Փաշինյանն անհրաժեշտ է համարում վերանայել տնտեսական ծրագրերը

Արմինֆո.Վարչապետ Նիկոլ Փաշինյանի գլխավորությամբ օգոստոսի 6-7-ը Կենտրոնական բանկի Դիլիջանի ուսումնահետազոտական կենտրոնում տեղի է ունեցել ՀՀ վարչապետին կից տնտեսական քաղաքականության խորհրդի նիստը: Դրա արդյունքում Փաշինյանը կառավարությանը հանձնարարել է ևս մեկ անգամ դիտել իրականացվող ծրագրերը և հասկանալ, թե դրանցից որոնք լրացուցիչ շտկման կարիք ունեն՝ դրանց արդյունավետության բարձրացման համար։

Առաջին օրը քննարկվել են Հայաստանի տնտեսական քաղաքականության, ընթացիկ իրավիճակի և կանխատեսվող զարգացումների հետ կապված հարցեր: Նախատեսվում են ՀՀ կառավարության ծրագրի, մակրոտնտեսական զարգացումների, դրամավարկային և հարկաբյուջետային քաղաքականության, գյուղատնտեսության մրցունակության բարձրացման, պարենային համակարգի զարգացման և այլ թեմաների քննարկումներ:

Օգոստոսի 7-ին քննարկվել են  գյուղատնտեսության և պարենային համակարգի կայուն զարգացմանը, հողային բարեփոխումների միջոցով գյուղատնտեսության մրցունակության բարելավմանը վերաբերող հարցեր։ Զեկույցներով է հանդես եկել Էկոնոմիկայի նախարարի տեղակալ Արման Խոջոյանը։

Փոխնախարարն անդրադարձել է պարենային համակարգի կայուն զարգացման կառավարության տեսլականին, որը միտված է բարձրարժեք արտադրանք ստեղծող գյուղատնտեսության զարգացմանը. ներկայացվել են ռազմավարական նպատակները, առաջնահերթությունները, մարտահրավերներն ու ընթացիկ ծրագրերը։ Նա նշել է, որ 2021թ. գյուղատնտեսական համախառն արտադրանքի ծավալը կազմել է 933 մլն ՀՀ դրամ, արձանագրվել է աճ։ Ընդգծվել է գյուղատնտեսական տեխնիկայի լիզինգի պետական ծրագրի արդյունավետությունը, որի շրջանակում տարեկան 2 տոկոսով սարքավորումների թարմացում է իրականացվում. այսօր ՀՀ-ում առկա է ավելի քան 26000 միավոր գյուղտեխնիկա, և նաև այս ծրագրի հաջող ընթացքով է պայմանավորված որոշ ուղղություններով արտադրողականության բարձրացումը, օրինակ՝ պտուղ-բանջարեղենային պահածոների արտահանման գծով։ Նշվել է նաև ինտենսիվ այգիների հիմնման և գյուղատնտեսական ռիսկերի ապահովագրության ծրագրերի արդյունավետությունը։

Քննարկում է ծավալվել կառավարության գյուղատնտեսական բարեփոխումների և արտադրողականությունը խթանող գործիքակազմի շուրջ։ Արծարծվել են պարենամթերքի նկատմամբ կիրառվող հարկային դրույքաչափերին առնչվող հարցեր, ներկայացվել են դիտարկումներ ու առաջարկություններ։

Մեկ այլ հարցով ներկայացվել է հողային բարեփոխումների միջոցով գյուղատնտեսության մրցունակության բարելավման հայեցակարգը։ Նշվել է, որ այն միտված է հողերի կտրտվածության, ոռոգման ջրի և ֆինանսական ռեսուրսների ցածր հասանելիության, ենթակառուցվածքների թույլ զարգացվածության, սեփականության փոխանցման գործընթացի բարդության խնդիրների հաղթահարմանը։ Այդ նպատակով արդեն իսկ գործում են պետական աջակցության ծրագրեր՝ գյուղատնտեսական կոոպերատիվների ստեղծում, գյուղվարկերի տոկոսադրույքների սուբսիդավորում և այլն։ Նախատեսվում է նաև իրականացնել փորձնական ծրագիր 4 բնակավայրում՝ հողերի կոնսոլիդացիայի, առցանց հարթակի միջոցով իրավական փաստաթղթավորման գործընթացներին աջակցելու և այլ գործիքների կիրառմամբ։

Վարչապետը նկատել է, որ հողերի չօգտագործման առաջնահերթ պատճառը հողերի շուկայի բացակայությունն է, և հողային բարեփոխումը պետք է միտված լինի նախևառաջ դրա ձևավորմանը։ Ներկայացված հայեցակարգի շուրջ ծավալվել է մտքերի փոխանակություն։ Քննարկվել են ոռոգման ենթակառուցվածքների զարգացման, գյուղտնտեսությունների արտադրողականության բարձրացման, հողերի օգտագործելիության մակարդակի ավելացման ուղղությամբ հնարավոր միջոցառումներն ու առկա խնդիրների լուծման տարբերակները։

Ամփոփելով քննարկումը՝ վարչապետ Նիկոլ Փաշինյանը նշել է, որ "Տնտեսական հեռանկարների կենտրոն" հիմնադրամը՝ Արթուր Ջավադյանի ղեկավարությամբ, կազմակերպչական դեր է ստանձնելու այդ խորհրդի շրջանակներում աշխատանքի և հաղորդակցության իրականացման գործում, ինչը շատ կարևոր է: "Մենք, օրինակ, շատ ծրագրեր ունենք, որտեղ ինչ-որ շարժում ենք ապահովում, բայց ոչ՝ ընթացք։ Եվ ես չեմ ամաչում խոստովանել, որ այդպիսի ամենավառ օրինակը Հայաստանի Հանրապետությունում թվայնացման օրակարգն է, երբ մենք արձանագրեցինք, որ իրականում շատ մեծ ջանք է ներդրվում թվայնացման ոլորտում, վերջին 20 տարում հսկայական ռեսուրսներ են ծախսվել, և աշխատանք է կատարվել, բայց թվայնացման առումով ոչ մի բան տեղի չի ունեցել: Մենք ուզում ենք հասկանալ՝ ի՞նչն է պատճառը, որ այսքան ռեսուրս է ծախսվել, բայց թվայնացման ոլորտում Հայաստանի Հանրապետությունը, ըստ էության, շատ նախնական իրավիճակում է", - ասել է նա։