Աշոտ Օսիպյանը չի բացառել Հայաստանում տոկոսադրույքների հետագա նվազման հավանականությունը

Արմինֆո. Հայաստանում տոկոսադրույքները կարող են նվազել։   Նման կանխատեսում է հնչեցրել ԱՐԱՐԱՏԲԱՆԿ-ի վարչության նախագահ, գործադիր տնօրեն Աշոտ Օսիպյանը՝ հունիսի 11-ին Բանկի բաժնետերերի 12-րդ ընդհանուր ժողովին նվիրված միջոցառման ժամանակ պատասխանելով լրագրողների հարցին:

Նա նշել է, որ 2018 թվականին Հայաստանի բանկային համակարգում նկատվել է տոկոսադրույքների նվազում, ինչը, հիմնականում, կապված է եղել շուկայում բարձր մրցակցության հետ:  2019 թվականին, ըստ Ա.Օսիպյանի, բացի այդ գործոնից, միջազգային շուկայից դրական ազդակներ են ստացվում: Այս համատեքստում նա նշել է Libor տոկոսադրույքը, որը նույնպես նվազում է` տարեսկզբի 2,8 տոկոսից մինչեւ 2,4 տոկոս՝ վեց ամսվա ընթացքում: "Կարծում եմ, որ Թրամփի քաղաքականությունը հանգեցրել է այն բանին, որ 2019 թվականին Libor-ը աճ չի ցուցաբերի", - եզրափակել է բանկիրը:

Նշենք, որ ՀՀ ԿԲ տվյալներով, ավանդների տոկոսադրույքները 2015-2018թթ. ընթացքում նվազել են 9,51%-ից մինչև 5,33%, իսկ վարկերի գծով՝ 14,31%-ից մինչև 10,53%: Այս միտումը շարունակվել է նաև 2019թ. հունվար-ապրիլին. ավանդների տոկոսադրույքները նվազել են մինչև 5,30%, իսկ վարկերի գծով՝ մինչև 10,45% ։