Moody s ընկերությունը <Հայաստանի էլեկտրական ցանցեր> ՓԲԸ-ին շնորհել է երկրի սուվերեն վարկանիշը գերազանցող վարկային վարկանիշ

Արմինֆո.  Moody 's Investors Service միջազգային վարկանիշային գործակալությունը <Հայաստանի էլեկտրական ցանցեր> ընկերությանը շնորհել է ներդրումային կորպորատիվ վարկանիշ (corporate family rating - CFR) և թողարկողի դեֆոլտի վարկանիշ (probability of default rating)՝ համապատասխանաբար Ba2 և Ba2-PD մակարդակում: Կանխատեսումը՝ <կայուն>:

Նման վարկանիշի տրամադրումն աննախադեպ է, ըստ էության, քանի որ այն գերազանցում է Հայաստանի սուվերեն վարկանիշի (Ba3) մակարդակը:

Ինչպես ԱրմԻնֆո-ին հայտնել են ՀԷՑ մամուլի ծառայությունից, վարկանիշը շնորհելու ժամանակ հաշվի են առնվել այնպիսի դրական գործոններ, ինչպիսիք եք՝ սակագնային կարգավորման թափանցիկ համակարգը, ծախսերի փոխհատուցման և համաձայնեցված ներդրումների երկարաժամկետ մեխանիզմները, ֆինանսա–տնտեսական ծրագրավորման բարձր մակարդակը և տեսանելի ապագայում բարձր շահութաբերության միանշանակ սպասումները (լիցենզիայի պայմանները, որոնք հաստատվել են կարգավորիչ մարմնի կողմից մինչև 2027թ.–ը), վերջին տարիներին ընկերության կողմից գրանցված դրական ֆինանսական ցուցանիշները, կարգավորչի անկախությունը կառավարությունից, ընկերության կայուն կարգավիճակը Հայաստանի էլեկտրաէներգետիկ շուկայում։

Զեկույցում նշված էին նաև գործոններ, որոնք սահմանափակել են վարկանիշը` սահմանափակ շուկան, հնարավոր արժութային ռիսկերը, ընկերության աշխատանքի համեմատաբար կարճաժամկետ փորձը կարգավորման նոր պայմանների և ներդրումային ծրագրի շրջանակում։

Գործոնները, որոնց շնորհիվ ՀԷՑ-ը ստացել է սուվերենից ավելի բարձր վարկանիշ, հետևյալ են՝ ֆինանսական կայուն վիճակ, դրամական հոսքերի ձևավորման կանխատեսելիություն և ընկերության նորմատիվա–իրավական բազայի թափանցիկություն, հարաբերական կայունություն հնարավոր տնտեսական անկումների նկատմամբ, ցածր կախվածություն կապիտալի ներքին շուկաներից, ինչը հնարավոր դարձավ միջազգային ինստիտուցիոնալ բանկերի և ֆինանսական ինստիտուտների հետ ընկերության մենեջմենթի համաչափ աշխատանքի շնորհիվ, որոնք ֆինանսավորում են ընկերության ներդրումային ծրագիրը։

Վարկանիշի ապագա փոփոխությունների մասին Moody's–ի կանխատեսումը հետևյալն է. եթե ՀԷՑ–ի սակագնային համաձայնագրերը լինեն անփոփոխ, կայուն օպերացիոն և ֆինանսական ցուցանիշներն ու լիկվիդայնությունը պահպանվեն հետագա 12–18 ամսվա ընթացքում, կարգավորումը նախկինի պես կլինի թափանցիկ և կանխատեսելի պետության կողմից, ընկերության վարկանիշն առնվազն չի վատթարանա։

Moody's–ի կարծիքով վարկանիշի ավելացման հիմնական խթանը Հայաստանի սուվերեն վարկանիշի բարձրացումն է։  

Moody's–ի վարկանիշը հնարավորություն կտա ընկերությանը դուրս գալ արժեթղթերի միջազգային հեղինակավոր շուկաներ, որտեղ եվրապարտատոմսերի տեղաբաշխումը կապահովի էժան և երկարաժամկետ կապիտալի ներգրավում՝ուղղված ներդրումային ծրագրերի իրականացմանն ու դրանց ֆինանսական արդյունավետության ավելացմանը։

Հաղորդագրությունում նշվում է, որ ՀԷՑ–ը սկսեց սրընթաց կերպով զարգանալ, երբ ընկերությունը ձեռք բերեց <Տաշիր> ԸԽ–ն։ Ավելացել է օպերացիոն արդյունավետությունը, բարելավվել են ֆինանսա–տնտեսական ցուցանիշները, կրճատվել են էլեկտրաէներգիայի կորուստները` 13,5%–ից մինչև 7,1%։

ՀԷՑ–ի ռազմավարական առաջնահերթությունն է լայնամասշտաբ ներդրումային ծրագրի իրականացումը, որն ուղղված է ընկերության ողջ գույքային համալիրի արդիականացմանն ու վերազինմանը։ Ներդրումային ծրագիրը նախատեսված է 10 տարով, դրա ընդհանուր ծավալը կազմում է մոտ 1 մլրդ դոլար։

ԱրմԻնֆո-ի տվյալներով ՝ ներդրումային ծրագրի իրականացման համար միջոցներ կներգրավվեն նաև ինստիտուցիոնալ ներդրողներից, այդ թվում ՝ Վերակառուցման եւ զարգացման եվրոպական բանկից (EBRD) (80 մլն եվրո), Ասիական զարգացման բանկից (ADB) (80 մլն դոլար), Եվրասիական զարգացման բանկից (ԵԱԶԲ) (20 մլն դոլար) եւ այլ աղբյուրներից: