Փորձագետ. Կառավարության եւ խորհրդարանի օրակարգը չի արտացոլում այն մարտահրավերները, որոնց այսօր բախվել է Հայաստանը

Արմինֆո. Կառավարության և խորհրդարանի օրակարգը չի արտացոլում այն մարտահրավերները, որոնց այսօր բախվել է Հայաստանը։ Դեկտեմբերի 16-ին տեղի ունեցած մամուլի ասուլիսի ժամանակ նման կարծիք հայտնել է Հայաստանի գործատուների հանրապետական միության նախագահ, տնտեսագետ Գագիկ Մակարյանը։

Այս համատեքստում նա ընդգծել է, որ օրակարգը հիմնված է զգացմունքային ցանկությունների, այլ ոչ թե դիվանագիտական ու տնտեսական խնդիրների ու նպատակների վրա։ Մակարյանը նշել է, որ կառավարությունը պետք է աշխատի շտաբային մոդելով ։ "Ամեն օր տա առաջադրանքներ, եւ ամեն օր ստուգի դրանց կատարումը, որպեսզի համոզված լինի, որ աշխատանքը առաջ է ընթանում", - ասել է նա:

Ընդ որում, փորձագետն ուշադրություն է հրավիրել այն հանգամանքին, որ երկրի տնտեսական բլոկի պատասխանատուները պետք է կտրուկ քայլեր կատարեն, ինչն այսօր մենք չենք տեսնում։ Մակարյանն ընդգծել է, որ այս բլոկում բացակայում է հայեցակարգային մոտեցումը, որի իրականացումը կարող էր շտկել իրավիճակը: Նա նաեւ մատնանշել է երկրում սոցիալական իրավիճակի սրումը, այն դեպքում, երբ սոցիալական հարցերի եւ աշխատանքի նախարարն լիովին չի տիրապետում իրավիճակին:

Բացի այդ, տնտեսագետը կարևորել է արտաքին գործերի նախարարության, Ազգային անվտանգության ծառայության և Պաշտպանության նախարարության համակարգված աշխատանքը։ Նման համագործակցությունը, նրա կարծիքով, թույլ կտա ուժեղացնել դիվանագիտական բաղադրիչը, որը հետագայում կբացառեր ֆորս-մաժորները։ Մասնավորապես, Մակարյանն ընդգծել է, որ Պաշտպանության նախարարությունը պարտավոր է անվտանգության երաշխիքներ տալ՝ երկրից բիզնեսի եւ միջոցների արտահոսքից խուսափելու համար:

"Ամեն ինչ փոխկապակցված է։ Եվ եթե մենք չապահովենք այդ շղթայի բոլոր օղակները, ապա առաջիկայում

Կբախվենք ինչպես գործազրկության աճի, այնպես էլ աղքատության մակարդակի բարձրացման", - նշել է նա։ Այս համատեքստում փորձագետը հիշեցրել է, որ հունիսի վերջի տվյալներով գործազրկության մակարդակը կազմում է 17.5 տոկոս: Սակայն, տնտեսագետի համոզմամբ, այսօր արդեն կարելի է խոսել 19 տոկոսի մասին։ Խոսելով աղքատության մասին՝ Մակարյանը նշել է, որ, պաշտոնական տվյալներով, աղքատության մակարդակը կազմում է 26,4 տոկոս, բայց այդ դեպքում էլ այդ ցուցանիշը, ըստ նրա, այսօր շատ ավելի բարձր է։

"Ներառական տնտեսություն" արտահայտությունը որակելով ոչ այլ ինչ, քան մոդայիկ բառակապակցություն, Մակարյանը բացառել է այդ արտահայտության օգտագործումը այսօրվա իրականության մեջ։ "Մեր տնտեսությունը ներառական չէ, քանի որ աճն էական չէ բնակչության որոշակի լայն շերտերի համար, մինչդեռ պետք է հասանելի լինի բոլոր քաղաքացիներին", - ասել է նա: