Արմինֆո.ՀՀ հանրային ծառայությունները կարգավորող հանձնաժողովի (ՀԾԿՀ) նախագահ Գարեգին Բաղրամյանը կարծում է, որ ռուսական գազի դիմաց ռուբլով վճարելու նպատակահարմարության հարցը պահանջում է մանրամասն քննարկում' բոլոր շահագրգիռ կառույցների ներգրավմամբ: Այդ մասին նա հայտարարել է մարտի 28-ին լրագրողների հետ զրույցում, անդրադառնալով հարցին, թե արդյոք նպատակահարմար է համարում ռուսական գազի դիմաց ռուբլով վճարել։
"Ես, որպես հանձնաժողովի նախագահ, իմ լիազորությունների շրջանակում կնախընտրեի, որ մենք ավելի կայուն արժույթով գազ գնեինք", - ասել է Բաղրամյանը: Ինչպես պարզաբանել է կարգավորչի ղեկավարը, որքան կայուն լինի արժույթի փոխարժեքը, որով վճարվում է գազի մատակարարումների դիմաց, այնքան քիչ գումար կփոխհատուցվի սակագնի հերթական վերանայման դեպքում:
Մարտի 23-ին Ռուսաստանի նախագահ Վլադիմիր Պուտինը Ռուսաստանի բանկին եւ կառավարությանը հանձնարարել է մեկշաբաթյա ժամկետում որոշել ռուբլիով Եվրոպա գազի մատակարարման համար հաշվարկների անցկացման կարգը: Նա նշել է, որ ազգային արժույթով գազ վաճառելու որոշումը վերաբերում է ոչ բարեկամական երկրներին, իսկ այլ պետությունների հետ Ռուսաստանն իրավունք ունի տնտեսական հարաբերություններ վարել նախկին կանոններով:
Ավելի վաղ ՀՀ փոխվարչապետ Մհեր Գրիգորյանը հայտարարել էր, որ ռուսական գազի դիմաց ռուբլով վճարելու հարցը քննարկվում է Հայաստանում: Մարտի 24-ին էկոնոմիկայի նախարար Վահան Քերոբյանը հայտարարել էր, որ ռուբլով գազի գնի արձանագրումը մեծ հաջողություն կլիներ, այդ թվում ՝ արտահանողների խնդիրները լուծելու համատեքստում: Նրա խոսքով ՝ ներկայում հայ արտահանողները ռուբլու կայունության վստահություն չունեն։ Այդ առնչությամբ նրանք խուսափում են նշել արտահանվող ապրանքի գինը ռուբլով։ "Եթե մենք գազի համար ռուբլով ֆիքսված գին ունենանք, ապա դա հնարավորություն կտա հետադարձ գործարքներով մեր արտահանողներին ռուբլու ֆիքսված փոխարժեք տրամադրել", - պարզաբանել էր նա: Օրինակ, ինչպես նշել էր էկոնոմիկայի նախարարը, այն դեպքերում, երբ ապրանքն արտահանվում է, իսկ դրա դիմաց վճարումը պետք է կատարվի երկու ամիս անց, արտահանողի բանկը կարող է դրամով վերահաշվարկ իրականացնել նախապես համաձայնեցված փոխարժեքով։ "Դա վստահություն կհաղորդի հայրենական արտահանողներին վաղվա օրվա նկատմամբ", - նշել էր նա, հավելելով, որ նրանք զգալի վնասներ են կրել դեբիտորական պարտքերի պատճառով:
