Ամերիաբանկը փետրվարի 14-ին վաճառքի կհանի դոլարային եւ դրամային պարտատոմսերի հերթական տրանշերը

Արմինֆո. Ամերիաբանկը փետրվարի 14-ին ձեռնամուխ կլինի 8 մլն դոլար եւ 3 մլրդ դրամ թողարկման ծավալներով դոլարային եւ դրամային անվանական, արժեկտրոնային եւ ոչ փաստաթղթային պարտատոմսերի հերթական տրանշերի առաջնային տեղաբաշխմանը:

Այդ մասին նշված է ՀՀ Կենտրոնական բանկի կայքում զետեղված այդ թողարկման ազդագրում, որի համաձայն, այդ երկու թողարկումների տեղաբաշխումը նախատեսվում է ավարտել 2022 թվականի ապրիլի 22-ին: Դոլարային տրանշի շրջանակներում կթողարկվի 80 հազար պարտատոմս՝ 100 դոլար անվանական արժեքով։ Արժեկտրոնային եկամտաբերությունը սահմանվել է 3,5%: Արժեկտրոնային վճարումների պարբերականությունը նախատեսված է եռամսյակը մեկ անգամ: Այս տրանշի ամբողջական մարումը նախատեսվում է 2024 թվականի մայիսի 14-ին։

Իսկ դրամային տրանշի շրջանակներում կթողարկվեն 30 հազար պարտատոմս՝ 100 հազար դրամ անվանական արժեքով։ Արժեկտրոնային եկամտաբերությունը սահմանվում է 9.5%: Արժեկտրոնային վճարումների պարբերականությունը նախատեսված է եռամսյակը մեկ անգամ: Այս տրանշի ամբողջական մարումը նույնպես նախատեսվում է 2024 թվականի մայիսի 14-ին։

Այդ թողարկումների պարտատոմսեր ձեռք բերել ցանկացողները կարող են դրամական միջոցներ փոխանցել Ամերիաբանկում բացված համապատասխան հաշվեհամարներին. դրամային տրանշի համար' 1570043120372900, դոլարային տրանշի համար' 1570043120372900, դոլարային տրանշի համար ' 1570043100494501:

AMX-ի տվյալներով, ֆոնդային բորսայում ս.թ. փետրվարի 10-ի դրությամբ գնանշվում է Ամերիաբանկի  պարտատոմսերի 21 թողարկում' 12 դոլարային, 8 դրամային եւ 1 եվրոյով: Դոլարային թողարկման ընդհանուր ծավալը կազմում է 102.210 մլն դոլար, դրամայինը՝ 34.5 մլրդ դրամ, իսկ եվրոյովը՝ 42 մլն եվրո: Դոլարային տրանշերի մարումը տեղի կունենա 2022-2023թթ. 2022թ. փետրվարին, հունիսին, հուլիսին, հոկտեմբերին եւ դեկտեմբերին' վեց տրանշ, 2023թ. մարտին, մայիսին, օգոստոսին, հոկտեմբերին եւ դեկտեմբերին՝ վեց տրանշ: Իսկ դրամային տրանշերը մարվելու են 2022-2024թթ.: 2022թ. փետրվարին, հուլիսին և նոյեմբերին՝ չորս տրանշ, 2023թ. մարտին, ապրիլին և հոկտեմբերին՝ երեք տրանշ, իսկ 2024թ. փետրվարին՝ մեկ տրանշ։ Իսկ եվրոյով տրանշի մարումը նախատեսվում է 2025թ. նոյեմբերին: Դոլարային տրանշերի համար թողարկման պահին սահմանված արժեկտրոնային եկամտաբերությունը տատանվել է 4-5,5 տոկոսի սահմաններում, դրամայինի համար' 9-9,75 տոկոսի, իսկ եվրովոյի համար' 3,05 տոկոսի սահմաններում:

ԱրմԻնֆո-ի պատրաստած Հայաստանի բանկերի ֆինանսական վարկանիշի  30.09.2021 թ. տվյալներով, Ամերիաբանկը կորպորատիվ պարտատոմսերի տեղաբաշխումից ներգրավված միջոցների ծավալով զբաղեցնում է 2 - րդ տեղը' 111 մլրդ դրամ կամ 229 մլն դոլար: Տարեկան կտրվածքով բանկը այդ ցուցանիշը ավելացրել է 61% - ով: Բանկային հատվածում այս ցուցանիշի ընդհանուր ծավալում Ամերիաբանկին բաժին է ընկել ավելի քան 25%-ը: Ամերիաբանկը բավականին ակտիվ է Հայաստանի կորպորատիվ պարտատոմսերի շուկայում՝ սկսելով թողարկել իր արժեթղթերը 2016թ. մարտից, և նույն թվականին նախաձեռնելով առաջին թողարկումը միջազգային շուկայում ՝ հունիսին, իր ներդրումային կառավարչի ՝ responsAbility Investments AG ընկերության միջոցով հաջողությամբ տեղաբաշխել է 20 մլն դոլար ծավալով պարտքային արժեթղթերը լյուքսեմբուրգյան 4 ներդրումային ֆոնդերում: Ամերիաբանկը բազմիցս ճանաչվել է "արժեթղթերի միջազգային շուկայում դեպոզիտար համակարգի հաշվի լավագույն օպերատոր- կաստադիան":

Հիշեցնենք, որ 1996թ. հոկտեմբերի 31-ից հայաստանյան շուկայում գործող Ամերիաբանկը ունիվերսալ բանկ է, որը ներդրումային, կորպորատիվ և մանրածախ բանկային ծառայություններ է մատուցում բանկային լուծումների համալիր փաթեթի տեսքով: 2021թ. դեկտեմբերի 1-ի դրությամբ բանկի բաժնետերեր են հանդիսանում Imast Group (CY) Limited (նախկինում կոչվում էր Ամերիա Գրուպ (Սի-Ուայ) Լիմիթեդ)՝ 48,90%, ՎԶԵԲ-ը' 17,74%, Ասիական զարգացման բանկը' 13,93%, ESPS Holding Limited-ը' 11,92% և Afeyan Foundation for Armenia Inc.-ը՝ 7,51%.