Արմինֆո. Հայաստանում բարձր տեխնոլոգիաների զարգացման մակարդակը գրավում է ճապոնացի գործարարների ուշադրությունը։ Այդ մասին ԱրմԻնֆո-ի թղթակցի հետ զրույցում ասել է ՀՀ-ում Ճապոնիայի դեսպան Ջուն Յամադան։
Խոսելով երկկողմ փոխգործակցության մասին՝ դեսպանը նշել է հայ-ճապոնական հարաբերությունների դրական դինամիկան և արդյունավետության բարձրացումը ։ Դեսպանը, մասնավորապես, նշել է երկու ուղղություններով զբոսաշրջային հոսքի ակտիվացումը, ինչպես նաեւ փոխգործակցության աճը մշակութային եւ քաղաքական ոլորտներում:
Որպես Հայաստանի հետ համագործակցության հետագա զարգացման գերակա ուղղություններ՝ դեսպանը նշել է զբոսաշրջության, բարձր տեխնոլոգիաների և գյուղատնտեսության ոլորտները։ "Հայաստանում բարձր տեխնոլոգիաների զարգացման մակարդակը գրավում է ճապոնացի գործարարների ուշադրությունը։ Այդ ոլորտի հետ ես մեծ հույսեր եմ կապում", - նշել է նա։ Ինչ վերաբերում է արտահանման տեսանկյունից հետաքրքրություն ներկայացնող գյուղատնտեսական արտադրանքին, ապա Յամադան մատնանշել է Հայաստանում աճեցված մրգերի և բանջարեղենի բարձր որակը։ Բացի այդ, դեսպանի բարձր գնահատականների են արժանացել միսն ու ձուկը։ "Առայժմ այդ արտադրանքի արտահանման մակարդակը ցածր է, եւ հնարավոր է, որ դա կապված է մեր երկրների միջեւ հեռավորության հետ: Բայց այդ գործոնը կարելի է եւ պետք է հաղթահարել", - նկատել է դեսպանը։
ՀՀ վիճակագրական կոմիտեի տվյալներով՝ 2019 թվականի հունվար-դեկտեմբեր ամիսներին Հայաստանի և Ճապոնիայի միջև առևտրաշրջանառությունը կազմել է 205.8 մլն դոլար ՝ տարեկան 2.1 անգամ աճով: Մասնավորապես, արտահանման ծավալը կազմել է 1.5 մլն դոլար՝ տարեկան 4 անգամ աճով, իսկ ներմուծումը՝ 204.3 մլն դոլար՝ տարեկան 2.1 անգամ աճով ։ ՀՀ ԱԳՆ տեղեկատվության համաձայն Ճապոնիայից Հայաստան ներկրվող հիմնական ապրանքներն են ցամաքային փոխադրամիջոցները, օպտիկական և լուսանկարչական սարքերը, մեքենայական սարքավորումներն ու էլեկտրոնիկան: Ճապոնիա արտահանվող հիմնական ապրանքներն են ալկոհոլային խմիչքները, դեղերը, քիմիական միացությունները, պղինձը, երկաթահամահալվածքները եւ ծխախոտային արտադրանքը:
RUB | 4.23 | 0.01 |
USD | 387.32 | -0.31 |
EUR | 416.10 | 1.18 |
GBP | 486.40 | 1.36 |
CAD | 283.52 | 1.05 |
JPY | 25.30 | 0.30 |
CNY | 53.49 | -0.04 |
CHF | 426.85 | 1.63 |