Վարչապետ. կառավարության համար առաջնայինը Հայաստանի Հանրապետության, այդ թվում՝ Ամուլսարի ազդակիր համայնքների հավասարակշռված շահն է

Արմինֆո. Վարչապետ Նիկոլ Փաշինյանն ընդունել է Lydian Canada Ventures ընկերության տնօրենների խորհրդի անդամ Ջեֆֆրի Քոուչին և «Լիդիան Արմենիա» ընկերության գործադիր տնօրեն Հայկ Ալոյանին: Հանդիպման ընթացքում զրուցակիցները քննարկել են Ամուլսարի ծրագրի շուրջ ստեղծված իրավիճակին վերաբերող հարցեր:

Կառավարության մամուլի ծառայության հաղորդման համաձայն, վարչապետը ևս մեկ անգամ ընդգծել է, որ անձամբ իր և կառավարության համար առաջնայինը Հայաստանի Հանրապետության, այդ թվում՝ ազդակիր համայնքների հավասարակշռված շահն է, ու բոլոր որոշումներն ընդունվելու են այս համատեքստում:

Հիշեցնենք, որ 2018-ի ամռանից ակտիվիստներն արգելափակել են դեպի հանք տանող ճանապարհները ՝ դրանով իսկ խոչընդոտելով դրա շահագործումը։ Կառավարությունը խնդրի եւ դրա կարգավորման ուղիների վերաբերյալ հստակ դիրքորոշում չի հայտնում՝   չնայած դա պահանջում են դիմակայության երկու կողմերը։ Սեպտեմբերի 7-ին Lydian Armenia ընկերության պահնորդներըԱմուլսարի ոսկու հանքավայրի մատույցներում ծեծի են ենթարկել բնապահպան-ակտիվիստներին եւ Ջերմուկի բնակիչներին: Ակտիվիստների խոսքով ՝ միջադեպը հրահրել էր ընկերության ղեկավարությունը, որը պահնորդներին հրահանգել էր ուժ կիրառել համայնքի բնակիչների նկատմամբ։ Ի պատասխան՝ ընկերությունը հրապարակել էր տեսանյութ, որտեղ երևում է, թե ինչպես են մի քանի հոգի քարեր նետում "Լիդիան Արմենիա" դիտակետի ուղղությամբ և հարվածում պահակային շներին։

Ամուլսարի ոսկու հանքավայրը Հայաստանում մեծությամբ երկրորդ պաշարն է ։ Ընկերության տեղեկատվության համաձայն ՝ հանքավայրը պարունակում է շուրջ 73733 կգ ոսկի ՝ մեկ տոննայում համար 0.78 գ միջին պարունակությամբ, ինչպես նաեւ 294.367 տոննա արծաթ՝ մեկ տոննայում  9.29 գ միջին պարունակությամբ: Այն գտնվում է երկրի հարավ-արևելքում ՝ Ջերմուկ առողջարանային քաղաքից 13 կմ հեռավորության վրա, Արփա և Որոտան գետերի միջագետքում։ Բնապահպաններն ու շարքային քաղաքացիները մտահոգված են, որ հանքի շահագործումը կարող է հանգեցնել Ջերմուկի հանքային ստորերկրյա ջրերի եւ Սեւանա լճի աղտոտմանը: