ԵՏՀ մրցակցության և հակամենաշնորհային կարգավորման նախարարը պատմել է սահմանին ապրանքների կանգնեցման օբյեկտիվ և սուբյեկտիվ պատճառների մասին

Արմինֆո.ԵԱՏՄ շրջանակներում տնտեսվարողների բողոքները առաջին հերթին վերաբերում են այն բանին, որ սահմանին կանգնեցվում է արտադրանքը և վերադարձվում։  Այս մասին հայտարարել Է Եվրասիական տնտեսական հանձնաժողովի (ԵՏՀ) մրցակցության և հակամենաշնորհային կարգավորման հարցերով Կոլեգիայի անդամ (նախարար) Ժումանգարին Սերիկ Մակաշևիչը նոյեմբերի 20-ին կայացած <Արդյունավետ մրցակցության ապահովումը թվայնացվող աշխարհում> խորագրով համաժողովի շրջանակներում կայացած ճեպազրույցում:

ԵՏՀ ներկայացուցչի խոսքով՝ դա տեղի է ունենում այն պատճառով, որ ներկայումս առաջին պլան է մղվում որակի հարցը, ակտիվորեն աշխատում են գերատեսչական և սանիտարական հսկողական մարմինները: Դրան հաջորդում են վարույթի ընթացակարգերը, ինչը որոշակի ժամանակ է պահանջում, և, բնականաբար, բիզնեսը դժգոհ է դրանից։ <Այստեղ կան նաև օբյեկտիվ պատճառներ, երբ որակը չի բավարարում, և սուբյեկտիվ՝ կապված տեղական, տարածաշրջանային հովանավորչության հետ։  Բայց այս ամենի հետ մենք պայքարում ենք, և տարեցտարի դրանք ավելի ու ավելի քիչ կլինեն>, - վստահեցրել է Կոլեգիայի անդամը։

Բացի այդ, ԵԱՏՄ շրջանակներում առկա են նաև կենսաթոշակային ապահովման, վարորդական իրավունքի ճանաչման հետ կապված խնդիրներ, որոնք, ինչպես նշել է ԵՏՀ ներկայացուցիչը, բանակցությունների սեղանի շուրջ լուծվում են համապատասխան գերատեսչությունների կողմից: Այդ հարցերը բավական մոտ են լուծմանը, վստահեցրել է նա։

Ժումանգարին Սերիկ Մակաշեւիչը համոզված է, որ Միության անդամ պետությունները անխուսափելիորեն կհանգեն 4 տնտեսական ազատությունների լիակատար ապահովմանը ՝ ապրանքների, ինչպես նաեւ ծառայությունների, կապիտալի եւ աշխատուժի շարժի ազատության: Եվ այդ ժամանակ արդեն նախանշված վերջնաժամկետին ՝ 2025 թվականին, Միության անդամները կապահովեն ֆինանսների շուկայի, գազի, էլեկտրաէներգիայի, նավթի և նավթամթերքների ընդհանուր շուկայի ձևավորումը:

Նոյեմբերի 7-ին վկայակոչելով «Սպայկա» ընկերությունը՝ ԱրմԻնֆո-ն հաղորդել էր, որ ընկերության նորակառույց պանրի գործարանում արտադրված 21 տոննա կապույտ բորբոսով պանիրը 24 օր ՌԴ Վերին Լարսի մաքսային անցակետում հարկադիր կանգնեցվելուց հետո վերադարձվել է Հայաստան: Նոյեմբերի 12-ին Եվրասիական տնտեսական հանձնաժողովի ներքին շուկաների, տեղեկատվայնացման, տեղեկատվական-հաղորդակցական տեխնոլոգիաների նախարար Կարինե Մինասյանը լրագրողներին հայտարարել է, որ  Եվրասիական տնտեսական հանձնաժողովը կուսումնասիրի "Վերին Լարս" անցակետով պանիր արտահանելու վերաբերյալ հայկական "Սպայկա" ընկերության նամակը:  Նախարարի ասելով,  գլխավոր խնդիրը պանրի ծագումն է, ինչի համար անհրաժեշտ էր ստանալ ռուսական կողմի եզրակացությունը և հասկանալ, թե ինչ փաստերի հիման վրա է արվել այն եզրակացությունը, որ պանիրը հայկական չէ, հասկանալ, թե ինչ լաբորատոր հետազոտություններ են իրականացվել։  Դրանից հետո այդ հետազոտությունները պետք է համադրվեն հանձնաժողովի եզրակացությունների հետ՝ հասկանալու համար, թե արդյոք պանիրը հայկական ծագում ունի։ ԵՏՀ նախարարն ընդգծել է, որ ներդրված գնահատման համակարգը, որը հիմնված է ռիսկերի վրա, ունի բավականին օբյեկտիվ պատճառներ, որպեսզի մեքենաները կանգնեցնեն և ստուգումներ անցկացնեն: "Եթե տնտեսվարող սուբյեկտները կարծում են, թե իրենց իրավունքները խախտվել են, կարող են դատի տալ փոխհատուցում ստանալու համար, բայց մեզ համար կարևոր է հասկանալ խնդրի էությունը", - ընդգծել է Կարինե Մինասյանը:Նա նաեւ նշել է, թե "Վերին Լարսի" օբյեկտիվ խնդիրը տեխնիկական է եւ կապված է թողունակության հետ, որը սահմանափակված է մինչեւ 300 ավտոմեքենա, մինչդեռ անցակետում ավտոմոբիլային հոսքն այսօր երեք անգամ ավելի է: Սուբյեկտիվ խնդիրը կապված է վստահության հարցի հետ, որը պետք է լինի ԵԱՏՄ երկրների մաքսային ծառայությունների միջև։

Այնուամենայնիվ, նոյեմբերի 13-ին <Սպայկա> ընկերությունը կրկին Ռուսաստան է ուղարկել կապույտ բորբոսով պանրի այն խմբաքանակ, որը սահմանապահները Հայաստան էին վերադարձրել Վերին Լարսի անցակետից: Ինչպես նշվում է ընկերության հաղորդագրությունում, ընկերությունը ՀՀ Առևտրաարդյունաբերական պալատի հավաստագրման բաժնի կողմից ստացել է ապրանքի ծագման սերտիֆիկատը (CT-1), ապրանքի ծագման փորձաքննության ակտը, որի համար տրամադրվել է մոտ 500 էջ փաստաթղթեր: