինչո՞ւ հենց այդ ծառայությունները դարձան էլեկտրոնային։ Որքանո՞վ է բարձր պաշտպանվածության աստիճանը հաճախորդի հեռահար սպասարկման ժամանակ:
Բանկի թվային ծառայությունների ցանկում ընդգրկված են առավել պահանջարկ և օգտագործելիություն ունեցող անկանխիկ ֆինանսական գործառնությունները, ինչպիսիք են օրինակ փոխանցումները, ժամկետային ավանդների բացումը և Բանկի հետ անվտանգ հեռահաղորդակցությունը: Բոլոր այն գործառույթները, որոնք հնարավոր է իրականացնել թվային տիրույթում և որոնք արգելված չեն որևէ օրենսդրական ակտով, ժամանակի ընթացքում տեղափոխվելու են թվային միջավայր:
Ինչ վերաբերում է անվտանգությանը, պետք է նշեմ, որ HSBC Հայաստանը մշտապես ներդրել է բոլոր անհրաժեշտ միջոցները` պահպանելու տվյալ պահի դրությամբ առկա ամենաարդիական անվտանգության չափորոշիչները: Էյչ-Էս-Բի-Սի Խմբի թվային բանկային ծառայությունների զարգացման ռազմավարության շրջանակներում HSBC Հայաստանը լայնածավալ ներդրումային ծրագրեր է իրականացնում: Շուտով մեր հաճախորդները կկարողանան օգտվել առավել անհատականացված և հարմարավետ ինտերնետ և մոբայլ բանկինգի ծառայություններից: Բանկը մշտապես հավատարիմ է անվտանգության առավելագույն աստիճան ապահովելու և հաճախորդներին զեղծարարություններից զերծ պահելու իր քաղաքականությանը։
«Էյչ-Էս-Բի-Սի Բանկ Հայաստան»-ի կողմից առաջարկվող մանրածախ ո՞ր ծառայություններն են առավել պահանջված հաճախորդների կողմից: Եվ ինչո՞վ է դա բացատրվում։
HSBC Հայաստանի մանրածախ բանկային ծառայությունների շրջանակը միտված է բավարարել բնակչության առօրյա բանկային կարիքները, միաժամանակ ապահովելով անվտանգության բարձր աստիճան, ծառայությունների անխափան և հասանելի աշխատանք և հաճախորդների հանդեպ վարվելակերպի միջազգային ստանդարտներ: Ի թիվս նպատակային պրոդուկտների և ծառայությունների, ինչպիսիք են օրինակ հիփոթեքային վարկերը, բանկի առավել պահանջարկ վայելող ծառայություններն են ընթացիկ հաշիվներն ու քարտային պրոդուկտները, ինչպես նաև հեռահար և թվային ծառայությունների փաթեթը` ինտերնետ, մոբայլ և հեռախոսային բանկինգը:
Բանկի մանրածախ վարկային պորտֆելն ավելի մեծ աճ է արձանագրել, քան գերիշխող կորպորատիվը: Ի՞նչն է դրդել բանկին ակտիվացնել մանրածախ վարկավորումը:
Մանրածախ վարկային պորտֆելի համեմատական մեծ աճը 2018 թվականին պայմանավորված է երկու հիմնական գործոններով. անշարժ գույքի շուկայի նկատելի ակտիվացմամբ` հատկապես տարվա երկրորդ կեսի ընթացքում, և միևնույն ժամանակ բանկի կողմից վարկային պրոդուկտների մասով առավել արդյունավետ ընթացակարգերի, վերաֆինանսավորման արշավների, առավել մրցակցային և թափանցիկ գնային քաղաքականության իրականացմամբ:
2019 թվականին ևս HSBC Հայաստանը նախատեսում է հանդես գալ հաճախորդների շարունակաբար փոփոխվող պահանջմունքներին համապատասխան արդյունավետ և գրավիչ առաջարկներով:
Դատելով «Էյչ-Էս-Բի-Սի Բանկ Հայաստան»-ի վարկային պորտֆելի դիվերսիֆիկացիայից ՝ կարելի է եզրակացնել, որ ներդրումները հիմնականում կենտրոնացած են արդյունաբերական հատվածի, առեւտրի, հանրային սննդի եւ ծառայությունների ոլորտների, ՓՄՁ-ների կորպորատիվ հաճախորդների վրա: Իսկ մանրածախ վարկավորման մասնաբաժինը կազմում է մոտ 22%՝ շեշտը դնելով հիփոթեքի վրա: Ինչո՞վ եք պայմանավորում «Էյչ-Էս-Բի-Սի Բանկ Հայաստան»-ի վարկային քաղաքականության նման մոտեցումը:
«Էյչ-Էս-Բի-Սի Բանկ Հայաստան» ՓԲԸ-ն (HSBC Հայաստան), հանդիսանալով Էյչ-Էս-Բի-Սի Խմբի անդամ, իր գործունեությամբ փորձում է գործուն մասնակցություն ունենալ ՀՀ տնտեսության կայուն և համաչափ զարգացման հարցում: Զարգացման ռազմավարությանը համապատասխան՝ Բանկը շարունակելու է ընդլայնվել երեք հիմնական ուղղություններով: Առևտրավարկային (կորպորատիվ) բանկային ծառայություններ և ֆինանսական շուկայական գործառնություններ տրամադրելու հետ մեկտեղ մենք ծառայություններ ենք մատուցում մի շարք հաճախորդներին, ներառյալ երիտասարդներին, նորաստեղծ ընտանիքներին և ոլորտային մասնագետներին՝ վերջիններիս օժանդակելով նոր բնակարանի կամ առանձնատան ձեռքբերման և կյանքի պայմանների բարելավման հարցում՝ միևնույն ժամանակ նրանց հնարավորություն ընձեռելով օգտվել անհատական բանկային ծառայությունների լայն շրջանակից: