Արմինֆո.ԱրմԻնֆո ՏԸ ("Վարկանիշային մարքեթինգային տեղեկատվության գործակալություն) լույս է ընծայել և իր բաժանորդներին է տրամադրել "Հայաստանի բանկերի ֆինանսական վարկանիշները" հոբելյանական, հարյուրերորդ տեղեկատվական-վերլուծական եռամսյակային տեղեկագիրը: "Սա համապատասխանում է երկրի ֆինանսական վերլուծության շուկայում ԱրմԻնֆո-ի ներկայության 25 տարիներին", - նշել է ԱրմԻնֆո-ի գլխավոր տնօրեն Էմանուիլ Մկրտչյանը:
"Նորանկախ Հայաստանի համար՝ իր նոր ֆինանսական համակարգով, դա վերելքի և անկումների մի ամբողջ ժամանակաշրջան է, համակարգի կայացման բարդագույն ճանապարհի մի ամբողջ դարաշրջան՝ կարգավորիչ միջոցների ուժեղացման և դրանց հետևող սնանկացումների միջոցով։ Դրանք հաջող բարեփոխումներ են և բանկային գործի նոր գործիքների ստեղծում, դա ֆինանսական ենթակառուցվածքների, նոր բանկային սպասարկման մշակույթի ձևավորում։ Դա, ի վերջո, հուսալիության և կայունության ձեռք բերում է, որոնք ուղեկցում են երկրի ֆինանսական շուկաներն արդեն ավելի քան 15 տարի՝ չնայած երկրի արտաքին պարագծում հաճախակի դարձած վատ եղանակին", - կարծում է Է.Մկրտչյանը:
"Մեր տեղեկատվական ընկերության ֆինանսական վերլուծության ծառայության համար նշանակալի այս օրը ես ուզում եմ հատուկ ընդգծել մեր խորին երախտագիտությունը մեր ֆինանսական վերլուծության բոլոր բաժանորդներին, նրանց, ովքեր միշտ մեր կողքին են, օգնում են մեզ խորհուրդներով, մեզ հետ կիսում են իրենց վերլուծական մշակումները: Ցանկանում եմ շնորհակալություն հայտնել նրանց, ովքեր մեզ չեն նախանձում, այլ, ընդհակառակը, մեզ հետ առաջ են շարժվում, նույնիսկ մեզ իրենց ետևից են քաշում, հասկանալով, թե որքան կարևոր է շուկայի համար ունենալ անկախ մասնագիտական հայացք ֆինանսական համակարգի և ֆինանսական շուկաների զարգացման ուժեղ և թույլ կողմերին", - կարծում է գործակալության ֆինանսական վերլուծաբանների թիմի ղեկավար Կարինա Մելիքյանը։
"Հրապարակվել է 100-րդ ֆինանսական վարկանիշը: Այլ կերպ ասած ՝ լրացել է առաջին թողարկման 25 տարին։ Հիշում և գնահատում եմ առաջին քայլերը, այդ ժամանակից ի վեր շատ ջրեր են հոսել: Բայց, կարևորն այն է, որ ձեզ հաջողվել է հայկական շուկայում նոր մշակույթ ներդնել ֆինանսական վերլուծությունների բնագավառում։ Ձեր նյուփերի վրա աճել է ֆինանսիստների արդեն նոր սերունդ, որը վարժվել է տվյալների բազաների ազատ հասանելիությանը, համակարգված տեղեկատվությանը։ 25 տարի մանրակրկիտ, պատասխանատու աշխատանք, որն ստանձնել եք ոչ թե շնորհիվ, այլ՝ ի հեճուկս: Չէ որ ոչ ոք չէր էլ խնդրել։ ՇՆՈՐՀԱԿԱԼՈՒԹՅՈՒՆ "ԱրմԻնֆո"-ին, ՇՆՈՐՀԱԿԱԼՈՒԹՅՈՒՆ "Ֆինպորտ" – ին", - ֆեյսբուքյան իր էջում գրել է տնտեսագիտության պրոֆեսոր, ՀՌՀ Տնտեսագիտության և բիզնեսի ինստիտուտի տնօրեն, ՀՀ ֆինանսների և էկոնոմիկայի նախկին նախարար Էդվարդ Սանդոյանը:
