«Էյր Արաբիա» ավիաընկերության հետ պայմանավորվածության շրջանակում Հայաստանում կստեղծվի ազգային ավիափոխադրող

Արմինֆո. Հանրապետության նախագահ Արմեն Սարգսյանն այսօր հյուրընկալել է Արաբական Միացյալ Էմիրությունների ազգային փոխադրող «Էյր Արաբիա» ավիաընկերության տնօրենների խորհրդի նախագահ, շեյխ Աբդուլլահ բին Մոհամեդ ալ Թանիին և ընկերության տնօրեն Ադել Աբդուլլահ Ալ Ալիին:

Ինչպես հաղորդել է ՀՀ նախագահի աշխատակազմը, Մերձավոր Արևելքի ու Հյուսիսային Աֆրիկայի տարածաշրջանների ամենախոշոր ավիափոխադրող «Էյր Արաբիա»-ն և Հայաստանի պետական հետաքրքրությունների ֆոնդն այսօր ստորագրելու են հայկական նոր ազգային ավիաընկերության ստեղծման վերաբերյալ համաձայնագիր: Ավափոխադրումների, օդային հաղորդակցության ոլորտում հայ-էմիրաթական համագործակցության վերաբերյալ առաջին քննարկումները տեղի են ունեցել ԱՄԷ-ում, նախագահ Արմեն Սարգսյանի և Շարժայի կառավարիչ, շեյխ, դոկտոր Սուլթան բին Մոհամմեդ Ալ Քասիմիի հանդիպման ժամանակ: Հանրապետության նախագահն իր ջերմ ողջույններն ու բարեմաղթանքներն է փոխանցել Շարժայի կառավարչին՝ նախաձեռնությունների իրականացմանն աջակցելու համար:

Նախագահ Սարգսյանը ողջունել է համագործակցությունը միջազգային խոշոր ավիափոխադրողի հետ և հայկական ազգային ավիաընկերության ստեղծումը՝ գոհունակություն հայտնելով, որ Արաբական Միացյալ Էմիրություններ իր այցերի ընթացքում բարձր մակարդակով ձեռք բերված պայմանավորվածությունները երկկողմ հետևողական աշխատանքի և շարունակական ջանքերի շնորհիվ կյանքի են կոչվում: Այդ կապակցությամբ նախագահ Սարգսյանը բարձր է գնահատել ՀՀ կառավարության, մասնավորապես փոխվարչապետի պաշտոնակատար Տիգրան Ավինյանի, ՀՀ քաղաքացիական ավիացիայի կոմիտեի նախագահ Տաթևիկ Ռևազյանի և Հայաստանի պետական հետաքրքրությունների ֆոնդի ղեկավար Դավիթ Փափազյանի՝ շուրջ երկու տարի տևած արդյունավետ աշխատանքը:

«Հայաստանը ներկայումս բավականին բարդ ժամանակահատված է ապրում: Մենք գնահատում ենք մեր բարեկամներին, ովքեր հատկապես այս փուլում մեր կողքին են, նոր համագործակցություն ու նոր նախագիծ են սկսում Հայաստանում: Մենք արաբական երկրների հետ ջերմ բարեկամական հարաբերություններ ունենք, և ձեր ներկայությունն այս նախագծում դրա մասին է վկայում: Ակնկալում ենք ավելի շատ նախագծեր ու նախաձեռնություններ», - ասել է նախագահ Սարգսյանը: Նա վստահություն է հայտնել, որ «Էյր Արաբիա» ավիաընկերության գործունեությունը հայաստանյան շուկայում նոր խթան կդառնա ավիափոխադրումների ոլորտի զարգացման համար և կնպաստի երկու պետությունների փոխգործակցության սերտացմանը:

