Ոռոգման համակարգերի արդիականացման ծրագրի շրջանակներում Հայաստանում ավարտվել են Ծիծեռնակաբերդում և Արտաշատում ինքնահոս ոռոգման համակարգերի կառուցման աշխատանքները

Արմինֆո.Ոռոգման համակարգերի արդիականացման ծրագրի շրջանակներում Հայաստանում ավարտվել են Ծիծեռնակաբերդում և Արտաշատում ինքնահոս ոռոգման համակարգերի կառուցման աշխատանքները: Այդ մասին հաղորդում է ՀՀ տարածքային կառավարման և ենթակառուցվածքների նախարարության  (ՏԿԵՆ) մամուլի ծառայությունը:

Աղբյուրի համաձայն, նախագիծն իրագործվում է Եվրասիական զարգացման բանկից ներգրավված վարկային միջոցներով: Ծիծեռնակաբերդում կառուցվել է ինքնահոս ոռոգման համակարգ, մոնտաժվել է 2330 մետր երկարությամբ մետաղական խողովակաշար։ Կառույցի շահագործմամբ ինքնահոս եղանակով կոռոգվի 192 հեկտար հողատարածք, կտեղափոխվի 126լ/վրկ ելքով ոռոգման ջուր, և տարեկան կտնտեսվի մոտ 0,5 մլն.կվտ/ժամ էլեկտրաէներգիա( շուրջ 24 մլն. դրամ): Ներդրումը կազմել է 155.9 մլն․դրամ։  Կառուցվել է նաև Արտաշատի ջրանցքի 5-րդ բաժանարարի ինքնահոս ոռոգման համակարգը։ Մոնտաժվել  է 3922 մետր երկարությամբ ապակեմանրաթելային խողովակաշար, որի արդյունքում ինքնահոս եղանակով կոռոգվի 520 հեկտար հողատարածք, կտեղափոխվի 397լ/վրկ ելքով ոռոգման ջուր, և տարեկան կտնտեսվի մոտ 1.3 մլն.կվտ/ժամ էլեկտրաէներգիա`  շուրջ 59 մլն.դրամ արժեքով։ Այստեղ ներդրվել է 287,1 մլն.դրամ։ 

Հիշեցնենք, որ ծրագիրն իրականացվում է ՏԿԵՆ, ինչպես նաև նախարարության Ջրային կոմիտեի համակարգմամբ։   Եվրասիական զարգացման բանկից ներգրավված  վարկային միջոցներով և ՀՀ կառավարության համաֆինանսավորմամբ իրականացվող` 7 բաղադրիչների ընդհանուր ներդրումը կազմում է 50 միլիոն դոլար։ Ծրագրի ավարտից հետո Հայաստանում տարեկան կխնայվի 11.8 միլիոն կիլովատ/ժամ  էլեկտրաէներգիա, շահագործման ծախսերը կկրճատվեն տարեկան 300 միլիոն դրամով, 10.5 հազար հեկտարով կավելանան ոռոգվող հողատարածքները, 8 պոմպակայան շահագործումից դուրս կգա, կվերականգնվի 64.2 կիլոմետր ջրանցք, իսկ ներտնտեսային ոռոգման ցանցերի վերականգնվող հատվածները կհասնեն 259.1 կիլոմետրի: Շահառուների թիվը գերազանցում է 115 հազարը: