Արմինֆո.Գերմանական KfW զարգացման բանկը 116 մլն 400 հազար եվրո կտրամադրի Հայաստանին ՓՄՁ եւ վերականգնվող էներգետիկայի ոլորտի սուբյեկտների արտոնյալ վարկավորման ծրագրերի համար:
ԱԺ ֆինանսավարկային եւ բյուջետային հարցերի մշտական հանձնաժողովը ապրիլի 11-ին դրական եզրակացություն է տվել "Հայաստանի Հանրապետության կառավարության եւ Գերմանիայի Դաշնային Հանրապետության կառավարության միջեւ 2020 թվականի ֆինանսական համագործակցության մասին" համաձայնագրի վավերացմանը, չնայած ընդդիմադիր պատգամավորը կասկած է հայտնել փաստաթղթի պոտենցիալ շահառուներին տրամադրվող վարկերի արտոնյալ լինելու վերաբերյալ:
Ինչպես հայտարարել է ՀՀ էկոնոմիկայի փոխնախարար Ռաֆայել Գեւորգյանը, 116 մլն 400 հազար եվրոյի վարկային-դրամաշնորհային միջոցները (դրանց համարժեքը դրամով) Հայաստանին կտրամադրվեն կոնկրետ նպատակների համար: Այսպես, 40 մլն եվրո (16 տարի ժամկետով) ուղղորդվելու է վերականգնվող էներգետիկայի ոլորտի վարկավորմանը, իսկ 70 մլն եվրո (12 տարի ժամկետով)՝ փոքր եւ միջին ձեռնարկատիրության սուբյեկտների արտոնյալ վարկավորման ծրագրերին: Վարկը, նրա խոսքով, տրամադրվում է Euro LIBOR գումարած 60 բազիսային կետ տոկոսադրույքով։
Միջոցները կբաշխվեն ծրագրի շահառուների միջեւ բանկային համակարգի միջոցով, պարզաբանել Է Գեւորգյանը: "Հայաստան" խմբակցության պատգամավոր Արթուր Խաչատրյանը հետաքրքրվել է պոտենցիալ շահառուներին տրամադրվող վարկերի տոկոսադրույքներով, եթե պետությունը, փոխնախարարի խոսքով, գերմանացի գործընկերներից միջոցներ է ստանում մոտ 0,5% տոկոսադրույքով, իսկ ԿԲ վերաֆինանսավորման տոկոսադրույքը կազմում է 9.25%: "Հետեւաբար, պետությունը չի կարող ավելի քիչ տոկոսներով գումարներ տրամադրել (9,25% - խմբ.)", - պարզաբանել է նա: "Ոչ մի արտոնություն այստեղ ես չեմ տեսնում. ստացվում է լիզինգ ավելի թանկ է, քան սովորական վարկը, պարզ չէ նաեւ, թե ինչով են տարբերվում այդ վարկերը սովորական բանկային վարկերից: Չէ որ մենք չենք կարող վերցնել փողը, հետո որոշել, թե ինչ անել նրանց հետ", - նշել է Խաչատրյանը։ Նրա խոսքով՝ այնքան էլ հասկանալի չէ, թե ով է այդ համաձայնագրի հասցեատերը, և ինչ պայմաններով են տրամադրվելու միջոցները։0
Այդուհանդերձ, փաստաթուղթը ստացել է հանձնաժողովի դրական եզրակացությունը, քանի որ "դեմ" է արտահայտվել միայն Արթուր Խաչատրյանը։
Ավելի վաղ ԱրմԻնֆոն հաղորդել էր, որ Գերմանիայի կառավարությունը 116 մլն 400 հազար եվրո կտրամադրի Հայաստանին սոցիալ-տնտեսական զարգացման համար: ՀՀ կառավարությունը դեկտեմբերի 23-ին հավանություն է տվել "Հայաստանի Հանրապետության կառավարության և Գերմանիայի Դաշնային Հանրապետո0ւթյան կառավարության միջև 2020 թվականի ֆինանսական համագործակցության մասին" համաձայնագիրը վավերացնելու մասին" օրենքի նախագծին: Ինչպես նշված է փաստաթղթի հիմնավորման տեղեկանքում, համաձայնագիրն ապահովում է համապատասխան իրավական շրջանակները, որոնք հիմք են հանդիսանում ֆինանսավորման կամ վարկային համաձայնագրերի կնքման, ինչպես նաեւ կողմերի միջեւ համագործակցության առանձին համաձայնագրերի համար:
Փաստաթղթով նախատեսվում է հայկական կողմին տրամադրել 116 մլն 400 հազար եվրո Հայաստանի Հանրապետության սոցիալ-տնտեսական զարգացման համար: Մասնավորապես, 3 մլն եվրո կհատկացվի "Կենսաբազմազանություն և կայուն տեղական զարգացում-Հայաստան" ծրագրի իրականացման համար, 40 մլն եվրո ֆինանսական աջակցություն կտրամադրվի գերմանական KfW զարգացման բանկի հանրային քաղաքականության զարգացման շրջանակներում գերմանական կլիմա-խնայողական տեխնոլոգիաների նախաձեռնության (DKTI) ծրագրի "էներգիայի վերականգնվող աղբյուրների զարգացում (փուլ II)" ծրագրին: Եվս 70 մլն եվրո կհատկացվի "Փոքր և միջին ձեռնարկությունների խթանում-III" ծրագրի իրականացմանը, իսկ 3 մլն 400 հազար եվրո՝ վերոնշյալ երկու նախագծերի տեխնիկական աջակցությանն ու իրագործմանն ուղղված անհրաժեշտ հարակից միջոցառումների ֆինանսավորմանը: Համաձայնագիրը շրջանակային է, որի շրջանակներում ստորագրվելու են ֆինանսավորման կամ փոխառության առանձին համաձայնագրեր ՝ համաձայն վերը նշված ծրագրերի ։