Շնորհակալություն հայտնելով ջերմ ընդունելության համար՝ շեյխ Աբդուլլահ բին Մոհամեդ ալ Թանին ասել է, որ բարձր է գնահատում հայ-էմիրաթական միջպետական հարաբերությունները և այն զարգացնելու ուղղությամբ անձամբ նախագահ Սարգսյանի ջանքերը: Նա ընդգծել է, որ երկու կողմից էլ առկա էր համագործակցությունը զարգացնելու մեծ հետաքրքրվածություն, ինչն էլ հիմք հանդիսացավ համատեղ նոր նախագիծը կյանքի կոչելուն: «Էյր Արաբիա» -ի տնօրենների խորհրդի նախագահը վստահություն է հայտնել, որ օդային նոր կամուրջը և հատկապես էմիրաթական ավիաընկերության մասնակցությամբ հայկական ազգային ավիափոխադրողի հիմնումը կդառնան Հայաստանի և ԱՄԷ միջև առևտրատնտեսական և գործարար կապերի ամրապնդմանն ուղղված ևս մեկ հուսալի քայլ:

«Էյր Արաբիա»-ի ղեկավարությունն ու Հայաստանի պետական հետաքրքրությունների ֆոնդի գործադիր տնօրենը նախագահ Սարգսյանին տեղեկություներ են ներկայացրել նախատեսվող աշխատանքների ու ծրագրերի մասին: Նշվել է, որ հայկական ազգային փոխադրողի թռիչքների իրականացումը նախատեսվում է արդեն հաջորդ տարի:

Հիշեցնենք, որ 2013 թվականին Հայաստանը մնաց առանց ազգային ավիափոխադրողի՝ "Արմավիա" ընկերության սնանկացման պատճառով, ինչից հետո երկրի ավիաշուկայից դուրս եկավ նաեւ եւ «Էյր Արմենիա» ընկերությունը՝ չդիմանալով ռուսական փոխադրողների հետ մրցակցությանը: Նշենք, որ «Էյր Արաբիա»-ն արաբական բյուջետային ավիաընկերություն է, որը ստեղծվել է 2009 թվականին:  Կենտրոնակայանը գտնվում է Շարժա քաղաքում: «Էյր Արաբիա»-ն աշխատում է Շարժայի եւ Ալեքսանդրիայի օդանավակայաններից, ինչպես նաեւ Մարոկկոյի չորս օդանավակայաններից դեպի Մերձավոր Արեւելքի, Հարավարեւելյան Ասիայի, Եվրոպայի եւ ԱՊՀ երկրներ ուղեւորափոխադրումների շուկայում:

Ավիաընկերությունը առաջին բյուջետային ավիափոխադրողն է Մերձավոր Արեւելքում եւ թռիչքներ է իրականացնում դեպի աշխարհի 89 քաղաքներ: Ավիաընկերությունն ունի իր դուստր ստորաբաժանումները ' Air Arabia Egypt Ալեքսանդրիայում (Եգիպտոս) եւ Air Arabia Maroc՝ Կասաբլանկայում:

Հիշեցնենք նաեւ, որ այս տարվա մայիսին հայտնի դարձավ, որ SIL Group կոնցեռնը Մոլդովական FlyOne ավիաընկերության հետ համատեղ շուտով դուրս կգա հայկական ուղևորափոխադրումների շուկա FlyOne ARMENIA ապրանքանիշի ներքո, որը հանդես կգա որպես երկրի ազգային ավիափոխադրող: Ինչպես ասվում էր SIL Group-ի հաղորդագրության մեջ, FlyOne Armenia ՍՊԸ-ն, ընթացակարգի համաձայն, հայտ է ներկայացրել ինքնաթիռի շահագործողի հավաստագիր ստանալու համար գարնան սկզբին: Այստեղ հաղորդել էին, որ մայիսի 26-ի առավոտյան FlyOne Armenia Air Fleet ավիաընկերության Airbus A320 առաջին ինքնաթիռը ժամանել է Երեւանի "Զվարթնոց" միջազգային օդանավակայան ՝ անհրաժեշտ տեխնիկական զննություն անցնելու համար: