Արմինֆո.Երեւանում մեկնարկել է Եվրասիական միջկառավարական խորհրդի հերթական նիստը՝ նեղ կազմով:
Ինչպես ավելի վաղ հաղորդել էր ԵՏՀ մամուլի ծառայությունը, նիստի ընթացքում կքննարկվի գազի ընդհանուր շուկայի, նավթի և նավթամթերքների շուկաների ձևավորման վերաբերյալ համաձայնագրերի նախապատրաստման ընթացքը: Արդյունքում նախատեսվում է Եվրասիական տնտեսական ինտեգրման հետագա զարգացում նախատեսող որոշումների ստորագրում։ Հաղորդագրության մեջ նշվում է, որ հատուկ ուշադրություն է դարձվելու թվային օրակարգին, մասնավորապես, միության ինտեգրված տեղեկատվական համակարգի զարգացման եւ կատարելագործման հեռանկարներին, ապրանքների էլեկտրոնային առեւտրի վարչարարության միասնական վերլուծական համակարգի մշակմանը:
Նիստի շրջանակներում ողջունելով ԵԱՏՄ անդամ երկրների կառավարությունների ղեկավարներին՝ ՀՀ վարչապետ Նիկոլ Փաշինյանը ցավով նշել է, որ համաշխարհային տնտեսությունը լավագույն ժամանակները չի ապրում: Մասնավորապես, նա ընդգծել է, որ շատ առևտրային, արտադրական, լոգիստիկ կապեր, որոնք նոր են սկսել վերականգնվել համավարակից հետո, այժմ նոր ցնցումների են ենթարկվում։ Վարչապետը նշել է, որ հարցականի տակ են հայտնվել նաեւ գլոբալ տնտեսական համակարգի հիմնարար սկզբունքները:
"Ներկայիս անկայուն տնտեսական իրողություններում կասկած չի հարուցում բարձրագույն մակարդակի
վստահական երկխոսության պահանջարկն ու արդիականությունը՝ ավելի համակարգված փոխգործակցության համար", - ասել է նա, հավելելով, որ փոխադարձ շահերի ըմբռնումը և փոխզիջման պատրաստակամությունը կարող են լինել բազմաթիվ խնդիրների լուծման բանալին։ Այս համատեքստում կառավարության ղեկավարը նշել է ԵԱՏՄ-ում բոլոր մակարդակներում ծագող խնդիրներին արձագանքելու համակարգված միջոցների մշակման ամենօրյա աշխատանքը։
Հիշեցնենք, որ Եվրասիական միջկառավարական խորհրդի նախորդ նիստը տեղի է ունեցել օգոստոսի 25-26-ը Ղրղզստանի Չոլպոն-Աթա քաղաքում ՝ Ղրղզստանի կառավարության ղեկավար Ակիլբեկ Ժապարովի նախագահությամբ, որին մասնակցել են Հայաստանի վարչապետ Նիկոլ Փաշինյանը, Բելառուսի վարչապետ Ռոման Գոլովչենկոն, Ղազախստանի վարչապետ Ալիխան Սմաիլովը, Ռուսաստանի վարչապետ Միխայիլ Միշուստինը և Եվրասիական տնտեսական հանձնաժողովի կոլեգիայի նախագահ Միխայիլ Մյասնիկովիչը: Որպես հյուր խորհրդի նիստին մասնակցել է Ադրբեջանի կառավարության ղեկավար Ալի Ասադովը, ոորպես դիտորդ՝ Ուզբեկստանի վարչապետ Աբդուլլահ Արիպովը։
