Ուրբաթ, 8 Հունվարի 2021 13:31

Արմինֆո.<Ես ինձ չեմ ների, եթե այս տարի տնտեսության աճի երկնիշ ցուցանիշներ չապահովենք>, - Հանրային հեռուստաընկերությանը տված հարցազրույցում հայտարարել է էկոնոմիկայի նախարար Վահան Քերոբյանը:

 

Նա ընդգծել է, որ չնայած Ֆինանսների նախարարության զուսպ կանխատեսումներին (4,8 տոկոս տնտեսական աճ - խմբ.)՝ Էկոնոմիկայի նախարարությունն ավելի հավակնոտ, ագրեսիվ ծրագրեր ունի, որոնք մտադիր է կյանքի կոչել այս տարի:

 

Քերոբյանը պարզաբանել է, որ երկու ամսից կմշակվի նոր տնտեսական ծրագիր, որը կհամապատասխանի ինչպես ներքին, այնպես էլ՝ գլոբալ մարտահրավերներին: <Մեր քաղաքականությունն ուղղված է լինելու տնտեսությունը գիտատար դարձնելուն։ Ինձ հայտնի են բոլոր բացերն ու խոչընդոտները, որոնց բախվում է Հայաստանում բիզնես հատվածը ։ Եվ մենք պետք է աշխատենք բրենդների, մարքեթինգի, գլոբալ աշխարհին ուղղված ապրանքների ստեղծման ուղղությամբ>, - ասել է նախարարը ։

 

Նա նշել է, որ վերջին 11 տարիների ընթացքում Հայաստանում գործում է, այսպես կոչված, արտահանման կողմնորոշված քաղաքականություն, սակայն դե ֆակտո այն ամենը, ինչ իրականացվում էր այս ընթացքում, ավելի շուտ արտահանողների դեմ էր, քան ուղղված էր նրանց աջակցությանը։

 

Այս համատեքստում էկոնոմիկայի գերատեսչության ղեկավարը տեղեկացրել է, որ այսօր նախարարությունը բիզնեսի աջակցման լայնածավալ ծրագիր է մշակում ։ Քերոբյանը, մի փոքր բացելով փակագծերը, տեղեկացրել է, որ խոսքը պարտքային գործիքի մասին է, որը բիզնեսին թույլ կտա 2021 թվականին աշխատել առանց խոչընդոտների։ <Մեզ մնացել է համոզել Ֆինանսների նախարարության եւ Կենտրոնական բանկի մեր գործընկերներին> - հավելել է նա:

 

Միաժամանակ նախարարը հայտնել է Ֆինանսների նախարարության հետ որոշ տարաձայնությունների մասին ՝ կապված բիզնեսին հարկային արտոնություններ տրամադրելու հետ ։ <Ֆինանսների նախարարությունը փորձում է առավելագույնի հասցնել ձեր հարկերը, ինչը բարդացնում է փոքր բիզնեսի կյանքը։ Իսկ մենք գիտենք մեթոդը, թե ինչպես հեշտացնել բիզնեսի կյանքը ՝ բարձրացնելով պետբյուջեի եկամուտների մակարդակ։ Դա ավելի արդյունավետ միջոց կլինի, քան հարկերի բարձրացումը,քանի որ նման խստացումները հանգեցնում են ստվերի>, - ասել է նախարարը։

 

Հիշեցնենք, որ Կենտրոնական բանկն էլ ավելի է վատթարացրել 2020 թվականին Հայաստանի ՀՆԱ - ի անկման կանխատեսումը ՝ նախկին 6,2 տոկոսից հասցնելով 7,2 տոկոսի: Այս տարվա հոկտեմբերին Համաշխարհային բանկի նորացված կանխատեսմամբ ՝ 2020 թվականին Հայաստանի ՀՆԱ-ի անկումը կկազմի 6,3%՝ նախկինում սպասվող 2,8%-ի եւ 2019թ. փաստացի 7,6% - ի աճի դիմաց: 2021թ. ՀԲ-ն ակնկալում է, որ Հայաստանի ՀՆԱ աճը կհասնի 4,6%-ի։ԱՄՀ-ն իր նոյեմբերյան կանխատեսման մեջ 2020 թվականին Հայաստանի ՀՆԱ-ի անկում էր սպասում ավելի քան 7 տոկոսով ՝ 2021 թվականին համեստ աճի ելքով:

 

ՀՀ Վիճակագրական կոմիտեի տվյալներով ՝ 2020 թվականի հունվար-նոյեմբերին տնտեսական ակտիվության անկումն արդեն խորացել է մինչև տարեկան 7,2 տոկոս, ընդ որում՝ միայն նոյեմբերին անկումը կազմել է 10,2 տոկոս, և գրեթե նույն անկումն արձանագրվել է 2019թ.նոյեմբերի համեմատ ՝ 10,3 տոկոս։