Արմինֆո.ՀՀ փոխվարչապետ Մհեր Գրիգորյանը չի բացառում ազգային արժույթի՝ դրամի արժեւորման շարունակական բնույթը եւ գազի ու էլեկտրաէներգիայի սակագների վերանայումը իջեցման ուղղությամբ: Այդ մասին նա հայտարարել Է հունիսի 15-ին Ազգային ժողովում կառավարական ժամի ընթացքում ՝ պատասխանելով "Քաղաքացիական պայմանագիր" խմբակցության պատգամավոր Բաբկեն Թունյանի հարցին։
Պատգամավորը, մասնավորապես, հետաքրքրվել է գազի և էլեկտրաէներգիայի սակագների փոփոխության հնարավորություններով ՝ հաշվի առնելով դրամի արժևորումը: Նա հիշեցրել է, որ ընթացիկ տարվա սկզբից ազգային արժույթը ԱՄՆ դոլարի նկատմամբ արժեւորվել է 12 տոկոսով, իսկ նախորդ տարվա համեմատ ՝ 20 տոկոսով:
Ի պատասխան՝ Գրիգորյանը նշել է, որ էլեկտրաէներգիայի և գազի սակագների հաշվարկի ժամանակ Հանրային ծառայությունները կարգավորող հանձնաժողովը ներառում է նաև փոխարժեքների հարցը։ "Խնդիրն այն է, թե որքանով է այս իրավիճակը դիսկրետ եւ երկարաժամկետ հիմնարար տեսանկյունից: Չի բացառվում, որ դրամի արժեւորման գործընթացը շարունակական բնույթ կրի, որն արդեն գերազանցել է ընթացիկ տարվա պետական բյուջեով նախատեսված ԱՄՆ դոլարի նկատմամբ դրամի փոխարժեքը", - ասել է փոխվարչապետը, վստահություն հայտնելով, որ ՀԾԿՀ-ն տարեկան կտրվածքով կվերադառնա այդ հարցի քննարկմանը ։ Նա ընդգծել է, որ անհրաժեշտ է կողմնորոշվել այն հարցի շուրջ, թե որքանով է այս իրավիճակը մշտական։
Հիշեցնենք, որ Հայաստանում 2022-ի փետրվարի 1-ից էլեկտրաէներգիայի սակագինը բարձրացել է միջինը 4,7 դրամով, նույնքան էլ գազինը՝ ապրիլի 1-ից: Բնակչության տարբեր խմբերի համար գործում են սակագների տարբեր դրույքաչափեր։ Սակագների դրույքաչափերի հաշվարկման ժամանակ հաշվի են առնվում նաեւ փոխարժեքների տատանումները:
