Արմինֆո.Հայաստանի եւ Ադրբեջանի միջեւ սահմանի սահմանազատման եւ սահմանային անվտանգության հարցերի պետական հանձնաժողովների երրորդ նիստը տեղի կունենա նոյեմբերի առաջին շաբաթվա ընթացքում Բրյուսելում: Այդ մասին "Ազատություն" ռադիոկայանին հաղորդել են ՀՀ փոխվարչապետ Մհեր Գրիգորյանի գրասենյակից: Այլ մանրամասներ փոխվարչապետի գրասենյակում չեն հայտնել։
Նշենք, որ մայիսի 24-ին Հայաստանի և Ադրբեջանի միջև ձեռք բերված պայմանավորվածությունների կատարման շրջանակներում և համապատասխան կարգադրությունների հիման վրա հայ - ադրբեջանական միջպետական սահմանին տեղի է ունեցել ՀՀ փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի առաջին հանդիպումը ՀՀ և ԱՀ սահմանազատման և անվտանգության հարցերի հանձնաժողովների համատեղ աշխատանքի ձևաչափով: Ըստ ՀՀ ԱԳՆ-ի ՝ կողմերը վերահաստատել են հանձնաժողովների շրջանակներում սահմանազատման և այլ համապատասխան հարցերի, այդ թվում ՝ սահմանին անվտանգության ապահովման ուղղությամբ աշխատանքներ իրականացնելու պատրաստակամությունը։ Քննարկվել են նաև հանձնաժողովների համատեղ գործունեության կազմակերպչական և ընթացակարգային հարցեր: Միջպետական սահմանին հանդիպումներին զուգընթաց, կողմերը համաձայնության են եկել հետագա հանդիպումների համար տարբեր հարթակներ օգտագործելու նպատակահարմարության շուրջ ։ Մասնավորապես, պայմանավորվել են երկրորդ հանդիպումն անցկացնել Մոսկվայում, և երրորդ հանդիպումը՝ Բրյուսելում։ Երկրորդ հանդիպումը կայացել է օգոստոսի 30-ին Մոսկվայում։
Ավելի վաղ ՀՀ վարչապետը հաղորդել էր, որ առաջարկել է հաջորդ նիստն անցկացնել հոկտեմբերի 31-ին ։ Պրահայում կայացած քառակողմ հանդիպման արդյունքում ընդունվել է հայտարարություն, ըստ որի ՝ Երեւանն ու Բաքուն համաձայնել են ճանաչել միմյանց տարածքային ամբողջականությունն ու ինքնիշխանությունը ՄԱԿ-ի կանոնադրության եւ 1991 թվականի Ալմա-Աթայի հռչակագրի համաձայն, ինչն էլ պետք է հիմք հանդիսանա սահմանազատման եւ սահմանագծման հարցերով հանձնաժողովի աշխատանքի համար:
