Կառավարությունը 50 մլն դոլար կհատկացնի Արենի համայնքը գինեգործության բնօրրանի վերածելու համար

Արմինֆո.Այսօր մենք ոչ պատշաճ կերպով կիրառում ենք "գինեգործության օրրան" ապրանքանիշը Արենի համայնքի նկատմամբ։ Հանրային հեռուստաընկերությանը տված հարցազրույցում այդպիսի կարծիք է հայտնել  Հայաստանի էկոնոմիկայի նախարար Վահան Քերոբյանը:

Մասնավորապես, նա պատմել է, որ իտալական խոշոր համալսարանի հետ համագործակցությամբ արդեն ավարտվել են Արենիում գինու համտեսման կենտրոնի եւ համայնքի կոնցեպտի պլանավորման աշխատանքները, որը մի փոքր ձեւափոխվելու է եւ նոր քաղաքաշինական տեսք է ստանալու:

Այս համատեքստում նախարարը տեղեկացրել է, որ այս պահին սեղանին արդեն կա 50 մլն դոլարի ներդրումային նախագիծ, որը կապահովվի երկրի կառավարության կողմից: "Դա կհանգեցնի տարածաշրջանում մեծ թվով նոր մասնավոր ներդրումների։ Արդյունքում մենք կունենանք հզոր զբոսաշրջային ուղղություն, այդ թվում ՝ աշխարհի քարտեզի վրա", - հայտարարել է Քերոբյանը։

Հիշեցնենք, որ Արենի համայնքը համարվում է Հայաստանի "գինու մայրաքաղաք", որը գտնվում է Վայոց Ձորի մարզում: Այս տեղանքը հայտնի է Արենի տեսակի յուրահատուկ խաղողով, որն էլ հիմք է ծառայում տեղական գինիների արտադրության համար։ Այս սորտը բուն հայկական է։ Հարկ է նշել, որ հենց այստեղ ՝ Արենի գյուղից ոչ հեռու գտնվող քարանձավներից մեկում, հայտնաբերվել է աշխարհում հնագույն՝ ավելի քան 6000 տարվա պատմություն ունեցող "Արենի-1" գինեգործարանը։

Ըստ ՀՀ վիճակագրական կոմիտեի տվյալների, 2021 թվականի հունվար-հուլիս ամիսներին Հայաստանում արտադրվել է ավելի քան 7 մլն լիտր գինի, ինչը 44,6 տոկոսով գերազանցում է մեկ տարվա վաղեմության ցուցանիշը: