Հայաստանի կառավարությունը որպես նվիրատվություն ընդունել է "Զանգեզուրի պղնձամոլիբդենային կոմբինատ" ՓԲԸ բաժնետոմսերի 25%-ը՝ ռուսական ընկերությունից

Արմինֆո.Հայաստանի կառավարությունը "Զանգեզուրի պղնձամոլիբդենային կոմբինատ"ՓԲԸ բաժնետոմսերի 25%-ը ընունել է որպես նվիրատվություն ռուսական "Արդյունաբերական ընկերություն" ԲԸ-ից: Որոշումը կայացվել է "գրավոր քվեարկության" կարգով եւ սեպտեմբերի 30-ի ուշ երեկոյան հրապարակվել կառավարության պաշտոնական կայքում:

«Հիմք ընդունելով Հայաստանի Հանրապետության քաղաքացիական օրենսգրքի 594-րդ հոդվածը, ինչպես նաև հաշվի առնելով «Զանգեզուրի պղնձամոլիբդենային կոմբինատ» փակ բաժնետիրական ընկերության բաժնետոմսեր նվիրելու առաջարկությունը` Հայաստանի Հանրապետության կառավարությունը ո ր ո շ ու մ է.
 

1. Որպես նվիրատվություն Հայաստանի Հանրապետությանը «Արդյունաբերական ընկերություն» բաժնետիրական ընկերությունից ընդունել «Զանգեզուրի պղնձամոլիբդենային կոմբինատ» փակ բաժնետիրական ընկերությունում վերջինիս սեփականության իրավունքով պատկանող 25 տոկոս (քսանհինգ տոկոս) 412,250.75 (չորս հարյուր տասներկու հազար երկու հարյուր հիսուն ամբողջ յոթանասունհինգ) հատ հասարակ (սովորական) բաժնետոմսերը՝ 20,000 (քսան հազար) դրամ անվանական արժեքով բաժնետոմսերը՝ բաժնետոմսերի կառավարման լիազորությունը վերապահելով Հայաստանի Հանրապետության վարչապետի աշխատակազմին:
 

2. Հայաստանի Հանրապետության վարչապետի աշխատակազմին` տասնօրյա ժամկետում «Արդյունաբերական ընկերություն» բաժնետիրական ընկերության հետ համատեղ սահմանված կարգով ապահովել սույն որոշման 1-ին կետում նշված բաժնետոմսերի նվիրատվության պայմանագրի կնքումն ու գույքային իրավունքների պետական գրանցումը՝ սույն որոշման 1-ին կետում նշված նվիրաբերող ընկերության միջոցների հաշվին», - ասվում է կառավարության որոշման մեջ:
 

Տեղեկատվություն այն մասին, թե բաժնետոմսերի 60%-ը երբ է անցեկ "Արդյունաբերական ընկերություն" ԲԸ տնօրինմանը, չի տրամադրվում: Ուշագրավ է այն հանգամանքը, որ ըստ ավելի վաղ եղած տեղեկությունների, որպես "Զանգեզուրի պղնձամոլիբդենային կոմբինատ" ՓԲԸ-ի (Zangezur Copper Molybdenum Combine CJSC) (ԶՊՄԿ) բաժնետոմսերի սեփականատեր պաշտոնապես հանդես էին գալիս գերմանական Cronimet Mining ընկերությունը (60%), "Երևանի մաքուր երկաթի գործարան" ԲԲԸ (15%), "Armenian Molybdenum Production" ՍՊԸ-ն և "Զանգեզուր Մայնինգ" ՍՊԸ-ն (12,5-ական %):

Իսկ տեղեկատվության բաց աղբյուրների համաձայն, որպես "Արդյունաբերական ընկերություն" ԲԸ գլխավոր տնօրեն, որը գրանցված է 12.12.2017  ՌԴ-ում, հանդես է գալիս Վիկտորիա Ալեքսնադրի Սոլդատովան (նշվում է, որ այն գտնվում է փոքր եւ միջին ձեռնարկատիրության սուբյեկտների ռեեստրում 10.12.2018-ից՝ որպես միկրո ձեռնարկություն): Որպես ԲԸ հիմնադիր նշված է Սերգեյ Սերգեյի Շչերբակովը:

"Արդյունաբերական ընկերություն" ԲԸ-ի վերաբերյալ տեղեկատվություն հնարավոր չէ գտնել նաև ԶՊՄԿ իրական շահառուների ռեեստրում: Այնտեղ նշված են տվյալներ Մհեր Պոլոսկովի (ՌԴ քաղաքացի՝ 7,5 տոկոս բաժնեմասով), Գուրգենի Համբարյանի (ՀՀ քաղաքացի, բաժնեմասը՝ 2,5 տոկոս), Կարեն Հակոբյանի (ՀՀ քաղաքացի, բաժնեմասը ՝  2,5 տոկոս), Միխայիլ Զուրաբովի (ՌԴ քաղաքացի, ՌԴ առողջապահության եւ սոցիալական զարգացման նախկին նախարար, Ուկրաինայում Ռուսաստանի Դաշնության նախկին արտակարգ եւ լիազոր դեսպան, բաժնեմասը ՝ 12,5 տոկոս) մասին:

Հիշեցնենք, որ ապրիլին Նիկոլ Փաշինյանը հաղորդել էր, թե Հայաստանի կառավարությունն իր օտարերկրյա գործընկերներից ահազանգեր է ստացել, որ Զանգեզուրի պղնձամոլիբդենային կոմբինատում, որն, անշուշտ, ազգային հարստություն է, կասկածելի եւ անհասկանալի գործընթացներ են տեղի ունենում: Այդ առումով նա նշել է 2000-ականներին վերադառնալու անհրաժեշտությունը, երբ ԶՊՄԿ-ն սեփականաշնորհվեց։ Ինչպիսին էր սեփականաշնորհման գինը, սխեման, ում կողմից, ում անուններն են շրջանառվում, հետո ով է դարձել սեփականատերը, ինչով են նրանք զբաղվում այսօր։ "Այո, Զանգեզուրի պղնձամոլիբդենային կոմբինատը Հայաստանի խոշորագույն հարկատուներից է, սակայն դա չի փոխում իրավիճակը։ Իսկ ո՞վ ասաց, որ կոմբինատի կողմից վճարվող հարկերը չպետք է ավելի շատ լինեին։ Այս բոլոր հարցերին հայ ժողովուրդը պետք է պատասխաններ ստանա", - ասել էր կառավարության ղեկավարը, հիշեցնելով, որ օրենսդրության համաձայն, երկրի ընդերքը պատկանում է բացառապես նրա ժողովրդին։ Դեռևս նախորդ տարվա հունվարին Նիկոլ Փաշինյանը հանձնարարել էր ստուգել ԶԼՄ-ների տեղեկություններն այն մասին, որ Հայաստանի խոշորագույն հանքարդյունաբերական ձեռնարկության՝ Զանգեզուրի պղնձամոլիբդենային կոմբինատի բաժնետերերի թվում են նախկին քաղաքական ռեժիմի բարձրաստիճան անձանց հետ փոխկապակցված մարդիկ: "Մենք մի քանի ենթադրություն ունենք այդ մասին։ Կան նախնական տվյալներ, բայց դրանք այն մակարդակի չեն, որպեսզի մենք կարողանանք դրանք հրապարակել", - այն ժամանակ ասել էր Փաշինյանը։