Հայաստանը բանակցում է "Գազպրոմի" հետ 10 տարի ժամկետով գազի հաստատագրված գնագոյացման մեխանիզմների մշակման շուրջ

Արմինֆո.  Հայաստանը բանակցում է "Գազպրոմ" - ի հետ 10 տարի ժամկետով գազի ֆիքսված գնագոյացման մեխանիզմների մշակման շուրջ՝ այն դեպքում, եթե ձեռնարկությունը հայտարարի սակագնի բարձրացման մասին։ Այդ մասին շաբաթ օրը լրագրողներին հայտնել է Հանրային ծառայությունները կարգավորող հանձնաժողովի նախագահ Գարեգին Բաղրամյանը ։

"Այսօր բանակցություններն ընթանում են գազի գնագոյացման 10-ամյա մեխանիզմները ֆիքսելու ուղղությամբ, եթե "Գազպրոմ Արմենիա" ընկերությունը գազի սակագնի փոփոխության հայտ ներկայացնի։  Դա, իհարկե, կապված կլինի եւ ներդրումների, եւ այն արդյունքների հետ, որոնք մենք կստանանք այդ ներդրումներից", - նշել է նա, հաղորդում է ՏԱՍՍ-ը։ Ըստ Բաղրամյանի ՝ գազի սակագնի բարձրացման դեպքում չի բացառվում, որ կառավարությունը փոխհատուցի տարբերությունը։

Ավելի վաղ «Գազպրոմ Արմենիան» հայտարարել էր, որ չի բացառում գազի սակագինը վերանայելու հայտով Հանրային ծառայությունները կարգավորող հանձնաժողով դիմելու հնարավորությունը: Lragir.am-ում հրապարակված հարցազրույցում  նման հայտ ներկայացնելու հնարավորույթյան մասին նախօրեին բարձրաձայնել էր նաև Գարեգին Բաղրամյանը՝: Նա, մասնավորապես, նշել էր, թե ՙսահմանին 15 դոլարով գինը բարձրացել է, իսկ հաշվարկային առումով 30 դոլարով է բարձրացել, որովհետև այսօրվա գործող սակագներով շուրջ 15 դոլար Գազպրոմն իր վրա է վերցրել: ՙԱյսինքն՝ գործող գները պայմանականորեն 135 դոլար սահմանային գնի վրա են հիմնված: Այսինքն՝ այսօր խոսք է գնում այն մասին, որ շուրջ 30 դոլար արդեն հաշվարկային առումով սահմանի գինը բարձրացել է», - ասել էր ՀԾԿՀ ղեկավարը:

Հիշեցնենք, որ նախորդ տարվա ավարտին «Գազպրոմ Արմենիան» հաղորդել էր «Գազպրոմ էքսպորտ» ՍՊԸ հետ ռուսական գազի մատակարարման լրացուցիչ համաձայնագրի ստորագրման մասին, որի համաձայն,  2020 թվականին Հայաստանին վաճառվող գազի գինը չի փոփոխվի, այսինքն, կմնա 1000 խմ դիմաց 165 դոլարի մակարդակում՝ 2018 թվականի 150 դոլարի փոխարեն:  2019 թվականի ողջ ընթացքում ընկերությունն իր ներքին աղբյուրների հաշվին ծածկում էր 15 դոլարը, դրանով իսկ նպաստելով, որպեսզի վերջնական սպառողի համար ներքին սակագինը պահպանվի նախկին մակարդակում: Սակայն, ինչպես նշել է ՀԾԿՀ ղեկավարը, ՙդա հավերժ չի կարող լինել»: «2013-2018 թվականների պայմանագրով, երբ հանձնաժողովը որևէ գործունեություն չէր իրականացնում, այլ համաձայնագրերով էր պարտադրվում սակագինը, կային կուտակված գումարներ և խնայողություններ, որի արդյունքում և բանակցությունների շնորհիվ դա հնարավոր եղավ: Հիմա քննարկումները շարունակվում են, բայց ամեն դեպքում դա հավերժ չի կարող լինել»,- ասել էր  Գարեգին Բաղրամյանը,  հավելելով, թե՝ ՙդեռևս հայտ չկա, բայց չի բացառվում, որ կլինի՚: