Երկուշաբթի, 20 Հունիսի 2022 17:32

Արմինֆո.ՎՏԲ-ն նախատեսում է պահպանել ներկայությունը Հայաստանի բանկային շուկայում: Այդ մասին հայտարարել է բանկի վարչության նախագահ Անդրեյ Կոստինը՝ "Ինտերֆաքսին" հարցազրույցում:

 

Նա նշել է, որ բանկը մտադիր է հեռանալ Վրաստանից, սակայն կպահպանի ներկայությունը Ադրբեջանի, Հայաստանի, Բելառուսի, Ղազախստանի, Չինաստանի եւ Հնդկաստանի բանկային շուկաներում: "Մենք, բացառությամբ մեկ դեպքի, ոչ մի տեղ չենք վաճառում (դուստր բանկերը - խմբ.), ոչ մի տեղ: Մենք սկզբունքային դիրքորոշում ունենք, մենք ամենուր մնացել ենք", - հայտարարել է ՎՏԲ-ի ղեկավարը: Այլ երկրներում բանկը քննարկում է փոխգործակցությունն ազգային բանկերի հետ:

 

"Մենք հեռանում ենք միայն Վրաստանից, բայց այնտեղ մի փոքր այլ իրավիճակ է։ Իսկ Ադրբեջանում, Հայաստանում, Բելառուսում, Ղազախստանում, Չինաստանում, Հնդկաստանում մենք մնում ենք եւ առաջ ենք տանում ազգային բանկերի, տեղական բանկերի հետ փոխգործակցության հարցը, որպեսզի ազգային արժույթներով երկկողմանի առեւտրում հաշվարկների գծով առանցքային բանկ դառնանք: Տեսնում ենք հեռանկարներ այդ երկրներում մեր բիզնեսի համար ", - նշել է Կոստինը։

 

ՎՏԲ - ն դուստր կամ ասոցացված բանկեր ունի Բելառուսում, Հայաստանում, Ղազախստանում, Ադրբեջանում, Վրաստանում, Գերմանիայում, Իտալիայում, Մեծ Բրիտանիայում, Կիպրոսում, 50 տոկոս բաժնեմաս ունի ռուս-վիետնամական ՎՌԲ համատեղ բանկում, եւ 50,1՝ տոկոս անգոլական Banco VTB Africa-ում: Բանկի մասնաճյուղերն աշխատում են նաեւ Չինաստանում եւ Հնդկաստանում:

 

Նշենք, որ 2022 թվականի հունիսին ՎՏԲ Բանկը հայտարարել էր մերձավոր արտասահմանի երկրներ ' Բելառուս, Ղազախստան, Հայաստան եւ Ադրբեջան ազգային արժույթներով դրամական փոխանցումների մեկնարկի մասին: Բելառուս, Ղազախստան, Հայաստան եւ Ադրբեջան անդրսահմանային փոխանցման առավելագույն գումարը համապատասխանում է ՌԴ ԿԲ - ի հանձնարարականներին եւ կազմում է ամսական 150 հազար (կամ համարժեք այլ արտարժույթով), միջնորդավճարը՝ փոխանցվող գումարի 1% - ը: Փոխանցումները հասանելի են ինչպես ֆիզիկական, այնպես էլ իրավաբանական անձանց:

 

"Ռուսական բանկերի նկատմամբ սահմանված սահմանափակումներից հետո զգալիորեն նվազել է արտասահման հաճախորդների դրամական փոխանցումների սովորական եղանակների թիվը: Հաշվի առնելով, որ նման փոխանցումները, հատկապես ԱՊՀ երկրներ, չափազանց կարեւոր են մեր շատ օգտատերերի համար, ՎՏԲ - ն գործարկել է դրամական փոխանցումները մերձավոր արտասահմանի երկրներ", - հունիսի 17-ին Պետերբուրգի միջազգային տնտեսական համաժողովի շրջանակներում ասել է ՎՏԲ բանկի վարչության անդամ Սվյատոսլավ Օստրովսկին:

 

Հիշեցնենք, որ "ՎՏԲ-Հայաստան Բանկ" ՓԲԸ-ն 2004թ. ապրիլին դարձել է ՎՏԲ միջազգային ֆինանսական խմբի անդամ: Ռուսաստանում մեծությամբ երկրորդ "ՎՏԲ Բանկ" ԲԲԸ-ին պատկանում է ՎՏԲ-Հայաստան Բանկի  բաժնետոմսերի 100%:  Հայկական բանկային շուկայում ՎՏԲ-Հայաստան Բանկը առաջատար բանկերի թվում է հիմնական հաշվեկշռային ցուցանիշներով (ընդհանուր կապիտալ, ակտիվներ, պարտավորություններ, ֆիզիկական անձանց ավանդներ, վարկային ներդրումներ), պահպանում է առաջատարի դիրքը սպառողական վարկերի գծով եւ ագրովարկերի գծով  գտնվում է առաջատար հնգյակում: Բանկն, ավանդաբար, պահպանում է առաջատար դիրքը մասնաճյուղային ցանցի ընդգրկման գծով: ՎՏԲ - Հայաստան Բանկն առաջատարներից է Հայաստանում դրամական փոխանցումների ծավալներով: 2021թ. հունվար-սեպտեմբեր ամիսներին բանկի կողմից սպասարկված դրամական փոխանցումների քանակը հասել է 500 հազարի՝ 34%-ով գերազանցելով մեկ տարվա վաղեմության ցուցանիշը: