Արմինֆո.Արցախին օգնելու համար ՀՀ կառավարությունը մշակել է 20 ծրագիր, որոնց մի մասի իրականացումը դեռևս շարունակվում է։ Այդ մասին, ապրիլի 15-ին ԱԺ-ում իր ելույթում հայտարարել է փոխվարչապետ Մհեր Գրիգորյանը։ Նա նշել է, որ օգնություն ստացած շահառուների ընդհանուր թիվը գերազանցել է 150 հազարը։
Մասնավորապես, փոխվարչապետը մանրամասն ներկայացրել է ՀՀ կառավարության կողմից իրականացված ծրագրերը՝ նշելով վճարված գումարները եւ շահառուների թիվը: Ըստ նրա, մոտ 600 ընտանիքի, որոնք պատերազմի հետևանքով ունեն անհետ կորած, զինծառայողների ապահովագրության հիմնադրամի կողմից վճարվել է, ընդհանուր առմամբ, 1 մլրդ դրամ։ Մարտական գործողությունների արդյունքում հաշմանդամ դարձած զինծառայողներին 6 ամսվա ընթացքում վճարվում էր 100 հազարական դրամ: Այս ծրագրի շահառուների ընդհանուր թիվը կազմել է 265, որոնք, ընդհանուր առմամբ, ստացել են 200 մլն դրամ։ Արցախի քաղաքացիներին ապաստան տված ընտանիքներին ՀՀ կառավարությունն, ընդհանուր առմամբ, տրամադրել է 1.1 մլրդ դրամ։ Նման ընտանիքների թիվը կազմել է 8 410։
Դրա հետ մեկտեղ, Հայաստանի կառավարությունը ամբողջությամբ ծածկել է 4 210 ուսանողի ուսման վարձը: Այս ծրագրի ընդհանուր բյուջեն կազմել է 900 մլն դրամ։
Այն ընտանիքներին, որոնք ունեն զոհված կամ վիրավորված քաղաքացիական անձ, պետությունը 1-5 մլն դրամի չափով միանվագ օգնություն է տրամադրել։ Այս ծրագրի շրջանակներում, ընդհանուր առմամբ, վճարվել է 200 մլն դրամ՝ 56 ընտանիքի։
Վիրավորում ստացած զինծառայողներին, որոնց թիվը կազմում է 6 500 շահառու, վճարվել է 3.3. մլրդ դրամ։
Սյունիքի մարզի Շուռնուխ և Որոտան համայնքների բնակիչները միանվագ աջակցություն են ստացել 300 հազ. դրամի չափով և ամսական 68 հազ. դրամ ՝ կես տարվա ընթացքում: Այդ ծրագրի ընդհանուր բյուջեն կազմել է 15 մլն դրամ։
Փոխվարչապետի հավաստմամբ՝ Հայաստանում անշարժ գույքը կորցրած 77 քաղաքացիների, ընդհանուր առմամբ, վճարել են 50 մլն դրամ: Արցախում անշարժ գույքը կորցրածներին վճարվել է միանվագ 250 հազար դրամի չափով օգնություն: Այս ծրագրի շահառուների թիվը 5 276 է, որոնք ստացել են, ընդհանուր առմամբ, 1.1 մլրդ դրամ։
Հայաստանի կառավարության ամենամեծ ծրագրերից մեկի շահառուներն են կանայք և երեխաները, որոնց, ընդհանուր առմամբ, վճարվել է 5.3 մլրդ դրամ։ Շահառուների ընդհանուր թիվը կազմել է 77 420 մարդ։
Միանվագ օգնություն է տրամադրվել նաև արդեն Արցախի վերահսկողությունից դուրս գտնվող բնակավայրերի բնակիչներին։ Ծրագիրը նախատեսում էր միանվագ օգնություն 300 հազար դրամի չափով։ Այսպիսով, 33 981 մարդ ստացել է 10 200 մլրդ դրամ։
Բացի այդ, ՀՀ կառավարությունը միանվագ օգնություն է տրամադրել մինչև 5 տարեկան երեխաներին։ Ծրագրի շահառուների թիվը հասել է 13 873-ի, բյուջեն կազմել է 300 մլն դրամ։
Մհեր Գրիգորյանը հաղորդել է, որ Արցախի կառավարությանը դրամաշնորհի տեսքով տրամադրվել է նաև 6 մլրդ դրամ թոշակների և նպաստների, քաղծառայողների աշխատավարձի, անհետաձգելի շինարարական աշխատանքների համար՝ սկսած դեկտեմբերից, 3 ամսում կոմունալ ծառայություններ դիմաց վճարելու համար: Միաժամանակ, փոխվարչապետը հաղորդել է, որ նոյեմբերից Հայաստանից դեպի Արցախ անվճար ուղեւորափոխադրումներ են իրականացվում:
Նա նաեւ պատմել է, որ բնակարանային խնդիրների՝ շինարարության եւ քաղաքացիներին բնակարաններով ապահովելու համար ստեղծվել է աշխատանքային խումբ, որի կազմում ընդգրկված են մի շարք պատգամավորներ: Այդ նպատակով, ինչպես արդեն հայտարարվել էր, Հայաստանի կառավարությունը կտրամադրի 52 մլրդ դրամ։ Բացի այդ, շուտով Արցախի կառավարությունը, փոխվարչապետի խոսքով, կհաստատի իրավաբանական եւ ֆիզիկական անձանց գույքին հասցված վնասի փոխհատուցման ծրագիրը:
Այս նոր ծրագրի շրջանակներում Հայաստանի կառավարությունը, ինչպես նշել է նա, նույնպես մտադիր է ֆինանսական օգնություն ցուցաբերել։
"Այսպիսով, Արցախում մենք իրականացնում ենք, կարելի է ասել, երեք մեծ ծրագիր ՝ սոցիալական օգնություն, բնակարաններով ապահովում և վնասի փոխհատուցում: Վստահ եմ, որ ողջ տարին մենք աշխատելու ենք այդ ծրագրերի շրջանակներում", - ասել է նա ։