Գնել Սանոսյանը եւ Կիշան Դան Դեվալը քննարկել են "Հյուսիս-հարավ" ներդրումային ծրագիրը եւ իրանական Չաբահար նավահանգստի հնարավորությունները

Արմինֆո. ՀՀ տարածքային կառավարման և ենթակառուցվածքների նախարար Գնել Սանոսյանն ընդունել է ՀՀ-ում Հնդկաստանի արտակարգ և լիազոր դեսպան Կիշան Դան Դեվալին։

ՏԿԵ նախարարության մամուլի ծառայության հաղորդման համաձայն, հանդիպմանը մասնակցել են նաև ՀՀ ՏԿԵ նախարարի տեղակալ Քրիստինե Ղալեչյանը և ՀՀ-ում Հնդկաստանի դեսպանության երկրորդ քարտուղար Տեջաս Սանջայ Պագարը։

Գնել Սանոսյանը շնորհակալության է հայտնել դեսպանին` հայ-հնդկական համագործակցությանը վերաբերող հարցերը համատեղ քննարկելու հնարավորության համար։

Կիշան Դան Դեվալը շնորհավորել է նախարարին նշանակման կապակցությամբ և վստահեցրել, որ կներդրվեն բոլոր ջանքերն առկա համագործակցությունը երկուստեք հետաքրքրություն ներկայացնող ոլորտներում ընդլայնելու ուղղությամբ։

Դեսպանն ընդգծել է, որ հնդկական կողմը հետաքրքրվածություն է ցուցաբերում Հայաստանում ենթակառուցվածքների զարգացման ծրագրերով և ուրախ կլինի քննարկել այդ ուղղությամբ համագործակցության հնարավորությունները։ Դեսպանի խոսքով՝ Հնդկաստանում այս ուղղությամբ հաջողություն գրանցած բավականին մեծ ընկերություններ կան, որոնք կարող են մասնակցություն ունենալ Հայաստանում իրականացվող ծրագրերին։

Նախարարն իր հերթին կարևորել է հնդկական կողմի հետ ակտիվ աշխատանքն ու հայ-հնդկական համագործակցության ամրապնդումը՝ ընդգծելով, որ հայ-հնդկական բերակամական հարաբերությունները պատմական խոր արմատներ ունեն։ Զրույցի ընթացքում անդրադարձ է կատարվել հյուսիս-հարավ ճանապարհային միջանցքի ներդրումային ծրագրի ընթացքին, Հայաստանի համար Չաբահար նավահանգստի ընձեռած հնարավորություններին։

Կողմերը պայմանավորվածություն են ձեռք բերել տեղեկատվություն փոխանակել և քննարկել հյուսիս-հարավ ճանապարհային միջանցքի ներդրումային ծրագրի շրջանակներում համագործակցության հնարավորությունները:

Նշենք, որ Չաբահար նավահանգիստը՝ Իրանի տարածաշրջանի խոշորագույն նավահանգիստը, Կենտրոնական Ասիան բաց ծովին կապող մոտակա կետն է։ Սա ռազմավարական կետ է Ասիայից Եվրոպա ապրանքների տարանցման համար։ Նավահանգիստը ունի տարեկան բեռնման եւ բեռնաթափման մոտ 8,5 մլն տոննա հզորությունը, այնտեղ կարող են մտնել օվկիանոսային նավերը մինչեւ 100 000 տոննա բեռով: Նախատեսվում է նաև միջազգային օդանավակայանի բացում Չաբահար նավահանգստում ։ Ավելի վաղ հաղորդվել էր, որ նավահանգիստը լիովին պատրաստ կլինի աշխատանքի ապրիլ-մայիս ամիսներին: Չաբահարը կառավարվում է Հնդկաստանի ֆինանսական ներդրումների հաշվին, Իրանի եւ Հնդկաստանի միջեւ կնքված պայմանագրի համաձայն, այդ նավահանգստի աշխատանքը Հնդկաստանի վարձակալության է հանձնվել 10 տարի ժամկետով եւ թույլ է տալիս ապրանքների տարանցումն իրականացնել հետեւյալ եղանակներով ՝ Հնդկաստանից Իրանի տարածքով Աֆղանստան եւ Կենտրոնական Ասիայի երկրներ ՝ շրջանցելով Պակիստանը:

Դեռևս 2021 թվականի մարտին Իրանում Հնդկաստանի դեսպանը հայտարարեց, որ երկիրը պատրաստվում է Հայաստանը ներառել իրանական Չաբահար նավահանգստի միջոցով ստեղծվող "Հյուսիս - Հարավ" տրանսպորտային միջանցքում։ Արդեն այս տարվա օգոստոսին Հայաստանում Հնդկաստանի դեսպանատանը ԱԳ նախարարի պաշտոնակատար Արմեն Գրիգորյանը հայտարարել էր, որ Երեւանը ուշադիր հետեւում է "Հյուսիս-Հարավ" միջազգային տրանսպորտային միջանցքի նախագծում Հնդկաստանի ակտիվ ներգրավվածությանը եւ Չաբահար նավահանգստի զարգացման հարցում Հնդկաստանի շահագրգռվածությանը եւ պատրաստ է մասնակցել այդ ծրագրի իրականացման աշխատանքներին: Ս. թ. օգոստոսին Աֆղանստանում իշխանափոխությունից հետո փորձագետները սկսել են մտավախություն հայտնել այն կապակցությամբ, որ Իրանում Չաբահար նավահանգստի զարգացման խոշոր նախագիծը, որը Հնդկաստանին թույլ կտա Պակիստանի շրջանցմամբ ցամաքային ճանապարհով անցնել Աֆղանստան եւ Կենտրոնական Ասիա, կարող է անիրականանալի երազանք մնալ: