"Մետրոգիպրոտրանսը" կզբաղվի մետրոյի "Աջափնյակ" կայարանի նախագծմամբ

Արմինֆո.Երեւանի քաղաքապետարանը եւ ՌԴ-ում ու հետխորհրդային երկրներում մետրոյի նախագծմամբ զբաղվող "Մետրոգիպրոտրանս" ընկերությունը համաձայնագիր են ստորագրել: Համաձայնագրի ստորագրման արարողությունը տեղի է ունեցել Սանկտ Պետերբուրգի միջազգային տնտեսական համաժողովի շրջանակներում:

«Սանկտ-Պետերբուրգում ներկա եմ գտնվել Երևանի քաղաքապետարանի և ՌԴ-ում ու հետխորհրդային երկրներում մետրոյի նախագծման աշխատանքներ իրականացրած «Մետրոգիպրոտրանս» ընկերության միջև համաձայնագրի ստորագրմանը։ Համաձայնագրով նախատեսվում է իրականացնել մետրոյի Աջափնյակի կայարանի նախագծման աշխատանքները։ Քայլ առ քայլ իրագործում ենք մեր խոշոր ծրագրերը` մայրաքաղաքում բարեկեցիկ ու հարմարավետ միջավայր ձևավորելու նպատակով», - «Ֆեյսբուքի» իր էջում գրել է նախկին փոխվարչապետ Տիգրան Ավինյանը։

Ինչպես ավելի վաղ հաղորդել էր ԱրմԻնֆոն, մետրոյի "Աջափնյակ" նոր կայարանի կառուցման նախագծային աշխատանքների համար հատկացվել է 554 մլն դրամ: 2021 թվականի  նոյեմբերի վերջին հաղորդվել էր, որ ռուսական առաջատար "Մետրոգիպրոտրանս" ընկերությունը հաղթել է Երևանի քաղաքապետարանի հայտարարած "Աջափնյակ" մետրոյի կայարանի նախագծման մրցույթում։ Նախագծի նախնական տարբերակը, ինչպես ասում էր Երևանի նախկին քաղաքապետ Հայկ Մարությանը, ենթադրում է միայն մետրոպոլիտենի համար Հրազդանի վրա կամրջի կառուցում, "Մետրոգիպրոտրանսն" առաջարկում է կառուցել նաև երկրորդ "հարկ" ՝ ավտոմեքենաների և հետիոտններիի համար: Նշվել է, որ նախընտրելի է մետրոյի ստորգետնյա կայարանի կառուցումը, քանի որ այն շատ ավելի հարմար է մետրոյից օգտվողների համար եւ թույլ է տալիս զարգացնել տարբեր ենթակառուցվածքներ: "Մետրոգիպրոտրանսի" տնօրենների խորհրդի նախագահ Վալերի Աբրամսոնը Հայաստանի կառավարությանն առաջարկել է նաեւ 500 մլն ԱՄՆ դոլար արժողությամբ մետրոյի զարգացման նախագիծ: "Արտահանման վարկերի եւ ներդրումների ապահովագրման ռուսական գործակալությունը պատրաստ է շահավետ պայմաններով աջակցել ծրագրին ։ Այդ միջոցներով մենք կկարողանանք արդիականացնել հին մետրոյի ենթակառուցվածքը, ինչպես նաեւ պլանավորել քաղաքի այն հատվածները, որոնց ուղղությամբ կայարանները կարող են ընդլայնվել", - ասել է Աբրամսոնը։ Ավելի վաղ հաղորդվել էր, որ ԷՍԿԱՐ-ի հետ վարկային համաձայնագրի հաստատման դեպքում շինարարական աշխատանքները կտեւեն շուրջ 1,5 տարի: Քաղաքային իշխանությունների ծրագրով, մետրոյի նոր կայարան տանող  525 մետր երկարությամբ ճանապարհը պետք է անցնի թունելի միջով, որի շինարարությունը սկսվել է դեռևս ԽՍՀՄ տարիներին և մնացել է անավարտ։ Այն ժամանակ անավարտ է մնացել Աջափնյակ կայարանի շինարարությունը, նախագծում դրա շարունակությունն է քաղաքի հյուսիս-արևմտյան ծայրամասում գտնվող Դավիթաշեն թաղամասից։