"Շնորհավորում եմ ԱրմԻնֆո գործակալությանը ֆինանսական վարկանիշի հոբելյանական, հարյուրերորդ թողարկման կապակցությամբ: Սա ոչ թե, պարզապես, տեղեկատվական ամփոփագիր է, այլ կարևոր բաղադրիչ այն բանի, ինչ կոչվում է Հայաստանի բանկային համակարգի ինստիտուցիոնալ զարգացում։ Շնորհակալություն ԱրմԻնֆո-ի թիմին, որ 25 տարի առաջ ստեղծեցիք այս ապրանքը, որը պահանջված է մասնագետների շրջանում ինչպես Հայաստանի ներսում, այնպես էլ նրա սահմաններից դուրս", - հոբելյանի առթիվ շնորհավորել է Արդշինբանկի փոխնախագահ, ՀՀ ֆինանսների նախկին նախարար Դավիթ Սարգսյանը:
Նշենք, որ գործակալության ֆինանսական վերլուծության ակունքներում իր արժեքավոր հանձնարարականներով ու հաշվարկներով կանգնած է եղել Հայաստանի հայտնի տնտեսական վերլուծաբան, ներկայում Ամերիաբանկի փոխնախագահ Տիգրան Ջրբաշյանը, ով նույնպես շնորհավորել է ԱրմԻնֆո-ին վերլուծական տեղեկագրի հոբելյանական թողարկման կապակցությամբ: Գործակալությունը նաև ոչ պաշտոնական շնորհավորանք է ստացել երկրի նախկին վարչապետ, ՀՀ ԿԲ երկարամյա ղեկավար Տիգրան Սարգսյանից, ով մշտապես աջակցում է շուկայի անկախ գնահատականին։
Նշենք, որ ԱրմԻնֆո-ի կուտակած մեծ փորձը գնահատվել է օտարերկրյա գործընկերների կողմից, ինչի շնորհիվ 2005 թվականին ստեղծվել է երկրում առաջին եւ առայժմ միակ ազգային AmRating վարկանիշային գործակալությունը, որը վարկային վարկանիշներ է շնորհել հայկական չորս բանկերի:
Այսօր գործակալությունը հանդես է գալիս որպես եվրոպական վարկանշային գործակալության գործընկեր՝ պարբերաբար հրատարակելով երկրի բանկային ամփոփագրեր։ https://raexpert.eu/files/Industry_report_Armenia_Banks_27.05.2019.pdf
Այսօր գործակալությունը մեթոդաբանորեն պատրաստ է վարկանիշներ շնորհել խոշոր եւ միջին ձեռնարկություններին, որոնք կցանկանային դուրս գալ արժեթղթերի հրապարակային շուկաներ: Շարժվելով ժամանակին համընթաց ՝ գործակալությունը պատրաստ է ընկերություններին տրամադրել նաև, այսպես կոչված, "կանաչ վարկանիշներ"։
"ԱրմԻնֆո"-ն հոբելյանական այս օրը հետաքրքիր համարեց ընթերցողների հետ կիսվել մի քանի "հիշողություններով": Այսպես, գործակալության ֆինանսական ծառայությունն իր ճանապարհն սկսել է՝ թերթիկում ունենալով 65 առևտրային բանկ, ապա դրանց քանակը 1999 թվականին նվազեց մինչև 31 բանկ, իսկ 2017 թվականին դրանք դարձան 17: Ընդ որում, 20-25 համեստ էջից բաղկացած տեղեկագիրը վերածվում էր "ամսագրի" 100-ից ավելի վերլուծական աղյուսակներով, գործակիցներով ու գրաֆիկներով, ուղեկցող մեկնաբանություններով։
Չհաշված բուրգերից ու գրպանային բանկերից համակարգի "կոշտ զտման" առաջին տարիները՝ 1999 թվականից մինչ օրս երկրի բանկային համակարգի ընդհանուր կապիտալն աճել է 25 անգամ, ակտիվներն ավելացել են 29 անգամ, վարկային ներդրումները՝ 45 անգամ, պարտավորությունները՝ 30 անգամ, մինչդեռ բնակչության ավանդներն աճել են 57 անգամ: Շահույթը, ընդ որում, անցնելով 1998-ի, 2004-ի, 2009-ի և 2014-ի ճգնաժամերը, "համեստորեն" աճել է 16 անգամ։