Արմինֆո. Չինաստանի կենտրոնական մասի հյուսիսում գտնվող Գանսու նահանգից դեպի Վրաստան առաջին անգամ կոնտեյներային գնացք է ուղեւորվել: Այդ մասին հաղորդում է newsgeorgia-ն՝ վկայակոչելով ՉԺՀ-ում Վրաստանի դեսպանատան հայտարարությունը։
Ըստ աղբյուրի, շարժակազմն Ուվե քաղաքից դուրս է եկել դեկտեմբերի 4-ին, իսկ Թբիլիսի պետք է ժամանի 10-12 օր անց:
Վրաստանի ԱԳՆ-ում նշել են, որ Գանսուից կանոնավոր կոնտեյներային երկաթուղային փոխադրումներ կիրականացվեն ինչպես դեպի Վրաստանի, այնպես էլ՝ Եվրոպայի այլ երկրներ:
Առաջին շարժակազմի մեկնման արարողության ընթացքում ՉԺՀ-ում Վրաստանի դեսպան Արչիլ Կալանդիան ընդգծել է նախագծի ռազմավարական կարեւորությունը, նշելով, որ վերջինս կնպաստի անդրկասպյան միջազգային փոխադրամիջանցքի զարգացմանը եւ Վրաստանի դիրքավորմանը՝ որպես տարածաշրջանային առեւտրային, տրանսպորտային եւ լոգիստիկ հանգույց:
Աղբյուրը նշում է, որ վերջին տարիներին Չինաստանը Վրաստանի արտահանման գլխավոր գործընկերն է՝ առաջ անցնելով հարևան Ռուսաստանից և Թուրքիայից: Նման արագ աճի պատճառ է դարձել Վրաստանի եւ Չինաստանի միջեւ ազատ առեւտրի շուրջ համաձայնագիրը, որն ուժի մեջ է մտել 2018 թվականի հունվարի 1-ից:
Նշենք, որ ԵԱՏՄ անդամ երկրների տարածքով անցնող միջազգային փոխադրամիջանցքների վերլուծության համաձայն, ծովային ճանապարհով Չինաստանից դեպի ԵՄ կոնտեյներային բեռների առաքման ժամկետը հասնում է 60 օրվա, մինչդեռ, այդ նույն բեռների ՝ ԵԱՏՄ երկաթուղիներով առաքման միջին տեւողությունը չի գերազանցում երկու շաբաթը: Ընդ որում, արդեն այժմ կան ծառայություններ, որոնք ապահովում են ԵԱՏՄ տարածքով մեկշաբաթյա ժամկետում փոխադրումը։
Հիշեցնենք, որ Հարավկովկասյան երկաթուղին (ՀԿԵ) իրականացնում է միջազգային մուլտիմոդալ և կոնտեյներային փոխադրումներ (երկաթուղային, ջրային, ավտոմոբիլային տրանսպորտի օգտագործմամբ):
Բեռների առաքման մրցունակ պայմանների պահպանման նպատակով Վրացական երկաթուղու հետ համատեղ 2020 թվականին ՀԿԵ - ն երկարաձգել է Փոթի նավահանգստի տերմինալներից հացահատիկային բեռների փոխադրման, ինչպես նաեւ արագացված կոնտեյներային գնացքի կազմում 40-ֆուտանոց բեռնարկղերի փոխադրման միջանցիկ սակագնային դրույքաչափերի գործողությունը: Պահպանվել են Երևանի և Փոթիի ու Բաթումի նավահանգիստների միջև արագացված կոնտեյներային գնացքի երթևեկության պայմանները։ Տվյալ երթուղով բեռների առաքման ժամկետը կազմում է 30 ժամ, իսկ սակագնային դրույքաչափերը սովորական բեռնատար գնացքի կազմում բեռների փոխադրման համար 30 տոկոսով ցածր են 20 ֆուտանոց կոնտեյներների համար, եւ 52 տոկոսով՝ 40 ֆուտանոց կոնտեյներների համար: