Արմինֆո.Մայիսի 19-ին Հայաստանում տեղի կունենա Investin.am նոր բիզնես-պորտալի շնորհանդեսը, որն ստեղծվել է ներդրումային առաջարկները հավանական ներդրողների հետ, իսկ տեղական արտադրողներին ավելի քան 100 երկրների մեծածախ գնորդների եւ դիստրիբյուտորների հետ կմրջելու նպատակով:
Բիզնես պորտալի ներդրումային նախագծերի կատալոգն ընդգրկում է տնտեսության տարբեր ոլորտներ, այդ թվում ՝ բարձր տեխնոլոգիաներ, արդյունաբերական արտադրություն, տեքստիլ, վերականգնվող էներգետիկա, շինարարություն, առևտուր, գյուղատնտեսություն, զբոսաշրջություն, ժամանցի արդյունաբերություն և այլն:
Ընդհանուր առմամբ, ընկերությունը տրամադրում է խորհրդատվական ծառայությունների լայն սպեկտր, այդ թվում՝ բիզնես ծրագրի մշակում, Հայաստանում բիզնեսի գրանցում, բիզնեսի վարման թույլտվությունների ստացում, հարկային, իրավաբանական խորհրդատվություն, ներդրումային խորհրդատվություն:
Investin.am պորտալում այսօրվա դրությամբ ներկայացված են 100-ից ավելի ներդրումային նախագծեր, գործարկվել են ավելի քան 1800 արտահանող ընկերություններ, եւ ներգրավված են շուրջ 250 մլն դոլարի օտարերկրյա ուղղակի ներդրումներ:
Ինչպես ԱրմԻնֆո-ի հետ զրույցում հաղորդել է նախագծի ղեկավար, "Արմբրոկ" ներդրումային ընկերության ղեկավար Արամ Կայֆաջյանը, նախագծի ստեղծման գաղափարն ու իրագործումն ունի բացառապես մասնավոր, առեւտրային բնույթ: Որպես նախագծի մասնակիցներ հանդես են գալիս մի քանի առևտրային կառույցներ, այդ թվում՝ նրա գլխավորած "Արմբրոկ" ներդրումային ընկերությունը:
Կայֆաջյանը նշել է, որ Investin.am ներդրումային հարթակը պորտֆելային ներդրումների մասին չէ։ Հարթակը նախատեսված է ներդրողների մասնակցության համար՝ մասնավոր կապիտալի (Private Equity) ուղղակի ներդրումների միջոցով: Դրանք ներդրումներ են արդեն հասուն ընկերություններում՝ նրանց գործունեության հետագա զարգացման և ընդլայնման համար, այդ թվում ՝ շուկայում դիրքերն ուժեղացնելու և արտահանման ներուժը մեծացնելու նպատակով, ինչի արդյունքում կավելանա նաև ընկերության արժեքը։
Հարթակը նախատեսված է նաև օտարերկրյա ներմուծողների համար, որոնք Investin.am-ի միջոցով կարող են գտնել հայկական ապրանքներ և ծառայություններ արտադրող գործընկերներ։