Ուրբաթ, 13 Մայիսի 2022 14:07

Արմինֆո. Հեռահաղորդակցային առաջատար ընկերություններից մեկը՝ Team Telecom Armenia-ն, այս տարի սկսում է իր բիզնես տվյալների կենտրոնի շինարարությունը։ Այդ մասին ԱրմԻնֆո-ի թղթակցի հետ զրույցում հաղորդել է ընկերության գլխավոր տնօրեն Հայկ Եսայանը։

 

Այս փուլում, նրա ասելով, ավարտվում են նախագծային աշխատանքները։ Ուշագրավ  է, որ այսօրվա դրությամբ Team Telecom Armenia-ն, ինչպես նշել է ընկերության ղեկավարը, արդեն հնարավորություն է ընձեռում ընկերություններին տեղադրել ֆիզիկական սերվերներ, ցանցային սարքավորում, վարձակալել սերվերային համակարգեր կամ ամպային (cloud) լուծումներ, ինչն էլ նախատեսում է տվյալների կենտրոնի առկայություն:

 

"Այս բոլոր ծառայությունները մենք ունենք, դրանք աշխատում են: Պարզապես, մենք ուզում ենք հնարավորություն ընձեռել ամբողջ թափով գործարկել այս գործընթացը, տրամադրելով ավելի ծավալուն սպասարկում, որովհետև տեսնում ենք, որ այնտեղ կա  աճ ", - ասել է Հայկ Եսայանը։

 

Խոսելով ընկերության գործունեության այլ ուղղությունների մասին՝ նա անդրադարձել է, այդ թվում, ցանցի արդիականացմանը, որի ուղղությամբ աշխատանքները շարունակական բնույթ ունեն։ Այդ առնչությամբ Եսայանն ընդգծել է, որ Team Telecom Armenia-ի ցանցը ծածկում է գրեթե ողջ երկիրը: Սակայն անհրաժեշտություն կա նոր տեխնոլոգիաների կիրառմամբ բարձրացնել ինտերնետ-տրաֆիկի արագությունը։

 

Հարկ է նշել, որ Team Telecom Armenia ընկերությունը ներդրել է New Generation Network (NGN) առաջատար ցանցը, որը բաժանորդներին հնարավորություն կտա օգտվել 25 ԳԲ/վ արագությամբ ինտերնետից: Ցանցն արդեն գործում է Հրազդանում, Ջերմուկում, Քաջարանում, Գնդեվազում: Երեւանում NGN - ի առաջատար ցանցից արդեն կարող են օգտվել Դավիթաշեն վարչական շրջանում շուրջ 10 հազար բաժանորդ, եւ Արաբկիրում՝ շուրջ 42 հազար բաժանորդ: Ցանցի ներդրման հետագա աշխատանքը կառնչվի մայրաքաղաքի կենտրոնին։

 

Նշենք, որ մեկ տարի առաջ ԱրմԻնֆո-ի  հետ հարցազրույցում Team Telecom Armenia-ի գլխավոր տնօրեն Հայկ Եսայանը հաղորդել էր, որ ընկերությունը մտադիր է զարգացնել բիզնես տվյալների կենտրոնները: "Կան ընկերություններ, որոնք հեռու են ITC - ից (IT Community-խմբ.), որոնց ֆինանսական տեսանկյունից ձեռնտու չէ կառուցել իրենց տվյալների կենտրոնները՝ իրենց իսկ պահանջները բավարարելու համար։ Բայց եթե կա մի մեծ տվյալների կենտրոն, որը քեզ տալիս է անհրաժեշտ ամեն ինչ, կարելի է ծառայություններ գնել այնտեղ, ավելի հեշտ եւ արագ՝  հենց նույն սթարթաթի համար: Այսպիսով, մենք ցանկանում ենք կառուցել ցանց եւ տվյալների կենտրոններ, որոնց շրջանակներում կզարգանան cloud-ծառայությունները: Քանի որ այն միջավայրը, որտեղ կարող են աճել սթարթափները, հենց այս շղթան է' network-data center-clouds":

 

Հիշեցնենք, որ 2020 թվականի հոկտեմբերի 29-ին ավարտվել է Team Telecom Armenia-ի հիմնադիրներ Հայկ եւ Ալեքսանդր Եսայանների կողմից Veon Armenia-ի 100% բաժնետոմսերի ձեռքբերման գործարքը: Արդյունքում՝ երկրի խոշորագույն հեռահաղորդակցային ընկերություններից մեկը կրկին հայկական է։