Արմինֆո. "Ռեստորանների Ասոցիացիա" ՀԿ-ն բացասաբար է արձագանքել հաջորդ տարվա հունվարի 1-ից հանրապետությունում նոր սահմանափակումներ կիրառելու մասին առողջապահության նախարարի հայտարարությանը:
«Կոչ ենք անում ՀՀ Կառավարությանը և Առողջապահության Նախարարությանը զերծ մնալ անհիմն և բացասական հետևանքներ ունեցող նախաձեռնություններից: Խիստ անհամաձայնություն ենք հայտնում հնչեցված մտքի հետ և հայտարարում, որ գործարարները կնախաձեռնեն հակազդեցության քայլեր:
Ռեստորանային ոլորտը գտնվում է խիստ ծանր տնտեսական իրավիճակում, ապահովում է հիսուն հազար աշխատատեղ և չի պատրաստվում հնազանդվել ոլորտի համար կործանարար որոշումներին: Մեկ անգամ ևս կոչ ենք անում պատասխանատու գերատեսչություններին զբաղվել մասնագիտական խնդիրներով` մասնավորապես` առողջապահությամբ, զերծ մնալով գործարար աշխարհին միջամտելուց», - ասվում է "Ռեստորանների Ասոցիացիա" ՀԿ ֆեյսբուքյան էջում զետեղված հայտարարությունում:
Նշենք, որ առողջապահության նախարար Անահիտ Ավանեսյանն այսօր մամուլի ասուլիսի ժամանակ հայտարարել է, որ Հայաստանում նոր կորոնավիրուսային սահմանափակումներ են մտցվելու։ Նրա խոսքով ՝ 2022 թվականի հունվարի 1-ից հասարակական սննդի օգյեկտներ եւ մշակութային միջոցառումների մուտքը հասանելի կլինի միայն պատվաստված քաղաքացիներին՝ պատվաստման վկայական ներկայացնելու դեպքում, իսկ չպատվաստված անձանց մուտքը կթույլատրվի միայն ՊՇՌ-թեստերի բացասական արդյունքի առկայության դեպքում:
