Արմինֆո.ՀՀ ֆինանսների նախարար Տիգրան Խաչատրյանն ընդունել է Եվրոպական ներդրումային բանկի (ԵՆԲ) տարածաշրջանային գրասենյակի ղեկավար Մացիեյ Ցզուրային:
Նախարարության մամուլի ծառայության հաղորդման համաձայն, Տիգրան Խաչատրյանը բարձր է գնահատել Եվրոպական ներդրումային բանկի հետ համագործակցությունը եւ կարեւորել տարբեր ոլորտներում ԵՆԲ համաֆինանսավորմամբ իրականացվող, այդ թվում՝ Հյուսիս-հարավ ավտոմայրուղու եւ Սիսիան-Քաջարան ճանապարհահատվածի նախատեսվող շինարարության, Երեւանի էներգախնայողության եւ տրանսպորտային համակարգի կառավարման ծրագրերը:
Մացիեյ Ցզուրան շնորհակալություն է հայտնել ջերմ ընդունելության համար եւ իր վստահությունը հայտնել ՀՀ կառավարությանը՝ հավակնոտ բարեփոխումների օրակարգը կյանքի կոչելու գործում: «ՀՀ ֆինանսների նախարարության ու Եվրոպական ներդրումային բանկի միջեւ ձեւավորված երկարատեւ եւ արդյունավետ համագործակցությությունը հաջողության մեր գրավականն է»,- իր խոսքում նշել է ԵՆԲ ներկայացուցիչը:
Հանդիպման ընթացքում կողմերը քննարկել են երկուստեք հետաքրքրություն ներկայացնող հարցերի լայն շրջանակ, անդրադարձել պետական պարտքի սպասարկման ռազմավարությանը, մակրոտնտեսական կայունությանը, 2023-2025 թթ. պետական միջնաժամկետ ծախսերի եւ ՀՀ կառավարության պարտքի բեռի նվազեցման վերանայված ծրագրերին:
Եվրոպական ներդրումային բանկը (ԵԻԲ) Եվրոպական միության (ԵՄ) ֆինանսական հաստատությունն է, որի գործառույթն է երկարաժամկետ ֆինանսական աջակցության տրամադրումը ներդրումային ծրագրերին: Այն հիմնադրվել է 1958թ. և ներկայումս գործում է ոչ միայն ԵՄ անդամ պետություններում, այլև ավելի քան 150 երկրներում, որտեղ ԵՆԲ-ը հիմնվում է ԵՄ արտաքին համագործակցության և քաղաքական զարգացման բնագավառների վրա (մասնավոր հատված, ենթակառուցվածքների զարգացում, էներգետիկ անվտանգություն և էկոլոգիական կայունություն)։ 2008թ. փետրվարի 12-ին Լյուքսեմբուրգում և փետրվարի 29-ին Երևանում Հայաստանի Հանրապետության և ԵՆԲ-ի միջև ստորագրվել է շրջանակային համաձայնագիր, որով կարգավորվում է Հայաստանի Հանրապետությունում ԵՆԲ-ի գործունեությունը: Համաձայնագրի նպատակն է հեշտացնել Հայաստանին հետաքրքրող ներդրումային ծրագրերի ֆինանսավորումը՝ վարկերի, երաշխիքների կամ այլ մեխանիզմների միջոցով: