Արմինֆո. Տաղանդաշատ մարդկային ռեսուրսներով, բաց մշակույթով, հզորագույն սփյուռքով Հայաստանը կարող է դառնալ տուն բազմաթիվ նորարարությունների համար։ Այդպիսի կարծիք է հայտնել Հայաստանի Կենտրոնական բանկի նախագահ Մարտին Գալստյանը՝ 3-րդ "Մտքերի գագաթնաժողովում" իր ելույթի ժամանակ:
«Ապագան հիմնված է գիտության և տեխնոլոգիաների վրա: Թվանշային տեխնոլոգիաները սրա կենտրոնում են: Հայաստանն այն կատարյալ վայրն է, որտեղ փոխակերպմանն ուղղված լուծումները կարող են բացահայտվել և իրականացվել», - ընդգծել է նա:
Իր ելույթում Մարտին Գալստյանը պատմել է, որ Կենտրոնական բանկը չեմպիոն է դարձել ֆինանսական ծառայությունների փոխակերպման գործընթացում, եւ ֆինանսական ծառայությունների թվային վերափոխումը Կենտրոնական բանկի համար առաջնահերթ է դարձել: ԿԲ նախագահը վստահեցրել , որ կարգավորողը նաև կարողանում է համապատասխան հենքեր ստեղծել թվային տնտեսության զարգացման համար: «Ակնկալում ենք համապատասխան մասնակցություն նաև մասնավոր ոլորտի կողմից, խոսքը նաև գլոբալ մակարդակով տաղանդների ներգրավման, նորագույն տեխնոլոգիաների ներգրավման, մարդկային կապիտալի ներառման մասին է», - ասել է նա:
ԿԲ ղեկավարի ասելով, հաջորդ կարևորագույն քայլը վերաբերում է վճարման և հաշվարկային ծառայությունների թվանշավորմանը՝ ծառայությունների որակը բարելավելու համար հիմք ընդունելով նորարարական լուծումները, ինչը նոր թվային ֆինանսական ծառայությունների համար կստեղծի նոր էկոհամակարգ: «Աշխարհը դառնում է լաբորատորիա փորձարկումների համար, և այն ազգերը, որոնք բավարար համարձակություն կունենան այդ փորձն իրականացնելու, կստանան համապատասխան արգասիքը», - ամփոփել է նա:
Նշենք, որ "Մտքերի հայկական գագաթնաժողովն" անցկացվում է ՀՀ նախագահ Արմեն Սարգսյանի հովանու ներքո, հիմնական գործընկերներն են հեղինակավոր վերլուծական հանդեսը եւ Հայաստանի Կենտրոնական բանկը: Փակ ձևաչափերով անցկացվող լիագումար նիստերը նվիրված են երկու հիմնական թեմաների՝ աշխարհում և Հարավային Կովկասում աշխարհաքաղաքական փոփոխությունների զարգացմանը և տեխնոլոգիաներին, մասնավորապես, արհեստական բանականությանն ու կենսատեխնոլոգիաներին 21-րդ դարում։ Գագաթաժողովի շրջանակներում կներկայացվի հաջորդ տարի Հայաստանում կայանալիք STARMUS գիտության և արվեստի 6-րդ փառատոնի ծրագիրը:
Հաշվի առնելով համաճարակային իրավիճակն աշխարհում՝ որոշ մասնակիցներ գագաթնաժողովին կմասնակցեն առցանց: Այս տարի գագաթնաժողովի մասնակիցների շարքում են երկրների նախկին ղեկավարներ, միջազգային հեղինակավոր փորձագիտական և վերլուծական կենտրոնների, կազմակերպությունների, տեխնոլոգիական ընկերությունների ղեկավարներ, հեղինակավոր համալսարանների պրոֆեսորներ, այդ թվում՝ Արգենտինայի նախկին նախագահ Մաուրիսիո Մակրին, Շվեյցարիայի նախկին նախագահ Միշլին Կալմի Ռեյը, Ռուսաստանի «Սկոլկովո» հիմնադրամի նախագահ, Շախմատի համաշխարհային ֆեդերացիայի (ՖԻԴԵ) նախագահ Արկադի Դվորկովիչը, ՌԴ Պետդումայի պատգամավոր, ԱՊՀ գործերի, եվրասիական ինտեգրման և հայրենակիցների հետ կապերի կոմիտեի փոխնախագահ Կոնստանտին Զատուլինը, ՄԱԿ-ի Առևտրի և զարգացման համաժողովի (UNCTAD) ներդրումների և ձեռնարկատիրության բաժնի տնօրեն Ջեյմս Ժանը, Yandex-ի փոխտնօրեն Տիգրան Խուդավերդյանը, լեգենդար մարզիկ Ռոջեր Գրեյսին և այլք: