Փաշինյան. Մեր հիմնական խնդիրը իրենց հարկային պարտավորությունների նկատմամբ քաղաքացիների վերաբերմունքը փոխելն է

Արմինֆո. Հայաստանի պետականության զարգացման համատեքստում հիմնական խնդիրներից մեկը ճյուղային զարգացման որակյալ ռազմավարությունների եւ դրանց պատշաճ մակարդակի փոխկապակցվածության բացակայությունն էր: Այդ մասին հայտարարել է վարչապետ Նիկոլ Փաշինյանը՝ հոկտեմբերի 19-ին Գյումրիում ՊԵԿ կազմակերպած ռազմավարական պլանավորման աշխատաժողովում իր ելույթում։

ՙՄեր կառավարությունը ձևավորման առաջին իսկ օրերից խնդիր է դրել իր գործունեության հիմքում դնել կարճաժամկետ, միջնաժամկետ և երկարաժամկետ ռազմավարությունների մշակումը: Եվ ես ուրախ եմ արձանագրել, որ ՊԵԿ-ը այս հարցում բավական կառուցողական դեր է ունեցել և անընդհատ կառավարությունում քաջալերել է այս գործունեությունը: Եվ ընդհանրապես, հարմար առիթը օգտագործելով, ուզում եմ ասել, որ, ընդհանուր առմամբ, բավարարված եմ վերջին 1.5 տարվա ընթացքում ՊԵԿ-ի աշխատանքով, և հստակ արձանագրել, որ ՊԵԿ-ը իմ առաջադրած խնդիրները մակրոմակարդակում լուծել է, միկրոմակարդակում դեռևս կան բազմաթիվ խնդիրներ, որոնք պետք է լուծվեն: Եվ այս առումով ռազմավարության ընդունումը շատ կարևոր է այդ լուծումները իրականացնելու համար»,- նշել է վարչապետը:

Ասվածին վարչապետը հավելել է, որ կառավարության և ՊԵԿ-ի հիմնական խնդիրն է փոխել քաղաքացու վերաբերմունքը իր վճարած հարկերի և իր հարկային պարտավորությունների նկատմամբ: Այդ առնչությամբ վարչապետն ընդգծել է իրենց աշխատանքի նկատմամբ  ՊԵԿ-ի աշխատողների, հարկային ծառայողների, մաքսային ծառայողների վերաբերմունքի փոփոխման կարևորությունը, պետք է փոխվի նաև քաղաքացիների հետ շփումներում  նրանց նկատմամբ վերաբերմունքը: ՙՍա երկկողմանի փոխադարձ պրոցես է, և այս պրոցեսը պետք է տեղի ունենա կառավարության հովանու ներքո: Կառավարությունը և՛ քաղաքացիներին, և՛ ՊԵԿ-ի աշխատողներին պիտի քաջալերի, աջակցի, դրդի, որ այդ փոփոխությունները ռեալ տեղի ունենան»,- ընդգծել է վարչապետը: Նրա համոզմամբ, կարևոր է, որ ՀՀ բոլոր քաղաքացիները հստակ արձանագրեն, որ այն գումարը, որ նրանք ՊԵԿ-ի միջոցով վճարում են պետությանը, նրանք վճարում են իրենք իրենց, վճարում են մեր երկրում ենթակառուցվածքներ, ծառայություններ, կրթություն ունենալու համար: Վարչապետը նաև կարևոր է համարել, որպեսզի ՊԵԿ-ի հարկային և մաքսային ոլորտներում լինի աշխատանքի որակական փոփոխություն, նաև կառավարության աշխատանքում լինի որակական փոփոխություն:

ՙՄենք շատ կարևորում ենք, եթե չասեմ՝ ամենակարևորն ենք համարում, կոռուպցիայի դեմ պայքարը, հատկապես, մաքսային և հարկային ոլորտներում, բայց նաև գիտակցում ենք, որ բացի քաղաքական կամքը, այդ խնդիրը լուծելու համար անհրաժեշտ է նաև որոշ այլ ոլորտներում լուծումների գնալ, ընդհուպ պետք է շարունակական աշխատավարձի բարձրացումներ լինեն: Բայց աշխատավարձի բարձրացումը պետք է անխուսափելիորեն նշանակի նաև հարկային և մաքսային մարմիններում աշխատող մեր քաղաքացիների պրոֆեսիոնալ որակի պատշաճ մակարդակ և շարունակական բարձրացում»,- ասել է կառավարության ղեկավարը, հավելելով, որ  կառավարության համար առաջնահերթություն է այն, որ որակական փոփոխությունները պետք է գան առջևից, որովհետև որակական տեսանելի փոփոխություններն այն գործոնն են, որ ողջ հանրության և կառավարության համար կլեգիտիմացնեն ֆինանսական բավարարումների, աշխատավարձերի բարձրացումը:

Վարչապետն անդրադարձել է նաև ստվերային տնտեսությանն դեմ պայքարին՝ ասելով.  «Որևէ պարագայում մեր օրակարգից չի կարող դուրս գալ ստվերի դեմ պայքարը, մենք 1.5 տարվա ընթացքում ստվերի դեմ պայքարում աննախադեպ հաջողություն ունենք, բայց ուզում եմ ընդգծել, որ մենք այս հաջողություններն առավելագույնը չենք համարում և մենք հետևողականորեն պետք է  շարժվենք այդ ճանապարհով, շարունակաբար ավելացնելով հարկեր-ՀՆԱ ցուցանիշը, չմոռանալով, որ հարկերի հավաքագրման պրոցեսում, պետական ծախսերի պրոցեսում պետք է տնտեսական աճի և ակտիվության խթանումը լինի առաջնահերթություն»:

Վերջում վարչապետը հավելել է, որ տնտեսական ակտիվության խթանումը ոչ միայն ֆինանսական, այլ նաև հոգեբանական բաղադրիչ ունի: «Կարծում եմ, որ տնտեսվարող սուբյեկտների տրամադրությունն ու տրամադրվածությունը մեծապես պայմանավորված է այն որակով, որ ունեն նրանց շփումները հարկային և մաքսային մարմինների հետ: Եվ ես համոզված եմ, որ այս շփման որակը գնալով ավելի կբարձրանա»,-եզրափակել է նա: